हेटौँडामा डाक्टर कुटपिट प्रकरणः अस्पतालको गेटमा ताला, आकस्मिकबाहेकका सबै सेवा ठप्प

हेटौँडामा डाक्टर कुटपिट प्रकरणः अस्पतालको गेटमा ताला, आकस्मिकबाहेकका सबै सेवा ठप्प

A+ A A-

मकवानपुरका स्वास्थ्य संस्था ठप्प भएका छन् । हेटौँडा–१, स्थित सञ्चो हस्पिटल प्रालिमा गत मंगलबार दुई डाक्टर कुटपिट प्रकरणमा आन्दोलित बनेका स्वास्थ्यकर्मीहरूले शुक्रबार आकस्मिकबाहेकका सेवा ठप्प पारेका हुन् ।

जिल्लाकै एक मात्र सरकारी अस्पताल हेटौँडा अस्पतालमा शुक्रबार बिहानदेखि गेटमा ताला लागेको छ । दैनिक १ हजारको हाराहारीमा उपचार गराउने आउने बिरामी अस्पताल आएर फर्किनुपरेको छ ।

अस्पतालको आकस्मिक उपचार कक्ष भने सञ्चालनमा रहेको अस्पतालका मेडिकल सुपरिटेन्डेन्ट रामचन्द्र सापकोटाले जानकारी दिए ।

स्वास्थ्यकर्मीहरूले दोषीलाई कारबाही गर्नुपर्ने, राज्यले स्वास्थ्यकर्मीको सुरक्षा दिनुपर्नेलगायतका माग राखेर अनिश्चितकालीन आन्दोलन थालेका हुन् । हेटौँडाका निजी अस्पताल, मेडिकलहरू पनि बन्द छन् । निजी अस्पताल र मेडिकलहरू पनि बन्द रहेको नेपाल स्वास्थ्यकर्मी संघ मकवानपुरका उपाध्यक्ष सुधीर दाहालले जानकारी दिए ।

जिल्लाको पश्चिमी क्षेत्रस्थित मनहरी अस्पतालका स्वास्थ्यकर्मीहरू पनि आन्दोलित भएका छन् । मनहरी अस्पतालमा आकस्मिक बाहेक सबै सेवा ठप्प छ ।

हेटौँडा–१२ का डेँगीबाट मृत्यु भएका राजेश प्रधानका आफन्तले सञ्चो हस्पिटलभित्र प्रवेश गरी डाक्टर विकास थापा र अर्का डाक्टर प्रशान्त विडारीमाथि कुटपिट गरेका थिए । मकवानपुर प्रहरीले घटनामा संलग्न ४ जनालाई पक्राउ गरिसकेको छ ।

पक्राउ पर्नेमा मृतक प्रधानकी श्रीमती रमा प्रधान, छोरी रमिता प्रधान, छोरा रोहित प्रधान र भतिज अनुप प्रधान रहेको जिल्ला प्रहरी कार्यालय मकवानपुरले जनाएको छ । नेपाल चिकित्सक सङ्घले बिहीबार प्रहरीमा उजुरी दिएको छ । उजुरीमा दुई जनाको नाममा किटानी जाहेरी परेको जनाइएको छ ।

उपचार सेवा प्रवाह गर्न सक्ने अवस्था नरहेको भन्दै हेटौँडाका चिकित्सकहरूले अस्पताल तथा निजी क्लिनिकहरूको आकस्मिकबाहेकका सबै सेवा बन्द गराएको हेटौँडा अस्पतालका मेसु सापकोटाले बताए ।

उनका अनुसार जिल्लामा कार्यरत् ७८ जना चिकित्सकले बिहीबार नै सामूहिक राजीनामा दिने तयारी गरेका थिए । कतिपय चिकित्सकले राजीनामापत्र तयार पारेर राखेको र कतिपयले आफूलाई बुझाएको भन्दै राजीनामा भने स्वीकृत नगरिएको उनको भनाइ छ ।