विश्वविद्यालय छोडेर साेसल मिडियामा, आमाको प्रेमी हत्यामा ३१ वर्ष जेल

A+ A A-

महेक बुखारी टिकटक स्टार थिइन् । उनलाई आफ्नी आमाको पनि भरपूर साथ थियो । पछि उनको जीवनमा एउटा यस्तो घटना भयो, जसले सबै कुरा बदलिदियो ।

यो स्टोरी धोका र ब्ल्याकमेलिङहुँदै हत्यासम्म पुग्यो ।

बेलायतको स्टोक अन ट्रेन्ट शहरकी महेकले विश्वविद्यालय छोडेर सामाजिक सञ्जाललाई आफ्नो करिअर बनाइन् । सम्पूर्ण ध्यान यसैमा लगाइन् ।

उनको कदम सही साबित भयो । महेकले करिब १ लाख फलोअर्स पाइन् । उनले देशभर पार्टी र उद्घाटन समारोहमा ब्राण्ड प्रोमोसनबाट मनग्गे पैसा कमाउन थालिन् । अक्सर भिडियोहरूमा सँगै देखिने आमा अनसरिनसँगको सम्बन्धमा पनि महेक निकै गर्व गर्थिन् । तर, अनसरिनले २१ वर्षे साकिब हुसेनलाई भेटेपछि कथाले उनीहरूको पतनको बाटो खन्न थाल्यो । साकिबसँगको सम्बन्ध दुर्घटना बनेर समाप्त हुन पुग्यो । पछि आमाछोरी दोहोरो हत्याकाण्डमा दोषी ठहर भए ।

दुवैले जन्मकैदको सजाय पाएका छन् । महेकले ३१ वर्ष ८ महिना जेलमा बिताउनुपर्नेछ । अनसरिनले २६ वर्ष ९ महिना जेलको हावा खानेछिन् ।

सन् २०१९ मा अनसरिन र साकिबबीच भिडियो एप ‘आजर’मार्फत कुराकानी हुन थाल्यो । सोही प्लेटफर्मबाट दुईले एकअर्काको सम्पर्क फोन नम्बर आदानप्रदान गरे । साकिब र अनसरिन एकअर्काप्रति आकर्षित भए । उनीहरूबीच हरेक दिन कुराकानी हुन थाल्यो । उतारचढावसँगै सम्बन्ध तीन वर्षसम्म चलिरह्यो ।

धेरैपल्ट होटल, रेस्टुरेन्ट र लाउन्जमा भेटे उनीहरूले । सन् २०२१ मा सम्बन्धमा तनाव आयो । अनसरिन साकिबसँगको सम्बन्ध टुङ्ग्याउन चाहन्थिन् । साकिब यसका लागि मञ्जुर थिएनन् ।

उनले असरिनलाई यस्तो निर्णय नलिन अनुरोध गरे । सम्झाउने निकै प्रयास गरे । तर, परिस्थिति झनै बिग्रियो । अनि साकिबले अनसरिनलाई आफूसँगका व्यक्तिगत भिडियो उनका श्रीमान्‌लाई पठाइदिने धम्की दिन थाले ।

त्यो वर्षको अन्त्यमा अनसरिनले सबै कुरा आफ्नी छोरीलाई सुनाइन् । तर, यो ब्ल्याकमेलिङविरुद्ध प्रहरीमा उजुरी गर्नुको साटो महेकले साकिबलाई आफ्नै तरिकाले ठेगान लगाउने निधो गरिन् ।

इन्स्पेक्टर मार्क पेरिसका अनुसार, बुखारी परिवारले प्रहरीमा उजुरी गरेको भए पनि विषय यति कठिन मोडमा पुग्न पाउँदैन थियो ।

त्यसपछि कथा गयो दुर्घटनातिर

आफ्नी आमालाई सघाइदिन भन्दै महेक आफ्नो कार मेकानिक साथी रेहान कारवान भएठाउँ पुग्छिन् । अक्सफोर्डसरसँग सम्बन्धित साकिब हुसेनलाई अनसरिनसँग भेटाइदिने ‘लालच’ देखाएर बोलाइन्छ । अनसरिनमाथि खर्च गरेको तीन हजार पाउण्ड फिर्ता दिने लोभ साकिबलाई देखाइन्छ । साकिब अक्सर त्यही रकमको कुरा कोट्याउने गर्थे ।

