कांग्रेस केन्द्रीय समितिमा चिन्ता : यही हालतमा २०८४ सालको चुनावमा गयौँ भने के होला ?

कांग्रेस केन्द्रीय समितिमा चिन्ता : यही हालतमा २०८४ सालको चुनावमा गयौँ भने के होला ?

A+ A A-

नेपाली कांग्रेसको केन्द्रीय समिति बैठको दोस्रो दिनमा २०८४ सालको चुनावलाई लिएर नेताहरू चिन्तामा रहेको देखिएकाे छ । २०८४ सालको चुनावभन्दा पार्टीभित्रको अन्तरविरोध कम गर्नुपर्नेमा नेताहरूको जोड थियो ।

केन्द्रीय सदस्य गेहेन्द्र गिरीले वर्तमान अवस्थामा मिसन २०८४ सफल नहुने बताए । युवा पलायन भएकोमा उनको चिन्ता थियो ।

‘यस्तै अवस्था हो भने मिसन ०८४ सफल हुन सक्दैन । बिरुवालाई जीवन्त रहन हाँगा, जरा जीवित रहनुपर्छ । आज रुट युवाहरू पलायन भएर गइरहेका छन्,’ उनले भने, ‘बेलैमा समाधान गर्न सकेनौँ भने २०८४ हाम्रो पक्षमा आउँदैन । फेरि पनि कोलिसन गरेर चुनाव लड्नुपर्ने देख्दछु ।’

अर्का केन्द्रीय सदस्य उमा रेग्मीले पार्टीभित्रको बेमेलले २०८४ सालमा हालत राम्रो नहुने बताइन् ।

‘०८४ सालमा चुनावमा गयौं भने हाम्रो हालत के होला ? गुटलाई अन्त्य गर्नुहोस् मेरो आग्रह छ । आफूभित्रको बेमेल राखेर जति गठबन्धन गरे पनि केही हुँदैन । गलत बुझे माफी चाहान्छु,’ उनले भनिन् ।

केन्द्रीय सदस्य तथा महिला विभाग प्रमुख पुष्पा भुसालले आगामी चुनावमा ३३ प्रतिशत महिला वडाध्यक्ष उम्मेदवार बन्न पाउनुपर्ने बताइन् ।

‘निर्वाचनसम्बन्धी कानुनको मस्यौदा बनेको छ । आगामी स्थानीय सरकारमा ३३ प्रशित महिला वडाध्यक्ष उठाउनुपर्छ भनेको छ । कुनै पनि दल यसबाट पछि हट्न मिल्दैन,’ उनले भनिन् ।

माओवादीले विभेद गर्‍याे

जारी बैठकमा नेताहरूको अर्को चिन्ताको विषय थियो माओवादीले विभेद गर्‍याे भन्ने । केन्द्रीय सदस्य देवेन्द्रराज कँडेलले सुन काण्डमा विभेद भइरहेको बताए ।

‘सुन काण्डमा विभेद भइरहेको छ । हामी सरकारमा छौं । बाउ र छोरालाई कारबाही नगर्ने अरु राजनीतिक दलहरूलाई पूर्वाग्राही हिसाबले व्यवहार भैरहेको छ । यसले राम्रो सन्देश दिएरहेको छैन । हामी सचेत हुनुपर्छ,’ उनले भने ।

केन्द्रीय सदस्य अजयबाबु शिवाकोटी पनि माओवादीले नेता कृष्णबहादुर महराका बाउछोरा बचाएको प्रति असन्तुष्ट देखिए । उनले सरकारले भुटानी शरणार्थी प्रकरणको छानबिनमा अग्रसरता लिए पनि आफ्ना पार्टीको नाम जोडिएका प्रकरणमा छानबिन नगरेको आरोप लगाए ।

‘शरणार्थी प्रकरणमा सरकार र गृह मन्त्रालयले जुन तदारुकता देखायो । सुन काण्डमा आफ्नो दलका नेताहरू सहभागी भएको देखिएपछि माओवादीले अनेक बहानामा कृष्णबहादुर महरामाथि छानबिन गरेन,’ उनले भने ।

रास्वपा देखाउँदै जिल्ला समिति विघटनको माग

केन्द्रीय सदस्य कँडेलले जिल्ला कार्यसमिति विघटन गर्न माग गरे । उनले जिल्ला समिति विघटन नगरिए आफूहरू घण्टी लिएर घाट र मन्दिरमा गएर बस्नुपर्ने अवस्था आउने बताए ।

‘जिल्लाको समिति पूरै घण्टीको कब्जामा गइरहेको छ । म यही भन्छु जिल्ला कार्यसमितिलाई विघटन गर्नुस् । होइन भने आउने दिनमा विस्तारै विस्तारै हामी पनि घण्टी लिएर कुनै घाटमा, मन्दिरमा गएर बस्नुपर्ने स्थिति आउँछ,’ उनले भने, ‘त्यसकारण सचेत हुनुस् । अब प्लिज गुटको नाममा आश्वासन नदिनुस् । महिला संघमा जुन महिलालाई प्रस्ताव गरिएको छ उसले भोट हालेनन् ।’

