कांग्रेस बैठक: पहिलाे दिन केन्द्रीय सदस्य मनाेनयन र शिक्षक आन्दाेलनमा केन्द्रित

कांग्रेस बैठक: पहिलाे दिन केन्द्रीय सदस्य मनाेनयन र शिक्षक आन्दाेलनमा केन्द्रित

A+ A A-

बिहीबार सभापति शेरबहादुर देउवाले आफूले गरेको कामबारे प्रस्टीकरण दिएर कांग्रेस केन्द्रीय कार्यसमिति बैठक सुरु गरे । निर्धारित समयभन्दा डेढ घण्टा सुरु बैठक अघि सभापति देउवाले ८ जना केन्द्रीय सदस्य मनोनीत गरेका थिए ।

बैठकमा सभापति देउवाले केन्द्रीय सदस्यमा पर्न नसकेका नेताहरूलाई महासमिति सदस्यमा मनाेनीत गरिने बताए । उनले महासमितिमा ठाउँ खाली गरेर नियुक्ति दिने भन्दै नेताहरूलाई नाम दिन आग्रह गरे ।

‘केन्द्रीय कार्यसमितिमा केही साथीहरूलाई मनोनीत गरिएको छ । ठाउँ कम छ, त्यसैले धेरै साथीहरू छुट्नुभएको छ, छुटेका नामहरू तपाइँहरूले पनि भन्नुहोला, महासमिति सदस्यमा अरू साथीहरूलाई अटाउँला र छुटेका नामहरू साथीहरूले दिनुहुनेछ,’ सभापति देउवाले बैठकको सुरुमा भने ।

सभापतिको प्रस्टीकरणपछि बैठकमा प्रस्टीकरण दिने पालो आयो कोशी प्रदेश सभापति उद्धव थापाको । मुख्यमन्त्रीमा उनले लिएको विश्वासको मत असंवैधानिक रहेको सर्वोच्च अदालतले ठहर गर्दै उनलाई पदमुक्त गरेकाे थियाे ।

थापाले याे विषयमा बैठकमा प्रस्टीकरण दिँदै भने, ‘हामीले विश्वासको मत लिएका थिएनौँ भने उपधारा ३ अनुसार एमाले नेतृत्वमा सरकार बन्थ्यो । हामीसँग स्पष्ट बहुमत छ,’ उनले बैठकमा भने ।

उनले आफूले विश्वासकाे मत लिँदा प्रदेशसभा बैठकको अध्यक्षता गर्ने व्यक्ति अस्थायी रहेको तर्क गरे । ‘अध्यक्षता ग्रहण गरेका व्यक्ति अस्थायी हुनुहुन्थ्यो स्थायी सभामुख चुनिन बाँकी हुनुहुन्थ्यो । सभामुखको शपथ ग्रहण गरेको छैन । सभामुखको सेवा सुविधा पनि लिएको छैन,’ थापाले भने, ‘जसले अध्यक्षता गरेको छ, उसलाई दलीय ह्वीप लागेको छ । मतदान गर्न पाउँछन् भन्ने कुरा कानुनी सल्लाहकारसँग परामर्श गरेका थियौँ ।’

दुईपटकसम्म संविधान उलंघन गरेको भन्दै कोशीमा संसदीय दलको नेता परिवर्तन गर्न कांग्रेस नेतृत्वलाई दबाब छ । कृष्णप्रसाद सिटौलानिकट नेता थापालाई संस्थापन र शेखर-गगन समूहबाट दलको नेता परिवर्तन गर्न दबाब छ । संविधानका बारेमा खेलाँची गरेको आरोप थापामाथि छ ।

त्यसपछि सरकारको तर्फबाट पार्टीलाई आश्वस्त पार्ने पालो आयो पार्टी उपसभापति तथा उपप्रधानमन्त्री पूर्णबहादुर खड्काको । उनले बैठकमा शिक्षकहरूसँग सरकारले गरेका सहमतिबाट पछि नहट्ने बताए ।

शिक्षक महासंघले अहिले राखेका मागमध्ये कतिपय शिक्षा नियमावलीमै समावेश गर्नुपर्ने खालका रहेको समेत बताए । ‘शिक्षा नियमावलीमा राख्नुपर्ने बाँकी छन् । त्यो विषयमा उहाँहरूसँग छलफल र वार्ता गरेर यी–यी विषय हामी शिक्षा नियमावलीमा सम्बोधन गर्छौं भनेर भन्न सकिन्छ,’ उनले भने ।

