देशको अवस्था दयनीय तर किमकी बहिनीले बोकिन् १० लाखको झोला !

A+ A A-

उत्तर कोरियाका सर्वोच्च नेता किम जोङ उन गतहप्ता ६ दिने रुस भ्रमण सम्पन्न गरेर स्वदेश फर्किए । ३९ वर्षीय किम हरियो रेल चढेर रुस पुगेका थिए । उनीसँग उनकी शक्तिशाली बहिनी किम यो–जोङ पनि रुस गएकी थिइन् ।

किमको रुस भ्रमणमा उत्तर कोरियाले रुसलाई शक्तिशाली हतियारहरु दिने सम्झौता भएको अमेरिकी अनुमान छ । यस्तै रुसले उत्तर कोरियालाई भूउपग्रह विकासमा सहयोग गर्ने वाचा गरेको छ ।

अमेरिकाका अनुसार भूउपग्रह कार्यक्रमको नाममा रुसले किमलाई परमाणु हतियार विकासमा सहयोग पुर्याउँदैछ । रुस भ्रमण सम्पन्न भए लगत्तै यतिबेला फेरि किम जोङ उनको परिवारको विलासी जीवनको चर्चा सुरु भएको छ ।

स्ट्रेट टाइम्स डटकमका अनुसार किमकी शक्तिशाली बाहिनी किम यो–जोङ जो अमेरिका र दक्षिण कोरियाप्रति जहिल्यै आक्रामक रुपमा प्रस्तुत हुन्छिन् उनले महँगो झोला बोक्ने गर्छिन् । रुस भ्रमणका क्रममा पनि उनले फ्रान्सको विलासी ब्रान्ड मानिएको क्रिस्टियन डिओर कम्पनीको झोला बोकेकी थिइन् ।

जसको मूल्य ७ हजार देखि ९ हजार ५ सय अ‍ेमरिकी डलरसम्म पर्छ । यसको अर्थ किमकी बहिनीले १० लाख रुपैयाँभन्दा महँगो झोला बोक्ने गर्छिन् ।

किमको परिवारले विलासी सामग्री प्रयोग गर्ने गरेको यो पहिलोपटक होइन् । यसैवर्षको मार्च महिनामा जब उत्तर कोरियाले ह्वासङ–१७ अन्तरमहादेशीय क्षेप्यास्त्र प्रक्षेपण गरेको थियो त्यसबेला पनि नेता किमले क्रिस्टियन डिओर कम्पनीकै महँगो घडी लगाएको पाइएको थियो ।

त्यसअघि उनले स्वीजरल्यान्डको आईडब्ल्यूसी स्याफहाजन कम्पनीको घडी लगाएको पनि देखिएको छ । सन् २०२० मा उनले वर्कर्स पार्टीको ७५ औं वार्षिकोत्सवमा १३ हजार ४ सय अमेरिकी डलर अर्थात् १८ लाख रुपैयाँ पर्ने घडी लगाएका थिए ।

उत्तर कोरियामाथि संयुक्त राष्ट्रसंघ, अमेरिका लगायतले विभिन्न आर्थिक प्रतिबन्धहरु लगाएका छन् । उत्तर कोरियामाथि परमाणु कार्यक्रम लक्षित प्रतिबन्धहरु लगाइँदा उक्त देशले विलासी सामग्रीहरु आयात गर्न पाउँदैन । तर चीन र रुसबाट भएपनि उत्तर कोरियाले विलासी सामग्रीहरु आयात गर्ने गरेको अनुमान छ ।

गत जुन महिनामा बीबीसीमा उत्तर कोरियाली नागरिकहरु खानाको अभावका कारण भोकै मर्न बाध्यछन् भन्ने एउटा रिपोर्ट सार्वजनिक भएपछि उत्तर कोरियाका शासकको विलासी जीवनको विश्वभर आलोचना भएको थियो ।

त्यसो त किम जोङ उनसँग आफ्नै जेट विमानहरु छन्, उनी घोड सवारमा रुची राख्छन् । उत्तर कोरिया अत्यधिक गोप्य देश मानिन्छ र यो देश अधिनायकवादी शासनका लागि परिचित छ । हालसम्म बाहिरिएका खबरअनुसार उत्तर कोरियाली सरकारले आफ्ना नागरिकहरूको जीवनका सबै पक्षहरूमा कडा नियन्त्रणको अभ्यास गर्दछ। त्यहाँ अभिव्यक्ति स्वतन्त्रता छैन भने प्रेस स्वतन्त्रता हुने कुरै भएन । त्यहाँ सरकार वा नेताहरूको आलोचना गर्दा कारावास वा मृत्युदण्ड सहितको कडा सजाय हुनसक्छ ।

उत्तर कोरियालीहरूसँग बाहिरी संसारको सीमित पहुँच छ किनभने त्यहाँ इन्टरनेट कडाईका साथ नियन्त्रित छ । त्यहाँ आफ्नै इन्टरनेट छ, जसलाई पनि निगरानी गरिएको छ ।

बीबीसीको रिपोर्टअनुसार खाद्यान्न अभाव र कुपोषण उत्तर कोरियामा निरन्तर समस्या बनिरहेको विषय हो । नागरिकहरूको आधारभूत आवश्यकताहरू उपलब्ध गराउने विषयमा नभएर उनीहरुको बजेट शासकको विलासिता र सैन्य खर्चमा बढी हुन्छ ।

यस्तै त्यहाँ श्रम शिविरहरू पनि खडा गरिएका छन् जहाँ जबरजस्ती श्रम गर्न लगाइन्छ । राजनीतिक शत्रुहरू र उनीहरूका परिवारहरूलाई त्यहाँ पठाउने गरिएको छ । सरकारले स्वास्थ्य सेवा र शिक्षाजस्ता केही आधारभूत सेवाहरू उपलब्ध गराए पनि यी सेवाहरू प्रायः कम गुणस्तरको हुने बताइएको छ ।

प्रकाशित मिति: बुधबार, असोज ३, २०८० १४:४०