एमाले बागमती अधिवेशनः अध्यक्षमा आकांक्षीको लर्को, दाहाल र ढुंगेलबीच कडा टक्करको संकेत

एमाले बागमती अधिवेशनः अध्यक्षमा आकांक्षीको लर्को, दाहाल र ढुंगेलबीच कडा टक्करको संकेत

A+ A A-

नेकपा एमालेको पहिलो बागमती प्रदेश अधिवेशन ४ दिनपछि सुरु हुँदै छ । काठमाडौंको भृकुटीमण्डपमा ८-९ असोजमा हुने अधिवेशनका लागि साढे १२ सयभन्दा बढी प्रतिनिधिको छिनोफानो लागिसकेको छ ।

पार्टी अध्यक्ष केपी शर्मा ओलीको चाहना सर्वसम्मतिबाट नेतृत्व चयन होस् भन्ने छ । अध्यक्षमा भने पाँच जना आकांक्षी छन् । पाँच जना नेतृत्वका आकांक्षीमध्येबाट पनि दुई जनाको कडा टक्कर हुने देखिन्छ । कारण हो, अध्यक्ष ओलीका दुई विश्वास पात्रले दुई जनालाई हातमा लिनु ।

एमाले बागमती प्रदेश कमिटी २ सय २० सदस्यीय बन्नेछ, जसमा ५ जना पदाधिकारी टिम हुनेछ । अध्यक्ष, उपाध्यक्ष, सचिव, दुई उपसचिव गरी २ सय २० जनाको प्रदेश कमिटी बन्ने हालका उपसचिव तथा प्रचार विभाग प्रमुख महेशकुमार बर्तौलाले जानकारी दिए । उनले प्रतिनिधि छनोट भइसकेको भन्दै अधिवेशनको तयारी अन्तिम चरणमा रहेको बताए ।

एमाले बागमती प्रदेश कमिटी अध्यक्ष बन्न मकवानपुरका कृष्णप्रसाद दाहाल, रामेछापका कैलाश ढुंगेल, काठमाडौंका सानुकुमार श्रेष्ठ, दोलखाकी रचना खड्का र नुवाकोटका केशव पाण्डेको दौडधुप छ । नुवाकोटका पाण्डे वर्तमान पार्टी प्रदेश कमिटी अध्यक्ष छन् । दौडमा खड्का र पाण्डेको पछिपछि दाहाल, ढुंगेल र श्रेष्ठ अघिअघि रहेको नेताहरू बताउँछन् ।

प्रदेश अध्यक्ष कार्यकारी पद रहेकाले पार्टी पोलिटब्युरो सदस्यदेखि केन्द्रीय सदस्यहरूको चासो थियो । यसअघि अध्यक्षमा पोलिटब्युरो सदस्य भक्तपुरका महेश बस्नेत, सिन्धुपाल्चोकका अरुण नेपाल, धादिङका खेम लोहनी, रामेछापका कैलाश ढुंगेल, मकवानपुरका कृष्ण दाहाल, चितवनका कृष्णभक्त पोखरेल, विजय सुवेदी र दोलखाकी रचना खड्कालगायतको नाम चर्चामा थियो । विगतमा सांसद भएर मन्त्री भइसकेका र हाल कार्यकारी पदमा नरहेका कारण अध्यक्षमा चर्चा थुप्रैको थियो ।

अधिवेशन नजिकिँदै जाँदा मकवानपुरका दाहाल, रामेछापका ढुंगेल र काठमाडौंका श्रेष्ठबीच प्रतिस्पर्धा बढेको एमाले प्रदेश कमिटीका एक पदाधिकारीले बताए । यी तीन जनामध्ये पनि दाहाल र ढुंगेलबीच कडा टक्कर हुने संकेत देखिएको छ । अध्यक्ष ओलीका विश्वास पात्र मानिएका महेश बस्नेत र गोकुल बाँस्कोटाले क्रमशः ढुंगेल र दाहाललाई हातमा लिएर निर्वाचनमा होमिने चर्चा एमालेभित्र छ ।

