कांग्रेसलाई धान्नै गाह्रो भयो दुई-दुई महिनाको केन्द्रीय समिति बैठक, महासमितिले हेरफेर गर्ला ?

कांग्रेसलाई धान्नै गाह्रो भयो दुई-दुई महिनाको केन्द्रीय समिति बैठक, महासमितिले हेरफेर गर्ला ?

A+ A A-

असोज ४ देखि ८ गतेसम्म भएको कांग्रेस केन्द्रीय समिति बैठकमा संस्थापनइतर समूहका नेता शेखर कोइराला बोलेनन् । उनले नबोल्नुको मुख्य कारण थियो साउन २ गतेदेखि १० गतेसम्म भएको केन्द्रीय समितिको बैठकमा राखेको धारणा र गर्नुपर्ने कामहरू कार्यान्वयन नहुनु ।

कांग्रेसको विधानअनुसार केन्द्रीय कार्यसमितिको बैठक दुई–दुई महिनामा बस्नुपर्ने हुन्छ । १४औँ महाधिवेशनपछि नियमित बैठक बसेको भने पहिलो पटक हो ।

शेखर दुई–दुई महिनामा केन्द्रीय समिति बैठक बस्ने व्यवस्थाप्रति असन्तुष्ट छन् । साउन २ गतेको केन्द्रीय समिति बैठकको खाजा ब्रेकमा कोइरालाले भनेका थिए, ‘हाम्रो सभापति र पदाधिकारीलाई भन्दिन पर्‍यो- यो दुई–दुई महिनामा बैठक राखेर के गर्ने, के बोल्ने ? विषय नै हुँदैन । अहिलेको बैठकमा नै कसैले भनिदिए हुन्छ । यो कामै छैन ।'

आफूनिकट २०–२२ जना केन्द्रीय सदस्यको बीचमा उनले भनेको कुरा अर्को पटकको केन्द्रीय समिति बैठकमा संस्थापन पक्षका केन्द्रीय सदस्यले समेत कुरा उठाए । त्यसैले शेखरले यो असोजको केन्द्रीय समिति बैठकमा बोलेनन् ।

नेपाली कांग्रेसका केन्द्रीय सदस्य नारायण खड्काले केन्द्रीय समिति बैठक प्रत्येक दुई-दुई महिनामा बस्ने व्यवस्था व्यावहारिक नभएको बताएका छन् । केन्द्रीय समिति बैठकमा धारणा राख्दै उनले वर्षको कम्तिमा तीन पटक केन्द्रीय समिति बैठक बस्दा उपयुक्त हुने बताए ।

‘दुई महिनामा केन्द्रीय समिति बैठक बस्ने विधानको व्यवस्था छ । त्यो व्यावहारिक हुँदैन । काठमाडौंमा बस्नेलाई ठिकै छ । टाढा बस्नेहरूलाई होटल खर्चलगायतका खर्च बढी पर्छ,’ खड्काले भने, ‘वर्षमा कम्तिमा तीन या चार पटक गर्दा उपयुक्त होला । सधैँ बोल्ने मुद्दाहरू पनि नहोला । महासमिति बैठकमा यस बारेमा कुरा उठ्ला ।’

अर्का केन्द्रीय सदस्य रमेश रिजालले असोजको केन्द्रीय समिति बैठक एजेन्डाबिना बसेको टिप्पणी गरे । विधान संशोधन गर्न उनले माग गरे । ‘दुई–दई महिनामा पुनर्विचार गरौँ बिनाएजेन्डा हामी बसेका छौँ । कम्तिमा चार महिना राखौँ । आवश्यक परे डेढ–दुई महिनामा बस्ने गरौँ । विधान संशोधन गरौँ,’ उनले भने ।

रिजालले बैठक बस्नुभन्दा पनि गरेको निर्णय कार्यान्वयनमा ध्यान दिन महामन्त्रीहरूलाई ध्यानाकर्षण गराए । ‘अघिल्ले केन्द्रीय समितिले गरेको निर्णय कति कार्यान्वयन भए ? त्यो कार्यान्वयन हुन सकेको छैन । त्यसमा महामन्त्रीको ध्यान जाओस्,’ उनले भने ।

