राजपा राजनीतिः अढाई वर्षमा ६ संयोजक फेरिए, भएन महाधिवेशन

A+ A A-

पार्टी एकीकरणको अढाई बर्षमा राष्ट्रिय जनता पार्टी (राजपा) नेपालमा छ संयोजक परिवर्तन भए । तर, महाधिवेशन भने भएकै छैन ।

तत्कालिन तराई मधेश लोकतान्त्रिक पार्टी, सद्भावना पार्टी, राष्ट्रिय मधेश समाजवादी पार्टी, तराई मधेश सद्भावना पार्टी, मधेशी जनअधिकार फोरम (गणतान्त्रिक) र नेपाल सद्भावना पार्टीबीच ७ बैशाख २०७४ मा एकीकृत भइ राजापा गठन भएको थियो ।

प्रत्येक २ महिनामा चक्रीय प्रणाली अनुसार पार्टी अध्यक्ष मण्डलको संयोजक हुने व्यवस्था अनुसार हालसम्म अध्यक्ष मण्डलका सबै सदस्य संयोजक भइसकेका छन् । अध्यक्ष मण्डलको संयोजकको रुपमा आठ महिनासम्म नेतृत्व दिएका महन्थ ठाकुर सोमबारदेखि फेरि संयोजक हुँदैछन् ।

पार्टी एकीकरण भएको एक बर्षभित्र महाधिवेशन गर्ने घोषणा गरेको राजपामा अध्यक्ष मण्डलको संयोजक हुनासाथ नेताहरुले महाधिवेशनको तयारीमा जुटेको बताउने गरेपनि त्यसले सार्थकता भने पाएको छैन ।

गत वर्ष मंसिरमा महाधिवेशन गर्ने भनी गरिएको घोषणा त्यसपछि चैत, बैशाख हुँँदै पुन कात्तिक २८–३० मा सारिएको छ । चैत मसान्तसम्म पार्टीको सदस्यताका लागि सबै जिल्लामा सदस्यता फारम पठाई सकिएको थियो ।

जिल्लामा पठाएको सदस्यता फारमको सबै विवरण केन्द्रमा भने आइसकेको छैन । केही जिल्लाबाट सदस्यको विवरण आए पनि सबै जिल्लाले पठाई सकेका छैनन् ।

‘सबै जिल्लाले सदस्यता वितरण गरिसकेका छन्, त्यसको विवरण केन्द्रमा आउन मात्र वाँकी छ, एक महिनाभित्रको समयमा स्थानीय, प्रदेश र जिल्लाको अधिवेशन गर्न सकिन्छ,’ महासचिव केशव झाले शिलापत्रसँग भने ।

सदस्यता विवरणको अन्तिम सूची प्रकाशित हुन नसक्दा स्थानीय तह, वडा, प्रदेश निर्वाचन क्षेत्र, संघीय निर्वाचन क्षेत्र, जिल्ला र प्रदेश समिति कुनैको पनि अधिवेशन हुन सकेको छैन ।

चक्रीय प्रणाली अनुसार सोमबारदेखि अध्यक्ष मण्डलको संयोजक पुन महन्थ ठाकुर हुँदैछन् । पार्टी भित्र सिद्धान्त, उदेश्य र कार्यक्रमको हिसावले समानता देखिएको उपेन्द्र यादव नेतृत्वको समाजवादी पार्टीसँग पार्टी एकीकरण गर्ने वा नगर्ने विषयमा अध्यक्ष मण्डलका सदस्यहरु नै विभाजित छन् ।

पार्टी अध्यक्ष मण्डलका ६ सदस्य समाजवादी पार्टीसँग एकीकरण गर्ने पक्ष र विपक्षमा उभिएका कारण राजपा नेपालभित्र किचलो हुँदैआएको छ । नेकपा नेतृत्वको सरकारलाई समर्थन दिँदै आएको राजपाले गत फागुनदेखि समर्थन फिर्ता दिएको थियो ।

प्रकाशित मिति: सोमबार, असोज ६, २०७६ ०३:००