विश्व साइकल यात्रा गर्दै ३५ सय बोकेर मेची-महाकाली यात्रा गरेका अभिनय (भिडियो)

विश्व साइकल यात्रा गर्दै ३५ सय बोकेर मेची-महाकाली यात्रा गरेका अभिनय (भिडियो)

A+ A A-

दोलखा कालिञ्चोक गाउँपालिका–३, लामीडाँडाका हुन्, स्थानीय अभिनय कार्की ।

दोलखामै हुर्केका अभिनय बाल्यावस्थादेखि नै जिज्ञासु स्वभावका थिए । आर्थिक रूपमा सामान्य परिवारका अभिनयले बाल्य अवस्थामा टेलिभिजन त देख्न पाएनन्, तर रेडियो सुन्न औधी रुचाउँथे । रेडियोमा आउने समाचार र अन्तर्वार्ता चाख दिएर सुन्थे । स्कुलमा अभिनयका साथीहरूबीच भविष्यमा के बन्ने भनेर होडबाजी चल्थ्यो ।

abhinaya-karki (2)1696510264.jpg

कोही खेलाडी, कोही सेनामा जाने त कोही विदेश जाने कुरा गर्थे । तर उनी भने भविष्यमा आफू के बन्ने भनेर अन्योलमा पर्थे ।

त्यसबेला उनलाई दोलखाको वारिपारि र माथि देखिएको गौरीशंकर मात्र संसार हो भन्ने लाग्थ्यो ।

अभिनय आफ्नो बाल्यकालको मनोविज्ञानले नै जीवन अर्थपूर्ण हुनुपर्छ भन्ने लाग्ने गरेको बताउँछन् ।

हरेक दिन साँझ ९ बजे बीबीसी नेपाली सेवामा आउने विश्व घटना कहिल्यै छुटाउँदैनथे उनी । विश्वका भिन्न देशका घटना र देशकै भिन्न भागका बारेमा आएका समाचार सुन्दा त्यो ठाउँ कस्तो होला भनेर सोच्ने गर्थे । त्यसैबेला हो, उनलाई संसारको यात्रा गर्ने सपना जागेको ।

बिस्तारै उनी कलाकारिताप्रति आकर्षित हुन थाले । एसएलसी उत्तीर्ण गरेसँगै राम्रो कलाकार बन्ने सपना बोकेर उनी काठमाडौं प्रवेश गरे । कलाकार बन्ने हुटहुटीका साथ काठमाडौं आएका उनी यहाँको रहनसहन, धुलो, धुवाँ, मानिसहरूको बोली व्यवहारलगायतले बस्नै सकेनन् । दोलखै फर्के ।

पछि फेरि पत्रकारिता तथा कानुन् पढ्ने सोच बनाएर उनी काठमाडौं आए । त्यसबेला एकाएक बाल्यकालमा देखेको संसार घुम्ने सपना सम्झे ।

तर, उनीसँग एक रुपैयाँ पनि थिएन । बसबस र स्कुलस्कुल पुगेर आफ्नो परिचय दिँदै 'म आफ्नो अभियानअन्तर्गत मेची–महाकाली पैदल यात्रामा जादै छु' भनेर सहयोग माग्न थाले । कसैबाट पाँच रुपैयाँ, कसैबाट १० रुपैयाँ संकलन गर्दै करिब ३५ सय रुपैयाँ संकलन गरे ।

मेचीदेखि महाकालीसम्म कतिवटा जिल्ला छन् ? दूरी कति छ ? उनलाई केही थाहा थिएन । त्यसबेला उनीसँग एउटै मात्र हुटहुटी जसरी पनि मची–महाकाली पैदल यात्रा गर्ने थियो । यात्रा नसकिएसम्म कोही पनि आफन्तको अनुहार नहेर्ने प्रण पनि उनले लिए ।

अभिनय काठमाडौंबाट बस चढेर काँकडभिट्टा हानिए । काँकडभिट्टाबाट उनले २०७७ साल फागुन ६ गते मेची–महाकाली पैदल यात्रा सुरु गरे ।