पार्टी केन्द्रीय सदस्यसमेत रहेका दाहाल मकवानपुरको प्रतिनिधिसभा क्षेत्र नम्बर १ बाट २०४६ सालयता निरन्तर निर्वाचित जनप्रतिनिधि हुन् । ४ मंसिर २०७९ मा भएको निर्वाचनमा भने उनी उम्मेदवार बनेनन् । प्रतिनिधिसभाको अघिल्लो कार्यकालमा उनी अर्थ विकास समितिका सभापति थिए । उनीसँग पार्टी जिल्ला कमिटीको नेतृत्व गरेकोदेखि लामो समय केन्द्रीय कमिटीमा बसेर काम गरेको अनुभव छ । ढुंगेल प्रदेशसभाको अघिल्लो कार्यकालमा आर्थिक मामिला तथा योजनामन्त्री थिए ।

विगतमा पटक-पटक निर्वाचनमा पराजित भएका ढुंगेल प्रदेशसभामा विजयी भएसँगै पहिलोपटकमै मन्त्री बनेका थिए । ढुंगेल रामेछापका पूर्वजिविस सभापति पनि हुन् । ढुंगेल ४ मंसिर २०७९ मा प्रतिनिधिसभा निर्वाचन लडेको र कांग्रेसका पूर्णबहादुर तामाङसँग १६ हजारभन्दा बढी मतान्तरले पराजित भएका थिए । काठमाडौंका श्रेष्ठ बागमती प्रदेशको पहिलो कार्यकालका सभामुख थिए । श्रेष्ठ पनि गत मंसिरमा भएको निर्वाचनमा मुख्यमन्त्री हुने दाउका साथ पुनः प्रदेशसभा निर्वाचन लडेका थिए । तर, उनी राप्रपाका उम्मेदवारसँग पराजित भएका थिए ।

नुवाकोटका पाण्डे यसअघि बागमती प्रदेश सांसद हुँदै छोटो समय आन्तरिक मामिला तथा कानुनमन्त्री बनेका थिए । खड्का पनि प्रदेशसभाको पहिलो कार्यकालमा तीन महिने आर्थिक मामिला तथा योजनामन्त्री बनेकी थिइन् । शिलापत्रसँग कुराकानी गर्दै केन्द्रीय सदस्यसमेत रहेकी खड्काले आफू अध्यक्षको आकांक्षी भएको बताइन् । तर, खड्का गृहजिल्लाबाट अधिवेशन प्रतिनिधि भन्ने बनेकी छैनन् । उनले प्रतिनिधि मनोनीत हुन बाँकी रहेको र आफू विभिन्न भूमिकाभित्र रहेकाले प्रतिनिधि बन्न असहज नभएको बताइन् ।

‘भूगोल, युवा र महिलाको नेतृत्वलाई हेरेर मेरो दाबी रहन्छ । छलफलमा प्रवेश गरेपछि आफ्नो दाबी राख्छु । धेरै जोड भने गर्दिनँ’, उनले भनिन् । खड्काले बागमतीमा पार्टी कमजोर रहेको र यसलाई जुरुक्कै उठाउन सक्ने गरी नेतृत्व आउनुपर्ने बताइन् । पार्टी प्रदेश कमिटीको नेतृत्व नयाँलाई दिनुपर्ने उनको जोड छ ।