विधान कार्यान्वयनमा जटिलता रहेको सहमहामन्त्री बद्री पाण्डेले बताए । तल्ला तहमा बैठक बस्न कोरम समेत नपुग्ने अवस्थाप्रति पाण्डेले नेतृत्वको ध्यानाकर्षण गराए । ‘टोल कार्यसमितिदेखि केन्द्रसम्म आउँदा ८ वटा तह छ । तल कोरम पुर्‍याउन सकिँदैन । ५१ प्रतिशत कोरम पुर्‍याएर बैठक गर्ने प्रावधान राखियो भने बैठक नै बस्न नसक्ने अवस्था छ । २५ प्रतिशतले कोरम पुग्ने व्यवस्था गरेर अर्को अधिवेशनसम्म जानुपर्ने अवस्था छ,’ उनले भने ।

सहमहामन्त्री महेन्द्र यादवले पनि बैठक दुई-दुई महिनामा हुने गरेकोमा असन्तुष्टि जनाए । बोल्नको लागि ५ मिनेटको समय अपुग भएको उनको भनाइ छ । ‘समसामयिक, राष्ट्रिय अन्तर्राष्ट्रिय विषयहरू हुन्छन् बोल्नका लागि । ४ महिनामा मिटिङ होस तर समय १०–१२ मिनेट दिइयोस् । त्यो हुँदा एजेण्डा पनि हुन्छ । पर्याप्त बहस गर्न सकिन्छ,’ उनले भने ।

कांग्रेसले विधानमा भएका जटिलताहरू महासमिति बैठकमार्फत सुल्झाउने भएको छ । मंसिर १३ गतेदेखि १५ गतेसम्म हुने महासमिति बैठकलाई विधान संशोधनको अधिकार दिइएको छ ।

कांग्रेस प्रचार विभाग प्रमुख मीन विश्वकर्मा दुई महिनाको अन्तरालमा हुने केन्द्रीय समिति बैठक धान्न गाह्रो हुने बताउँछन् । ‘केन्द्रीय कार्यसमितिको बैठक छिटो-छिटो हुँदा पार्टीको आन्तरिक र व्यक्तिगत भन्दा बढी राष्ट्रिय राजनीति र आफ्नो भूगोलको विषय उठाउन पाउने भएकाले छिटो भएको राम्रो हो,’ उनले शिलापत्रसँग भने, ‘तर दुई महिनामा भएका बैठक धान्न गाह्रो हुने रहेछ । खासै विषय हुने रहेनछ । आउजाउ धेरै हुने रहेनछ ।’

विधानअनुसार केन्द्रीय समितिको बैठक भएन भन्ने पदाधिकारीहरूले समेत वर्षमा कम्तीमा चारपटक बैठक बस्नुपर्ने बताउन थालेका विश्वकर्माले बताए । ‘अधिकांश केन्द्रीय सदस्य र हिजो विधानबामोजिम बैठक बसेन भन्ने पदाधिकारीहरूले पनि चार महिनामा एकपटक गर्नुपर्छ वा वर्षको तीनपकट कम्तीमा हुनुपर्छ भन्ने छ,’ उनले भने ।

केन्द्रीय सदस्य र पदाधिकारीबाट उठेको कुरा पार्टीको महासमिति बैठकमा समावेश गरिने विश्वकर्माले जानकारी दिए । ‘पार्टीको दैनिक कार्य सञ्चालन र संगठन सुदृढीकरणमा अप्ठ्यारो भए त्यसलाई सामान्य ढंगबाट हेरफेर गर्ने भनिएको छ । त्यहीभित्र रहेर बैठक सञ्चालन कोरम पुर्‍याउने कुरा मनोनित संख्याका कुरामा महासमितिले सम्बोधन गर्छ,’ उनले भने ।

प्रकाशित मिति: मंगलबार, असोज ९, २०८० १६:५५