जब अन्तर्राष्ट्रिय समितिमा प्रधानमन्त्री प्रचण्डको खोजी भयो

A+ A A-

संसदको अन्तर्राष्ट्रिय सम्बन्ध र पर्यटन समितिले प्रधानमन्त्री पुष्पकामल दाहाल प्रचण्डको आगामी विदेश भ्रमणको एजेन्डाबारे छलफल गर्न बिहीबार प्रधानमन्त्री प्रचण्डलाई बोलाएको थियो । बिहान साढे १० बजे बोलाइएको बैठकमा समिति सभापति राजकिशोर यादव र सदस्यहरू प्रधानमन्त्री प्रचण्डलाई पर्खिबसेका थिए । तर, प्रधानमन्त्री नआउने जानकारी पाएपछि ११ बजे बैठक सुरु भयो ।

सरकारका तर्फबाट भ्रमणबारे जानकारी दिन परराष्ट्रमन्त्री एनपी साउद हतारहतार आए । ‘संसदीय व्यवस्थाप्रति अत्यन्त संवेदनशील छु । समितिले खबर गरेको २४ घण्टा पनि समय थिएन । जिल्लाबाहिर थिएँ,’ मन्त्री साउदले समितिलाई आश्वस्त पार्न खोजे । तर, समितिमा सदस्यहरूले भने प्रधानमन्त्रीको खोजी गरिरहे ।

‘प्रधानमन्त्रीले समितिलाई जानकारी गराए ओज बढ्थ्यो,’ पूर्वप्रधानमन्त्री माधवकुमार नेपालले भने । विदेश भ्रमणमा अन्तर्राष्ट्रिय समितिलाई पनि समेट्न पूर्वप्रधानमन्त्री नेपालले आग्रह गरे । ‘प्रधानमन्त्रीको भ्रमणमा समितिबाट पनि राख्दा राम्रो हुन्छ,’ उनले भने ।

राप्रपाका सांसद धवलशमशेर राणाले पनि प्रधानमन्त्रीलाई समितिमा उपस्थित गराउनुपर्ने मत राखे । ‘राय सल्लाह लिएर भ्रमण होस् । प्रधानमन्त्री उपस्थित भएर जाँदा राम्रो हुन्छ,’ उनले भने ।

रास्वपाका सांसद शिशिर खनालले पनि प्रधानमन्त्री प्रचण्डलाई खोजे । ‘प्रधानमन्त्रीको उपस्थिति भएर थप छलफल र जानकारी लिन पाए राम्रो हुन्थ्यो । उपस्थितिका लागि पहल गर्न सभापतिमार्फत मन्त्रीलाई आग्रह गर्छु,’ उनले भने ।

नेमकिपाका सांसद प्रेम सुवालले संसदीय व्यवस्थामा प्रधानमन्त्रीले आएर जानकारी दिनुपर्ने बताए । ‘संसदीय व्यवस्था हो भने प्रधानमन्त्री आएर भ्रमणबारे जानकारी दिनुपर्छ,’ उनले भने । एमालेका सांसद एकनाथ ढकालले पनि प्रधानमन्त्री प्रचण्डले भ्रमणबारे समितिलाई जानकारी गराउनुपर्ने बताए । ‘प्रधानमन्त्री आएर भ्रमणबारे जानकारी दिनुपर्छ,’ उनले भने ।

एमालेकी सांसद सुनिता बरालले प्रधानमन्त्रीसँग छलफलका लागि पहल गर्न सभापतिको ध्यानाकर्षण गराइन् । अधिकांश सांसदले प्रधानमन्त्री खोजेपछि परराष्ट्रमन्त्री साउदले आफू सरकारको तर्फबाट नै समितिमा आएको बताए । ‘प्रधानमन्त्री पनि संसदले बनाएको हो, जसलाई महत्त्वपूर्ण जिम्मेवारी दिएको छ । प्रधानमन्त्रीको संसद र समितिप्रति हार्दिक सम्मान रहेको सरकारको तर्फबाट स्पष्ट पार्न चाहन्छु,’ मन्त्री साउदले भने ।

भ्रमणको एजेन्डा फाइनल गर्न बाँकी

परराष्ट्रमन्त्री साउदले प्रधानमन्त्री पुष्पकमल दाहाल प्रचण्डको चीन भ्रमणका एजेन्डा फाइनल नभएको समितिलाई जानकारी गराए । ‘एजेन्डा फाइनल भएको छैन । कृषि, ऊर्जा र पर्यटनका विषयमा छलफल गर्ने तयारी छ । कोभिडका कारण बन्द भएका नाका खोल्ने विषयमा छलफल चलिरहेको छ । अन्तिम रूप दिने काम भइरहेको छ । उपयुक्त समयमा सार्वजनिक गर्छौं,’ उनले भने ।

भ्रमणको एजेन्डा तय गर्न आफूले पूर्वपरराष्ट्रमन्त्री, सचिव र राजदूतसँग छलफल गरेको र प्रधानमन्त्रीले पूर्वप्रधानमन्त्री, पूर्वपरराष्ट्रमन्त्री, पूर्वसचिवहरूसँग छलफल गर्ने मन्त्री साउदले बताए ।

प्रधानमन्त्री अमेरिकाबाट सिधै चीन जाने

प्रधानमन्त्री प्रचण्ड न्युयोर्कस्थित संयुक्त राष्ट्रसंघको मुख्यालयमा आयोजना हुने ७८औँ संयुक्त राष्ट्रसंघीय महासभामा सहभागी हुन नेपाली प्रतिनिधिमण्डलको नेतृत्व गर्दै भदौ ३० देखि असोज ४ (१६ देखि २१ सेप्टेम्बर २०२३) सम्म संयुक्त राज्य अमेरिकाको भ्रमणमा रहने मन्त्री साउदले बताए ।

भ्रमणमा परराष्ट्रमन्त्री नारायणप्रकाश साउद, प्रधानमन्त्रीका राजनीतिक सल्लाहकार, राष्ट्रिय सुरक्षा सल्लाहकार, मुख्य सचिव, परराष्ट्र सचिवलगायत नेपाल सरकारका उच्चपदस्थ पदाधिकारीहरूसहितको उक्त प्रतिनिधिमण्डलमा संयुक्त राज्य अमेरिकाका लागि नेपालका राजदूत, संयुक्त राष्ट्रसंघका लागि नेपाली स्थायी प्रतिनिधि, न्युयोर्कस्थित महावाणिज्य दूतावासका पदाधिकारीहरूलगायत प्रतिनिधिहरू रहनेछन् । प्रधानमन्त्री प्रचण्डले संयुक्त राष्ट्रसंघीय महासभाको ७८औँ उच्चस्तरीय छलफललाई असोज ४ गते नेपालको तर्फबाट सम्बोधन गर्ने कार्यक्रम छ ।

संयुक्त राष्ट्रसंघको कार्यक्रमपछि ५ असोजमा प्रधानमन्त्री चीनको औपचारिक भ्रमणका लागि जाने कार्यक्रम रहेको परराष्ट्रमन्त्री साउदले समितिलाई जानकारी गराए । तर, अमेरिकाबाट सिधै चीन नजान सांसद प्रेम सुवालले सुझाएका छन् । ‘यूएसबाट सिधै चीन जानुभन्दा नेपाल आएर सल्लाह गरेर जाँदा राम्रो हुन्छ,’ उनले भने ।

सम्बन्धित समाचार

प्रकाशित मिति: बिहीबार, भदौ २१, २०८० १८:०१