रुपान्तरण अभियानको कार्यक्रममा शेखर गएनन्, गगन–प्रदीपले राखे मन्त्री फिर्ताको प्रस्ताव

रुपान्तरण अभियानको कार्यक्रममा शेखर गएनन्, गगन–प्रदीपले राखे मन्त्री फिर्ताको प्रस्ताव

A+ A A-

आइतबार नेपाली कांग्रेस रुपान्तरण अभियान बागमति प्रदेशले १४ औं महाधिवेशनको संकल्प उत्साह एकता र रुपान्तरण विषयक विचार गोष्ठि आयोजना गरेको थियो । प्रमुख अतिथि नेता शेखर कोइराला भनिए पनि उनी गएनन् । संसदमा हाजिर भएका उनी रुपान्तरणको कार्यक्रममा गएनन् ।

उनको र महामन्त्री गगन थापाको समय मागेर कार्यक्रम तय गरिएको थियो । ‘उहाँलाई सञ्चो नभएर कार्यक्रममा आउनु भएन,’ रुपान्तरण अभियानको बागमति संयोजक जगदिश्वरनरसिंह केसीले शिलापत्रसँग भने ।

कार्यक्रममा शेखर अनाएपछि महामन्त्रीले मुख्य भाषण गरे । भाषणमा उनले पार्टीका परम्परागत अप्ठ्यारादेखि सरकारको विषयमा समेत सनसनीपूर्ण अभिव्यक्ति दिए ।

उनले वर्तमान गठबन्धनलाई फरक ढंगबाट चलाउन प्रस्ताव राखे । अहिले माओवादी अध्यक्ष पुष्पकमल दाहाल प्रचण्ड प्रधानमन्त्री छन् । प्रचण्ड सहित एकीकृत समाजवादी, जसपा, विप्लव नेतृत्वको पार्टीसहितको समाजवादी मोर्चा छ । यही मोर्चालाई अढाई वर्ष सरकार चलाउन दिनुपर्ने र कांग्रेसका मन्त्रीहरू फिर्ता हुनुपर्ने थापाको प्रस्ताव छ ।

‘यो दुई, अढाई वर्ष उहाँहरूले सरकार चलाउने भन्ने कुरा छ । पहिला प्रचण्डजी प्रधानमन्त्री बन्ने, त्यसपछि माधव नेपाल बन्ने भन्ने छ । उहाँहरूको एउटै समाजवादी मोर्चा छ, पार्टीलाई पनि एउटै बनाउने भन्ने छ । मलाई लाग्छ, यो कांग्रेसको मन्त्रीहरू सबै फिर्ता बोलाऔँ । यो दुई अढाई वर्ष उहाँहरूलाई एक्लै चलाउन दिऔँ । हामी समर्थन गरौँ । त्यसपछिको दुई, अढाई वर्ष कांग्रेसले चलाउनुपर्छ । एक्लै चलाउनुपर्छ, त्यसमा जस भए पनि र अपजस भए पनि त्यो बेला कांग्रेसले लिन्छ,’ उनले भने ।

यसरी सरकार नचलाउने हो भने ०८४ को चुनावमा पुग्दा पछिल्लो ४÷५ वर्षमा भएका काम कारबाहीको कुनै पनि दलले जिम्मेवारी नलिने अवस्था आउने उनको भनाइ छ ।

‘यो दुई वर्ष हामीले केही भएन भन्नेभयौं, त्यसपछिको दुई वर्ष उनीहरूले केही भएन भन्ने भए’, थापाले भने, ‘त्यसो भए यो चार÷पाँच वर्षको देशको जिम्मा चाहिँ कसले लिन्छ त ?’

थापाले पार्टी रुपान्तरणका लागि तलदेखि माथिसम्म हल्लाउनुपर्ने बताए ।

‘बरू पार्टी एकपटक भत्किए भत्कियोस्, बड्याङबुडुङ गरी तलदेखि माथिसम्म हल्लाउनुपर्छ,’ उनले भने । यसो गर्दा पार्टी बलियो हुने र गुट पनि भत्किने थापाले बताए ।

‘यति कुरा गरियो भने पार्टीभित्र स्थायी गुट रहन्न, एजेन्डामा आधारित गुट बन्न सक्छ । अहिले पार्टी संरचना यस्तो बन्यो कि कुनै गुटमा नलागे वडा सदस्य, नेविसंघ केन्द्रीय सदस्य नै हुन नपाइने, यस्तो संरचना नै परिवर्तन गर्नुपर्छ,’ उनले भने ।