उनले बोलिहँदा सभापति शेरबहादुर देउवाले अनुशासन समितिमा कुरा राख्न सुझाए । ‘अनुशासन समितिमा राख्नुस्,’ उनले भने । जवाफमा कँडेलले शीर्ष नेताको कुरा मिले जे पनि हुने बताए ।

‘म पनि समितिमा थिएँ । हाम्रा पूर्व वरिष्ठ नता रामचन्द्र दाई (राष्ट्रपति रामचन्द्र पौडेल पार्टी राजनीतमा रहँदा) र शेरबहादुर दाईको कुरा मिलेपसिछ सबैकुरा मल्ने रहेछ,’ उनले भने ।

लाइभ सधैँ नगरियोस्

केन्द्रीय सदस्य राजीव कोइरालाले पार्टी पदाधिकारी र केन्द्रीय सदस्यको निर्मम आलोचना गर्नुपर्ने भएकाले सधैँ बैठक लाइभ गर्नु उचित नरहेको उनले बताए । बैठक लाइभ गर्नु लोकप्रियताको लहर रहेको उनले बताए ।

‘लाइभ गर्नु भनेको लोकप्रियताको लहर हो । पार्टीका पदाधिकारीहरूको निर्मम आलोचना गर्नुपर्ने हुन्छ । केन्द्रीय सदस्यको पनि अनुशासनलगायतका विषयमा निर्मम भएर आलोचना गर्नुपर्ने हुन्छ । अवस्था हेरेर लाइभ गरियोस्,’ उनले भने ।

कोइरालले संस्थापनइतर समूहका नेता डा शेखर कोइरालाको बस्ने ठाउँ कहाँ हो भनेर प्रश्न गरे । उनले शेखरको बस्ने ठाउँ सुरक्षित गर्न सभापति शेरबहादुर देउवालाई आग्रह गरे ।

‘आदरणीय नेता शेखर कोइरालाको बस्ने ठाउँ कहाँ हो ? उहाँ जहिले पनि नेपथ्यमा बसिरहनुभएको देख्दछु म । सभापतिसँग आग्रह छ उहाँको स्थानलाई सुरक्षित गरियोस् । अझ फ्रन्ट लाइनमा दिइयोस् भन्न चाहान्छु,’ उनले भने ।

संसदमा उपस्थित हुन प्रमुख सचेतकको आग्रह

प्रतिनिधिसभामा प्रमुख सचेतक रमेश लेखकले पार्टीका सांसदहरूलाई संसद बैठकमा उपस्थित हुन आग्रह गरे । उनले संसद बैठकमा गणकपुरक संख्या नपुगेर बैठक स्थगित हुनु पार्टीका लागि उचित नभएको बताए ।

‘हाउसमा उपस्थिति अत्यन्तै कमजोर हुने गरेको छ । कति पटक त कोरम नपुगेर हाउस स्थगित हुने गरेको छ । हामी सबै जिम्मेवार छौं । अनि बैठकमा गणकपुरक संख्या नपुग्नु कांग्रेसका लागि उचित होइन । मेरो आग्रह के माननीयहरू के छ भने दलमा पनि आग्रह गराैँला बैठकमा कमसेकम गइदिनुपर्‍याे,’ उनले भने, ‘एउटा कार्य अनिवार्य रुपमा गर्दिनुपर्‍याे । कायसूची हेर्दिनुस् । कुनै पनि विषय निर्णयार्थ प्रस्तुत गर्ने भनेपछि मतदान हुन्छ । त्यो दिन अन्तिमसम्म बैठकमा बसिदिनुहुन आग्रह गर्छु ।’

आजको बैठकमा ४५ जना केन्द्रीय सदस्यहरु— ज्ञानेन्द्रबहादुर कार्की, उमा रेग्मी, जीपछिरिङ लामा, मानबहादुर विश्वकर्मा, पद्मनारायण चौधरी, दिलेन्द्रप्रसाद बडू, जीवनबहादुर शाही, अजयकुमार चौरसिया, पुष्पा भुसाल, मीनबहादुर विश्वकर्मा, ईश्वरी न्यौपाने, मोहनबहादुर बस्नेत, देवेन्द्रराज कँडेल, डा. डिला संग्रौला, रमेश लेखक, बहादुरसिंह (लामा) तामाङ, डा. गोपाल दहित, योगेन्द्र चौधरी, यज्ञराज जोशी, किरणराज शर्मा पौडेल, गेहेन्द्र गिरी, तारामान गुरुङ, आङ्गेलु शेर्पा, मधु आचार्य, राजीव कोइराला, चन्द्रबहादुर के.सी., मानबहादुर नेपाली, उमेशजंग रायमाझी, जीतजंग बस्नेत, गोविन्दबहादुर शाह, डा. रणबहादुर रावल, दिलमान पाख्रिन, डा. चन्द्रमोहन यादव, मुक्ताकुमारी यादव, गुरु बराल, जावेदा खातुन जागा, प्रा.डा. गोविन्दराज पोखरेल, नागिना यादव, नानु बास्तोला, अजयबाबु शिवाकोटी, भरतकुमार शाह, सीता थपलिया (उर्मिला), लक्ष्मी खतिवडा, सितादेवी देवकोटा र शारदा पौडेलले ले आ–आफ्नो धारणा राखेका थिए ।

प्रकाशित मिति: शुक्रबार, असोज ५, २०८० १९:१३