पहिलो अधिवेशनबाट बन्ने पार्टी कमिटीबारे नेतादेखि कार्यकर्तामा तीव्र चासो छ । राजनीतिको केन्द्र मानिने बागमती प्रदेशकै कमिटीलाई लिएर देशभरका नेता-कार्यकर्तामा चासो हुनु स्वाभाविक हो । बागमतीको नेतृत्व निर्वाचन वा सर्वसम्मति कसरी हुन्छ भन्ने चासो देखिन्छ । पार्टी नेतृत्वले सर्वसम्मत चाहँदा पनि लुम्बिनी प्रदेशको पार्टी अधिवेशनले निर्वाचनबाट अध्यक्ष बनाएको थियो । बागमतीमा पनि सर्वसम्मत वा निर्वाचन भन्ने विषय अझै टुंगिसकेको छैन ।

प्रतिनिधिसभामा एमाले सचेतकसमेत रहेका पार्टी प्रदेशका उपसचिव बर्तौलाले सर्वसम्मतिबाटै नेतृत्व चयन हुने दाबी गरे । ‘अन्य पदाधिकारीमा के-के हुन्छ अहिले भन्न सकिँदैन । अध्यक्षमा चाहिँ सर्वसम्मति नै हुन्छ,’ बर्तौलाले भने, ‘निर्वाचनमा जाँदा धार देखिने र गुटबन्दी हुने देखियो । त्यसैले सर्वसम्मतिबाटै अध्यक्ष चयन हुनेमा कुनै शंका छैन ।’ लुम्बिनीमा निर्वाचन भए पनि बागमतीबाट सर्वसम्मतिमा नेतृत्व चयन गर्ने सन्देश जाने उनको ठोकुवा छ ।

साढे १२ सय प्रतिनिधिको छिनोफानो

अधिवेशनका लागि प्रतिनिधि छनोटको काम सकिएको छ । अन्तिममा ललितपुरको प्रतिनिधि छनोट सकिएसँगै १३ वटै जिल्लाबाट प्रदेश कमिटीमा प्रतिनिधिको सूची आइसकेको छ ।

एमाले प्रदेश कमिटीका अनुसार अधिवेशनमा सबैभन्दा बढी प्रतिनिधि काठमाडौंका १ सय ३२ छन् । काभ्रेबाट १ सय २५ र मकवानपुरबाट १ सय ६ जना प्रतिनिधि छनोट भइसकेका छन् । धादिङबाट ८७, दोलखाबाट ६५, रसुवाबाट २७, सिन्धुपाल्चोकबाट ६४, रामेछापबाट ८१, नुवाकोटबाट ६४, ललितपुरबाट ५०, भक्तपुरबाट ६६, सिन्धुलीबाट ६६ र चितवनबाट ८५ जना प्रतिनिधि छनोट हुँदा एक हजार १ सय १३ जना प्रतिनिधिको छिनोफानो भएको हो । जनवर्गीय संगठनहरूबाट ९५ जना प्रतिनिधि थप हुँदा १ हजार २ सय ८ जना प्रतिनिधि अधिवेशनमा सहभागी हुनेछन् ।

यसैगरी, अधिवेशनका लागि प्रदेश कमिटीबाट ५ प्रतिशत प्रतिनिधि मनोनीत हुने र प्रतिनिधिको टुंगो लगाइने उपसचिव बर्तौलाले जानकारी दिए । १ सय २५ संगठित सदस्यमध्ये एक जना प्रतिनिधि छनोट हुने व्यवस्था छ । दलितको हकमा ५० संगठित सदस्य बराबर एक जना प्रतिनिधि छानिएका छन् । २२ जनवर्गीय संगठन रहेकोमा एक जनसंगठन बराबर २ र तीन जना छनोट हुने व्यवस्था छ । ११ वटा प्रत्येक विभागबाट एक जना प्रतिनिधि छनोट गरिएको एमालेले जनाएको छ । अधिवेशनको खुला सत्र भृकुटीमण्डपमा र बन्द सत्र प्रज्ञा प्रतिष्ठानमा हुनेछ । बागमतीमा १ लाख ९ हजार पार्टी संगठित सदस्य छन् ।

प्रकाशित मिति: बिहीबार, असोज ४, २०८० १४:२२