थापाले पार्टीको विधानमा रहेको संसदीय बोर्ड नै खारेज गरिनुपर्ने बताएका छन् । चार तहमा संसदीय बोर्ड रहने व्यवस्था कांग्रेस विधानमा छ ।

‘संसदीय बोर्ड नै खारेज गरौं, चाहिन्न । जुन तहको चुनावको उम्मेदवार चाहिन्छ पार्टीको सम्बन्धित तहले नै उम्मेदवार छान्छ । केन्द्रबाट उम्मेदवार पठाउन बन्द गरौँ,’ उनले भने । माथिल्लो तहका नेतालाई मठाधिस बनाउने परम्पार अन्त्य हुनुपर्ने उले बताए ।

‘बार्दलीबाट यसो हेर्‍यो तपाईँ चाही सांसद भन्यो भै त हाल्यो यस्तो प्रणालीले चल्छ ?,’ उनले प्रश्न गरे ।

उनले २०८४ सालको चुनावमा कांग्रेसले गठबन्धन नगर्ने प्रष्ट पारे । गठबन्धनको कुरै गर्न नपाइने उनले बताए । ‘८४ मा चुनावी गठबन्धन हुँदैहुँदैन । कांग्रेसभित्र कुरै गर्न पाइँदैन,’ उनले भने ।

शुभेच्छुक संस्थामा नियमित अधिवेशन हुने गरेको र भ्रातृ तथा शुभेच्छुक संघसंस्थाबारे पनि पार्टीले गम्भीर ढंगबाट सोच्ने बेला आएको बताए । ‘हामीले नेविसंघ ठूलो ७११ सदस्यीय बनाऔं, महिला संघ सानो आकारको बनाऔं । ठूलो र सानो जस्तो बनाए पनि दिनकै डेलिकेसन आइरहेका छन्, समस्या देखिएको छ,’ उनले भने, ‘सानो बनाए पनि ठूलो बनाए पनि सुख छैन ।’

नेता प्रदीप पौडेलले पार्टीको सान्दर्भिकतामा प्रश्न उठ्न थालेको बताए । मानिसले पार्टी विघटन गरिदिए हुन्छ भन्न थालेको उनले बताए ।

‘पार्टीको सान्दर्भिकतामाथि प्रश्न छ । आम मानिसले पार्टी विघटन गरिदिए हुन्छ भन्न थालेका छन्,’ पौडेलले भने, ‘सान्दर्भिकता समाप्त हुन नदिन हरेकले आफूले आफूलाई सोध्नुपर्छ ।’

आफूहरूले देशलाई आशावादी बनाउन नसकेको उनको भनाइ छ । ‘म ३५ वर्ष काम गरेको मान्छेलाई ३५ दिन काम गरेको मान्छेले उछिन्छ भने उछिन्न दिनुपर्छ,’ उनले भने, ‘आज हामैसँग देश आशावादी छैन । चुनाव हार्न सकिन्छ विचारसँग हार्न सकिन्न ।’

सरकारले काम गर्न नसके समर्थन फिर्ता लिनुपर्ने उनले बताए । ‘८४ खोजेका हौँ भने कि सत्ता छाड्नुपर्‍यो कि जनताको काम गर्नुपर्‍यो । सरकारमा गएको ८ महिना भयो कति रोजगारी सिर्जना भयो ?,’ उनले भने, ‘काम गर्न सकेनौँ भने समर्थन फिर्ता लिन्छौँ भन्न सक्नुपर्छ ।’

कार्यक्रममा अर्जुननरसिंह केसीले भेटी चढाएर नियुक्ति गर्ने परम्परा रहेसम्म पार्टी नबन्ने बताए । ‘भेटी चढाएको भरमा नियुक्ति गर्ने परम्परा रहेसम्म यो पार्टी बन्दैन,’ उनले भने ।

शिव सुनारले पार्टीमा अवसरको असामनता रहेको बताए । ‘एकातिर खाइरहने डकारिरहने अर्को तर्फकाले डकारेको कस्तो मिठो भनिरहन पर्ने कस्तो अवस्था ?,’ उनले प्रश्न गरे ।

गण्डकी प्रदेशका महामन्त्री किरणबाबु श्रेष्ठले विधिसम्मत पार्टी नचल्दा के हेरेको भन्दै प्रश्न गरे । ‘कांग्रेस विधिसम्मत चलेको छ ? केन्द्रीय सदस्य र महामन्त्रीलाई सोध्न चाहान्छु । नोट अफ डिसेनट कुनै केन्द्रीय सदस्यको छ ?,’ उनले भने, रुपान्तरणको प्रश्न आफूले आफूलाई गर्नुपर्ने छ ।’

प्रकाशित मिति: आइतबार, असोज १४, २०८० २०:५०