बर्सेनि किन हजारौँ अर्बपतिहरू आफ्नो देश छोड्छन् ? कहाँ जान्छन् ?

A+ A A-

संसारमा हरेक वर्ष अर्बपतिहरू आफ्नो देश छाडेर अर्को देशमा गएर बस्छन् । आफ्नो देशमा बस्नुभन्दा उनीहरू अर्को देशमा गएर आरामको जिन्दगी बाँच्न खोज्छन् । अर्बपतिहरूको माइग्रेसनबारे अध्यन गर्ने हेनले प्राइभेट वेल्थ माइग्रेसन रिपोर्टअनुसार यसरी आफ्नो देश छाडेर अर्को देशमा जाने अर्बपतिहरूमा चिनियाँ सबैभन्दा धेरै छन् ।

२०२३ मा १३५०० चिनियाँ अर्बपतिहरू आफ्नो देश छोडेर अर्को देशमा जाने अनुमान गरिएको छ । २०२२ मा १०८०० चिनियाँ अर्बपतिहरूले चीन छोडेका थिए । आफ्नो देश छोडेर अर्को देश जाने अर्बपतिहरूको दोस्रो सूचीमा भारतीयहरू छन् । प्रतिवेदनअनुसार २०२३ मा ६५०० भारतीय अर्बपतिले देश छोड्ने अनुमान गरिएको छ । गत वर्ष यसरी भारत छोडेर अर्को देशमा जाने भारतीय अर्बपतिहरूको संख्या ७ हजार थियो ।

यसरी आफ्नो देश छोड्नेको सूचीमा बेलायत तेस्रो नम्बरमा छ । २०२३ मा ३२०० बेलायती अर्बपतिहरूले देश छोड्ने अनुमान छ । यस्तै चौथो नम्बरमा रहेको रुसबाट यो वर्ष ३ हजारले देश छोड्ने अनुमान छ ।

यसरी अर्बपतिहरूले देश छोड्नुलाई चिन्ताको विषय मान्नुनपर्ने प्रतिवेदनमा औंल्याइएको छ । किनकी २०३१ सम्म ८० प्रतिशतसम्म अर्बपतिहरूको संख्या बढ्ने अनुमान गरिएको छ । यो अवधिमा सूचना प्रविधि, वित्तीय सेवा र फार्मा क्षेत्रका व्यवसायीले मनग्य कमाउने अनुमान गरिएको छ ।

किन छोड्न छन् देश ?

यसरी अर्बपतिहरूले देश छोड्नुमा धेरै कारण भए पनि त्यो देशको कर प्रणाली प्रमुख कारण मानिएको छ । भारतमा करप्रणाली निकै जटिल भएकाले भारतीय अर्बपतिहरूले देश छोड्ने गरेको भारतीय विज्ञहरूले बताएका छन् ।

संसारभरका अर्बपतिहरूको रोजाइको मुलुकहरूमा अस्ट्रेलिया, दुबई, सिंगापुर जस्ता देशहरू रहेका छन् । सबैभन्दा धेरै अर्बपतिहरू अस्ट्रेलिया जान चाहन्छन् । किनकी त्यहाँको सुरक्षा व्यवस्था, तटीय क्षेत्र, मौसम र विकासले उनीहरूलाई आकर्षित गरेको हुन्छ ।

प्रतिवेदनअनुसार बेलायत, रूस, ब्राजिल, हङकङ, दक्षिण कोरिया, मेक्सिको, दक्षिण अफ्रिका, जापान, भियतनाम, नाइजेरियालगायतका देशहरूबाट गत वर्षभन्दा धेरै अर्बपतिहरू पलायन हुने अनुमान छ ।

उता अस्ट्रेलिया, यूएई, सिंगापुर, अमेरिका, स्विट्जरल्यान्ड, क्यानाडा, ग्रीस, फ्रान्स, पोर्चुगल, न्यूजील्यान्ड र इटलीमा गत वर्षभन्दा धेरै अर्बपतिहरू आउने अनुमान छ ।

प्रकाशित मिति: आइतबार, असोज ७, २०८० ०९:४८