मल्टिपल सेक्स पार्टनरका कारण हुन सक्छ, पाठेघरको संक्रमण (भिडियो)

A+ A A-

महिलाहरूमा प्रायःजसो योनी तथा पाठेघरसम्बन्धी समस्या देखिने गर्छ । यसमध्ये योनीमा हुने संक्रमणको समस्या लिएर अस्पताल पुग्नेहरूको संख्या धेरै देखिने गरेको विज्ञहरूले बताउने गरेका छन् ।

समस्या लिएर अस्पताल पुग्नेहरूको संख्या धेरै भए पनि अझै कतिपय महिलाले यो समस्यालाई लुकाएर बस्ने वा सामान्य रूपमा लिने गरेको पाइन्छ । रोगलाई सामान्य रूपमा लिँदै गर्दा रोगले निम्त्याउन सक्ने अन्य जटिलताका बारेमा उनीहरू अञ्जान भएको प्रसूति तथा स्त्री रोग विशेषज्ञ डा. श्रीप्रसाद अधिकारी बताउँछन् ।

किन हुन्छ संक्रमण ?

डा. अधिकारीका अनुसार योनीमा हुने संक्रमण नेपालमा एकदमै ‘कमन’ समस्याका रूपमा देखिने गरेको छ । संक्रमण हुनुमा विभिन्न कारणहरू छन् । जसमध्ये सरसफाइमा ध्यान नदिँदा र असुरक्षित यौन सम्पर्क गर्दा यो समस्या धेरैमा देखिने गरेको छ ।

डा. अधिकारी भन्छन्, ‘सरसफाइमा ध्यान नदिँदा यो समस्या देखिन सक्छ । अझ महिनावारीका बेला प्रयोग गरिने प्याड तथा कपडाका कारण योनीमा संक्रमण हुन सक्ने सम्भावना बढी हुन्छ । यसो हुँदा योनीमा मात्र नभएर संक्रमण पाठेघरसम्म पुग्न सक्छ ।’

संक्रमण भएको कसरी थाहा पाउने ?

सामान्यतया योनीबाट अलिअलि चिप्लो पद्धार्थ निस्किरहन्छ । महिनावारी भइसकेपछि ‘इस्ट्रोज हर्मोन’ उत्पादन हुन्छ । यसको काम योनीमा भएका ग्लाइन्डहरूलाई सक्रिय राख्नुका साथै चिप्लो पद्धार्थ उत्पादन गर्नु हो । यो चिप्लो हुन्छ । तर, गन्ध आउँदैन ।

यसमा अन्य किटाणुले संक्रमण गरेको अवस्थामा भने योनी चिलाउने, दहीजस्तो चाक्टाहरू देखिने, पहेँलो, हरियो पानी बग्ने डा. अधिकारी बताउँछन् ।

उनी भन्छन्, ‘जसलाई पेल्भिक इन्फेलामेट्रिक डिजिज भन्ने गरिन्छ । यो भनेको पाठेघरको मुख जसलाई सर्भिक्स भनिन्छ, त्यहाँभन्दा माथि पाठेघरको बडी, फ्लोपियन ट्युब (डिम्बवाहिनी नली), ओभरी (डिम्बाशय) र पाठेघरको छेउका ठाउँहरूमा संक्रमण हो ।’

त्यस्तै, अलि–अलि सेतो पानी सबैको बग्छ । यसलाई सामान्य मानिन्छ । तर, यो समस्या हुँदा पेन्टी बारबार फेर्नुपर्ने अथवा पहेँलो रङको पानी बग्ने हुन सक्छ । रगत मिसिएको पानी पनि बग्न सक्छ । यो गन्ध आउने हुन्छ, योनी बेस्सरी चिलाउने हुन्छ, जसले गर्दा योनीका भागहरू धेरै चिलाउँदा रातो हुने हुन्छ ।

डा. अधिकारीका अनुसार संक्रमण भएका महिलालाई बारम्बार तल्लो पेट दुखिरहने हुन सक्छ । उनी भन्छन्, ‘दिनदिनै नुहाउने, दैनिक पेन्टी परिवर्तन नगर्दा संक्रमण हुन सक्छ ।’

