राजेन्द्र खड्गीको क्यारिकेचर गरेर हास्यव्यंग्य क्षेत्रमा उदाएका प्रभात (भिडियो)

राजेन्द्र खड्गीको क्यारिकेचर गरेर हास्यव्यंग्य क्षेत्रमा उदाएका प्रभात (भिडियो)

A+ A A-

‘मलाई कामबाटै चिनिएको अधिक राम्रो लाग्छ । अझै पनि कतिले सञ्चारकर्मीका रूपमा मलाई चिन्नुहुन्छ ।’

यो भनाइ पछिल्लो समय गाईजात्रामा वैज्ञानिक महावीर पुनको अवतारका रूपमा देखिएका हास्य कलाकार प्रभात लामाको हो ।

यस वर्षको गाईजात्रामा राष्ट्रिय आविष्कार केन्द्रका संस्थापक महावीर पुनको अवतारका रूपमा देखापरेका प्रभातको क्यारिकेचर र अभिनयलाई धेरैले मन पराइरहेका मात्र छैनन्, यतिबेला महावीर अवतारमार्फत उनले वाहवाही र लोकप्रियतासमेत बटुलिरहेका छन् ।

मुन्द्रेको कमेडी क्लबमा पनि अभिनय गरिरहेका उनी पछिल्लो पुस्ताका उदीयमान तथा प्रतिभावान् हास्य कलाकार हुन् । तर, उनले आफ्नो करिअरको सुरुवात भने सञ्चारकर्मीका रूपमा गरेका थिए । आज पनि उनलाई कलाकारिताभन्दा सञ्चारकर्मीका रूपमा चिन्ने नै धेरै छन् ।

'मेरो नाम थाहा नभए पनि ‘अस्ति त्यो राजेश हमाल बन्ने दाइ होइन तपाईं ? राजेश दाइको नामै नाम जोडेर एउटा कथा भन्नुभएको थियो नि, तपाईं नै होइन ?’ भनेर कसैले भन्दा मेरो नाम नभए नि काम त चिनिदो रहेछ नि, भनेर खुसी लाग्दो रहेछ,' प्रभात भन्छन् ।

प्रभात कसरी हास्य कलाकार रूपमा स्थापित भए ?

प्रभात महोत्तरी बर्दिबासको एउटा सामान्य परिवारमा जन्मिएका हुन् । परिवारमा सन्तानका रूपमा उनीभन्दा अगाडि जन्मिएका दाइ त थिए । तर, त्यसपछि भने छोरीहरू मात्र धेरै भएपछि एउटा ‘आँखो के आँखो, एउटा छोरो के छोरो ?’ भनेर बुवाआमाले रहर गरेपछि कान्छो सन्तानका रूपमा उनको जन्म भएको थियो ।

तर उनी सानो छँदै बुबाको स्वर्गवास भयो । एकातर्फ बाल्यावस्थामै उनले बुबा गुमाए । अर्कोतर्फ त्यसपछि उनको परिवारमा चरम आर्थिक संकट पर्‍यो । आफ्नो पढाइ खर्च जुटाउन उनले आफूभन्दा साना भाइबहिनीलाई ट्युसन पढाएर खर्च जुटाउने गरेको सुनाउँछन् ।

बाल्यकालदेखि नै उनमा कमेडीप्रति औधि रुचि थियो । महजोडी टेलिभिजन कार्यक्रम हेरेर निकै प्रभावित हुन्थे । मनोज गजुरेलको क्यारिकेचर तथा हास्यव्यंग्य हेरेर आफू पनि त्यसरी नै अभिनय गर्न पाए कस्तो हुन्थ्यो होला भनेर उनी सोच्ने गर्थे रे ।

बर्दिबासबाट प्लस टु पूरा गरेसँगै परिवारको कमजोर आर्थिक अवस्थाका कारण केही न केही काम गर्नुपर्ने चुनौती उनीसामु थियो । त्यति नै बेला स्थानीय एउटा रेडियोले कार्यक्रम सञ्चालनसम्बन्धी तालिमको आह्वान गर्‍यो । प्रभात उक्त तालिम लिन हौसिए । तर, तालिमको २५ सय शुल्क तिर्नुपर्ने थियो । उनीसँग त्यति धेरै पैसा पनि थिएन ।

Prabhat lama1694670975.jpg

‘जहाँ इच्छा, त्यँहा उपाय’ भनेझैँ साथीहरूले उनका लागि रेडियो तालिमको पैसा व्यवस्था गरिदिए र उनले तालिम लिए । उनले सोही रेडियोमा समाचार वाचकका रूपमा काम गर्न थाले । सँगै 'च्वास्स' नाममा हास्य कार्यक्रम पनि चलाउन थाले ।

२०६८ सालको कुरा हो । काठमाडौंबाट प्रसारण हुने हास्यव्यंग्य रेडियो 'रेडियो अडियो'ले गाईजात्रा कार्यक्रका लागि देशभरिबाट हास्यव्यंग्य प्रतियोगिता आयोजना गरेको थियो । त्यसबेला तत्कालीन राजा ज्ञानेन्द्रले बाध्य भएर राजसंस्था भरखरै त्यागेका थिए । त्यसैबेला बिहान रेडियोमा सञ्चारकर्मी ऋषि धमलाको राजनीतिक बहस कार्यक्रम प्रसारण हुन्थ्यो ।

त्यस कार्यक्रममा ऋषि र ज्ञानेन्द्रबीच बहस भयो भने कस्तो हुन्थ्यो होला भन्ने परिकल्पनामा उनले एउटा अडियो सामग्री तयार गरेर रेडियो अडियोका लागि पठाए । उनको सो सामग्रीकै कारण रेडियो अडियोले उनलाई नगद पुरस्कारसहित काठमाडौंमा सोही रेडियोमा जागिर पनि दियो । त्यहीँबाट उनको हास्यव्यंग्यको बाटो पनि खुल्यो ।

त्यसयता सञ्चारकर्म र कलाकारितालाई एकसाथ लिएर अघि बढे । रेडियो अडियोमा हास्य कलाकार राजाराजेन्द्र पोखरेलसँग उनको भेट भयो । त्यसैबेला जनता टेलिभिजनबाट ‘नेपाली कमेडी शो’को तयारीमा रहेका राजाराजेन्द्रले उनको प्रतिभाकै कारण प्रभातलाई मिलेर गरौँ भनेर प्रस्ताव गरे । प्रभातले उनको प्रस्ताव स्वीकारे । ‘नेपाली कमेडी शो’ कार्यक्रममा उनले गरेको कलाकार राजेन्द्र खड्गीको क्यारिकेचर चर्चित बन्यो ।

प्रभात आफ्नो औपचारिक हास्यव्यंग्यको सुरुवात पनि त्यहीँबाटै सुरु भएको बताउँछन् । त्यसयता उनले गरेको केशव स्थापित, राजेश हमालसँगै पछिल्लो समयको महावीर पुनको अभिनयले उनी लोकप्रिय बनिरहेका छन् ।

भिडियो:

प्रकाशित मिति: बिहीबार, भदौ २८, २०८० ११:३७