विश्वका केही देशमा चलिरहेको युद्ध तथा गृह युद्धका कारण मानवअधिकार मात्र होइन, बाँच्न पाउने अधिकार नै हनन भएको छ । ती मुलुकमा शान्तिको कामना तथा नेपालकै अस्थिर राजनीतिक अवस्थाबाट सिर्जित अप्ठ्यारो अवस्थाको अन्त्य होस् र संसारभर शान्ति तथा समृद्धि फैलियोस् भन्ने कामनास्वरुप मेची–महाकाली पैदल यात्रा गर्ने उनको अभियान थियो ।

न खाने टुङ्गो, न त बस्ने ? हिँड्दाहिँड्दै कहिले कहालीलाग्दो जंगलमा पुग्दा रात पर्ने त कतै जंगली जनावरको त्रास, कतै सहयोगको अपेक्षा बोकेर स्थानीय प्रशासनमा पुग्दा उल्टो अपहेलना सहनुपरेका तिता अनुभव पनि उनले बटुले । सँगै भोकले तड्पेर ढुङ्गामाटो नै खाऊँझैँ लागिरहेको समयमा अपरिचित मानिसले खाना खुवाएको, नचिनेको मान्छेले अभियानमा हिँडेको भन्ने बुझेर गरेको सहयोग, देखाएको सद्भाव उनका लागि सबैभन्दा ठूलो प्रेरणा बन्यो । अन्तत: ३७ दिनमा उनले मची–महाकाली पैदल यात्रा पूरा गरे ।

त्यस्तै, आफ्नो दोस्रो अभियानअन्तर्गत अभिनयले साइकलबाट नेपालका ७७ जिल्लाको भ्रमण गरे ।

२०७९ पुस १५ गतेदेखि दोलखाको सदरमुकाम चरिकोटबाट ‘फ्रस्ट्रेसन, डिप्रेसन र लागुऔषध दुर्व्यसनलाई त्यागौँ, समृद्ध राष्ट्र निर्माणका लागि युवाहरू एकजुट बनौँ’ भन्ने नारा बोकेर उनले सुरु गरेको सो यात्रा ६ महिना १९ दिनमा पूरा गरेका थिए ।

आफूले देशका ७७ जिल्लाका विभिन्न ठाउँमा पुगेर नेपालको प्राकृतिक सुन्दरता नियाल्नुका साथै आन्तरिक पर्यटन प्रवर्द्धनमा राम्रो सम्भावना रहेको उनको अनुभव छ । जुन यात्रामा उनले कति स्थानमा पिउने पानी नभेटेर छटपटिए, कति स्थानमा त कागतीको बोक्रा र रसले पेट भरे, २७/२८ घण्टासम्म खाली पेट र अनिदो पनि हिँडे ।

‘सय दिनमा ७७ जिल्लाको यात्रा पूरा गर्ने सोचले साइकल यात्रामा निस्केको थिएँ । तर, कति ठाउँको सुन्दरताले मलाई दुई/तीन दिनसम्म पनि रोक्यो । त्यो यात्राले नेपाल घुम्न एक जुनी पर्याप्त छैन भन्ने बुझायो,’ अभिनय सुनाउँछन् । पछिल्लो समय साइकल यात्रामै भारतहुँदै बंगलादेशको ढाकासम्म पुगेर आएका उनी अब भने विश्व साइकल यात्रा गर्ने तयारीमा रहेको बताउँछन् ।

सगरमाथा आरोहणलाई मुख्य लक्ष्य बनाएर आफूले विश्व साइकल यात्रा गर्न लागेको र यो यात्राको उद्देश्य नेपालका हिमालहरूको विश्वस्तरमा प्रचार गरेर नेपालको पर्यटन प्रवर्द्धनमा टेवा पुर्‍याउनु रहेको अभिनय बताउँछन् ।

आउँदो एक दशकसम्म अभियान चलाइरहने योजनामा रहेका उनी विश्व साइकल यात्राको तयारी अन्तिम चरणमा रहेको सुनाउँछन् । आउँदै गरेको महान् चाड दसैँलगत्तै विश्व साइकल यात्रा सुरु गर्ने अभिनयको योजना छ ।

प्रकाशित मिति: शुक्रबार, असोज १९, २०८० ०६:४६