मल्टिपल सेक्स पार्टनर

त्यस्तै, धेरै जनासँग असुरक्षित यौन सम्पर्क गर्दा पनि संक्रमण हुने सम्भावना बढी हुन्छ । धेरैजसो संक्रमण श्रीमान्‌बाट श्रीमतीमा सर्ने गर्छ । पुरुषलाई संक्रमण भए पनि उनीहरूमा यसका लक्षण कम देखिने गर्छन् ।

त्यसैले श्रीमान्‌श्रीमती वा पार्टनर एकअर्काप्रति इमानदार हुन अत्यन्तै आवश्यक हुने डा. अधिकारी बताउँछन् । उनी भन्छन्, ‘सेक्स पार्टनर एक जना मात्र बनाउनुपर्छ । जसले गर्दा संक्रमणको जोखिम कम हुन्छ । दुवै जना एकअर्काप्रति इमानदार नहुँदा संक्रमणको जोखिम उच्च हुन्छ ।’

र, महिलालाई संक्रमण भएको अवस्थामा श्रीमान्‌श्रीमती दुवैलाई उपचार गर्न जरुरी हुन्छ । महिलालाई मात्र उपचार गर्दा संक्रमण फेरि श्रीमान्‌बाट श्रीमतीलाई सर्न सक्छ । एक जनालाई मात्र उपचार गर्दा अर्काका कारण उपचार गरेको व्यक्तिलाई बारम्बार संक्रमण भइरहन्छ ।

पटक–पटक गर्भपतनले निम्त्याउँछ, जोखिम

डा. अधिकारीका अनुसार पछिल्लो समय परिवार नियोजनका रूपमा गर्भपतनलाई लिने गरिएको छ । तर, पटकपटक गर्भपतन गरिरहनाले पाठेघरको संक्रमण हुने सम्भावना धेरै हुने गर्छ । उनी भन्छन्, ‘यसरी बारम्बार संक्रमण भइरहँदा बाँझोपनको समस्यासमेत देखिन सक्छ ।’

निम्तिन सक्ने जटिलता

योनीमा किटाणुहरू हुन्छन् । तर, ती किटाणुहरू हानिकारक हुँदैनन् । संक्रमण भएपछि भने योनीमा रहरिहेका किटाणुहरूलाई संक्रमणयुक्त किटाणुले आक्रमण गर्छ । र, बिस्तारै पाठेघरसम्म पुग्छ ।

पाठेघरमा डिम्बाशय र डिम्बवाहिनी नली जोडिएको हुँदा त्यहाँबाट संक्रमण फैलिँदै पेटसम्म पनि पुग्न सक्छ । र, त्यसपछि पिपहरू जम्न सक्छ । जसलाई पेल्भिक एभ्सेसन भन्ने गरिन्छ । सामान्य संक्रमण योनीमा हुन्छ । त्यसपछि पाठेघर, डिम्बवाहिनी नलीहुँदै पेटसम्म पुग्छ । यसलाई खतरापूर्ण अवस्था मानिन्छ । र, उपचार नगरेको अवस्थामा महिलाको ज्यानसमेत जान सक्छ ।

यसको उपचार

योनीमा हुने संक्रमणका लागि सामान्यतया योनीमा राख्ने ट्याब्लेट र मलमहरू दिइन्छ । र, यो औषधिले राम्रो सँग काम गर्छ । तर, संक्रमण बढ्दै गएर पाठेघर र पेटसम्म पुगेको अवस्थामा भने उपचार नै फरक हुने डा. अधिकारी बताउँछन् ।

के कुरामा ध्यान दिने ?

डा. अधिकारीका अनुसार कतिपय महिलाले पिसाब फेरिसकेपछि डेटोल, बेटाडिन, साबुनले धुने गरेको पाइन्छ, त्यसो गर्नु हुँदैन ।

उनी भन्छन्, ‘प्राकृतिक रूपमा योनीमा ‘डिफेन्स मेकानिज्म’ हुन्छ । यसले बाहिरबाट आउने किटाणुलाई भित्र जान दिँदैन । साबुनलगायत प्रयोग गर्दा योनीको मुखमा भएका राम्रा किटाणुहरू नाश हुन्छन् । जसले गर्दा बाहिरका किटाणुले सजिलैसँग आक्रमण गर्न सक्छन् ।’

योसँगै सधैँ सुती (कटन) कपडाको पेन्टीको प्रयोग गर्न डा. अधिकारीले सुझाएका छन् ।