माहासंघको निजमती सेवासरहको पेन्सनको सवालमा २०७६ सालदेखि लागू हुनेगरी भनेर शिक्षा मन्त्रालयले परिपत्र गर्नेवित्तिकै कार्यान्वयनमा जाने कार्यबहाक प्रधानमन्त्रीकाे जिम्मेवारीमा समेत रहेका खड्काले बताए । ‘यो पनि उहाँहरूको माग छ । यसमा पनि हामीले सल्लाह गरेका छौँ, यसमा कुनै समस्या छैन’, खड्काले भने, ‘बीचमा उहाँहरू छलफलमा बस्नुभएको भए धेरै कुरा क्लियर हुन्थ्यो । उहाँहरूले पनि भन्न पाउनुहुन्थ्यो ।’

उनले मुलुकको अर्थतन्त्रले तत्काल धान्न नसक्ने कुरा, आर्थिक बोझ हुने कुरा र संविधानले गरेको व्यवस्थाको प्रतिकूल हुने कुरामा सरकार त्यो ठाउँमा पुग्न नसक्ने बताए । ‘बाँकी कुरा खुला छलफल गरौँ, कति ऐनमा आऊला, कति नियमावलीमा आऊला, कति कार्यविधि र कति परिपत्रमा आऊला यो कुरा पहिला पनि भनेको हो । अहिले पनि त्यही कुरा खुला हृदयले कुरा भएको छ र आजबाट उपप्रधानमन्त्री तथा गृहमन्त्रीको नेतृत्वमा छलफल सुरु भएको छ । समाधान गर्न सरकारले अग्रसरता लिइरहेको छ,’ खड्काले ब्रिफिङ गरे ।

विभागले पाएन नेतृत्व

साउन २ गतेदेखि १० गतेसम्म भएको अघिल्लोपटकको केन्द्रीय समिति बैठकले भदौ १५ भित्र सबै विभागहरूलाई पूर्णता दिने निर्णय गरेको थियो । हालसम्म १६ वटा विभागको मात्र संयोजक तोकिएको महामन्त्री गगन थापाले बताए ।

‘अहिले हाम्रो विधानमा नै व्यवस्था भएअनुसार ७० वटा विभाग बनेका छन् । त्यसमा १६ वटा मात्र विभागको संयोजक तोकिएको छ । बाँकी रहेका अन्य विभागहरूमा भने हामी छिट्टै पूर्णता दिनेछौँ,’ महामन्त्री थापाले प्रस्टीकरण दिए ।

महामन्त्री थापाले प्रदेश समितिको विषयमा आवश्यक निर्णयहरू गर्न प्रदेश समितिलाई प्रतिवेदन आगामी ७ गतेभित्र बुझाउनसमेत आग्रह गरे । यसअघि साउनमा बसेको बैठकले आगामी मंसिर ११, १२ र १३ गते महासमितिको बैठक बस्ने निर्णय गरिसकेको छ । त्यसअघि नै केन्द्रीय समिति बैठक बसेर महासमिति बैठक गर्ने निर्णय गरेको महामन्त्री थापाले आजको बैठकमा जानकारी दिए ।

दुई जना मनाेनीत गर्न बाँकी

कांग्रेस केन्द्रीय समितिमा १६८ सदस्यीय हुने व्यवस्था छ, जसमा १३४ जना महाधिवेशनबाट प्रत्यक्ष निर्वाचित भएर आउँछन् भने ३३ जना सभापतिले मनोनीत गर्छन् । देउवाले किस्ताकिस्तामा ३१ जना केन्द्रीय सदस्य मनोनीत गरेका छन् । देउवाले अझै २ जना केन्द्रीय सदस्य मनोनीत गर्न बाँकी छ ।

देउवाले बिहीबार कांग्रेसको विधान, २०१७ (संशोधनसहित) को धारा २१ को उपधारा (१०) बमोजिम मनोनीत गरेका छन् ।

केन्द्रीय सदस्यहरू

मानबहादुर विश्वकर्मा (अर्घाखाँची)

अर्जुनप्रसाद जोशी (पर्वत)

डा. चन्द्र भण्डारी (गुल्मी)

शिवप्रसाद हुमागाई (काभ्रेपलाञ्चोक)

किरणराज शर्मा पौडेल (बाग्लुङ)

भरतकुमार शाह (रुपन्देही)

शारदा पौडेल (कास्की)

अनिलकुमार रुंगटा (पर्सा)

कांग्रेस केन्द्रीय समितिको बैठक शुक्रबार ११ बजेबाट सुरु हुनेछ ।

प्रकाशित मिति: बिहीबार, असोज ४, २०८० १९:१०