डाक्टरकाे लापरबाहीले ओम अस्पतालमा फेरि बिरामीको मृत्यु, यस्ताे छ शृंखला

A+ A A-

ओम अस्पतालमा पत्थरीका सामान्य बिरामी भर्ना हुने र शल्यक्रियापछि मृत्यु हुने शृंखला रोकिएको छैन । डाक्टरको लापरबाहीले शनिबार मात्र फेरि धादिङकी गंगाजमुना गाँउपालिकाकी २९ वर्षीया अनिता गुरुङको पत्थरीको शल्यक्रियापछि मृत्यु भएको छ ।

अनिताको मृत्यु प्रकणले अहिले अस्पताल तनावग्रस्त बनेको छ । शुक्रबार पत्थरीको उपचार गर्न हिँडेरै अस्पताल पुगेकी अनिताको डाक्टरहरूको लापरबाहीले मृत्यु भएको भन्दै आफन्तले विरोध गरेका छन् ।

अनिताका देवर शेरबहादुर गुरुङका अनुसार अस्पतालले सामान्य शल्यक्रिया गर्ने भनेर बताए पनि डाक्टरहरूले लापरबाहीपूर्ण तरिकाले शल्यक्रिया गर्दा आफ्नो भाउजूको मृत्यु भएको दाबी गरे ।

‘यो हाम्रो घटना मात्र होइन, सामान्य अपरेशन भनेर अपरेशन गर्ने र मान्छेको ज्यान जाने गरेर अरु घटना पनि यही अस्पतालमा भएका छन् । यो अस्पतालको लापरबाही हो, हामी यसबारे अपरेशन गर्ने डाक्टरलाई कारबाहीको माग गरिरहेका छौं,’ गुरुङले भने ।

अस्पतालसँग भाउजूको मृत्युबारे छलफल भइरहेको छ, माग पूरा नभए अर्को बाटो रोज्ने शेरबहादुरले बताए । अनिता गुरुङको मृत्यबारे अस्पतालसँग सम्पर्क गर्न खोज्दा सूचना अधिकारी मात्र बोल्ने भने पनि सूचना अधिकारी विनोद अधिकारीले आफू ब्यस्त रहेको भन्दै तर्किए ।

यस्तो छ, पत्थरीको शल्यक्रियापछि मृत्यु हुनेको शृंखला

शृंखला– १

१९ साउन २०७४ मा गोरखा आरुघाटकी ५० वर्षीया नन्दकुमारी लामिछाने पत्थरीको उपचारका गर्न ओम अस्पताल पुगिन् । चाबाहिलमै बस्दै आएकी उनी नजिकै भएका कारण बिहान हिँडेरै ओम अस्पतालमा भर्ना भएकी थिइन् । तर, शल्यक्रिया गरेकै राति उनको निधन भयो ।

बिहान हिँडेर अस्पताल पुगेकी बिरामी नन्दकुमारीको शल्यक्रिया भएपछि मृत्यु हुनुलाई डाक्टरको लापरवाही भन्दै लामिछानेका आफन्तले अस्पताल परिसरभित्र प्रदर्शन र नारा जुलुस गरेका थिए ।

शृंखला– २

२९ भदौ २०७४ मा पिनासको शल्यक्रिया गर्न बुटवल शंकरनगरकी ३७ वर्षीया कमला भट्टराई पनि ओम अस्पताल भर्ना भइन् ।

बुटवलबाट काठमाडौं घुम्न श्रीमानसहित आएकी भट्टराई त्यही मौकामा कहिलेकाहीँ पिनासका कारण हुने दुःखलाई निको पार्क उनी ओमअस्पताल पुगेकी थिइन् । तर, डाक्टरले भर्ना भएर शल्यक्रिया नै गर्नुपर्ने सुझाएपछि उनी भर्ना भएकी थिइन् ।

भर्ना भएको दुई दिनपछि उनको शल्यक्रिया गरियो । शल्यक्रिया गरेपछि निको भइने र घर फर्किने उनको आशा थियो । तर, शल्यक्रिया गरेको दुई दिनपछि उनको मृत्यु भयो ।

भट्टराईका आफन्तले चिकित्सकको लापरबाहीका कारण मृत्यु भएको भन्दै अस्पतालमा नाराबाजी गरे । प्रदर्शनमा उत्रेका भट्टराईका आफन्तले अस्पतालमा सामान्य तोडफोडसमेत गरे । प्रहरीले लाठीचार्ज गर्दा केही घाइेतसमेत भएका थिए ।

शृंखला– ३

३० जेठ २०७६ मा ओम अस्पतालमा उपचारका क्रममा सिन्धुपाल्चोककी रामप्यारी थापाको मृत्यु भयो । पित्तथैलीको पत्थरीको शल्यक्रिया गर्न अस्पताला पुगेकी उनी घर फर्किन पाइनन् ।

शल्यक्रिया गरेको ६ दिनपछि उनको मृत्यु भएको थियो । थापाका आफन्तले डाक्टरको कमजोरीका कारण उनको मृत्यु भएको भन्दै अस्पतलामा नाराबाजी गरेका थिए । त्यही क्रममा प्रहरीसँग झडपसमेत भएको थियो ।

प्रकाशित मिति: सोमबार, असोज ६, २०७६ ००:३२