रेहानले आफ्नो निकट साथी रइस जमाल, उसको कजन अमिर जमाल र अन्य साथीको मद्दत लिन्छन् । अरु साथीमा नताशा अख्तर, सनाफ गुल मुस्तफ र मोहम्मद पटेल हुन्छन् ।

११ फेब्रुअरी २०२२ मा यो समूह लेस्टरमा एक टेस्को सुपर मार्केट पुगेर साकिबलाई पर्खिन्छ । यो षड्यन्त्रको उद्देश्य साकिबमाथि अचानक आक्रमण गर्नु थियो ।

आफ्नो पैतृक शहर बेनबरीमा साकिब लेस्टर जानका लागि कसैबाट गाडी लिने कोसिस गरिरहेका थिए । साकिबले केही साथीसँग अनुरोध गर्छन् । तीमध्ये हासिम एजाजुद्दीन उनलाई गाडीमा त्यहाँ लैजाने तयार हुन्छन् ।

मार्क पेरिसका अनुसार, त्यहाँ के हुँदै छ भन्ने कुरा हासिमलाई थाहा हुँदैन । उनी साथी साकिबलाई रातको समयमा लेस्टर लैजानका लागि तयार हुन्छन् । उनले अपराधी कसैलाई पनि चिन्दैन थिए । के भइरहेको छ भन्नेबारे सुइँको हुँदैन उनलाई । केही हदसम्म उनी एक्ला व्यक्ति थिए, जो गलत समयमा गलत ठाउँमा उभिन पुग्छन् ।

साकिब र हासिम टेस्को कार पार्कमा राति १ः१७ बजे पुग्छन् । केही बेर प्रतीक्षा गरेपछि उनीहरूलाई केही गडबड रहेको शंका लाग्छ । उनीहरू हतारहतार त्यो ठाउँबाट निस्किन्छन् तर दुई कारले उनीहरूलाई पछ्याउन थाल्छ । दुईमध्ये एक गाडीमा रइस र अर्कोमा रेहान हुन्छन् ।

महेक र अनसरिन रेहानको गाडीमा बसेका हुन्छन् । त्यो बेला महेकले साकिबलाई फोन गर्छिन् । दुवैबीच कुराकानीका क्रममा ‘तँ तँ र म म’ हुन्छ । उनीहरूबीच के कुराकानी भयो भन्नेबारे नखुले पनि एकअर्कालाई गाली गरेको हुन सक्ने प्रहरीको अनुमान छ ।

उक्त फोन कलको एक मिनेटपछि साकिबले ९९९ मा कल गर्छन् । उनले आफ्नो गाडीलाई केही गाडीले पछ्याइरहेको कुरा अपरेटरलाई भन्छन् । पछाडि आइरहेको गाडीले आफ्नो गाडीलाई ठक्कर दिएर सडकबाट पल्टाइदिन खोजिरहेको सुनाउँछन् ।

यो कल करिब ५ मिनेटसम्म जारी रहन्छ । साकिब र हासिमले पिछा गर्नेहरूबाट बच्नका लागि डबल क्यारेजवेमा आफ्नो यात्रा जारी राख्छन् । उनीहरू रातो बत्तीमा पनि नरोकिई अघि बढ्दै जान्छन् ।

मार्क पेरिस भन्छन्, ‘उनीहरूको बाटो छेकिँदै गरेको पनि देखिन्छ । फुटेजमा प्रस्ट देखिएको छ, कारलाई एक गाडीले अगाडिबाट छेक्दै छ । त्यसले अगाडिबाट ब्रेक लगाउने र कारलाई रोक्ने कोसिस गरिरहेको छ ।’

उनका अनुसार, साकिबले आफ्ना साथी हासिमलाई भन्छन्, ‘सेण्ड इट, सेण्ड इट’ । यो हासिमका लागि एक इशारा थियो, गाडी अझै तीव्र पारौँ र यहाँबाट जतिसक्दो छिटो भागौँ ।

उनीहरू खुब डराउँछन्, रेड सिग्नलमा पनि रोकिँदैनन् । तैपनि उनीहरूको पिछा गर्नेहरूले छोड्दैनन् । साकिब र हासिमको परिवारले अदालतमा चलाइएको ९९९ वाला कललाई मिडियामा प्रसारित गर्नका लागि अनुरोध गरेका छन् ।

‘म मर्दै छु’

त्यो कलको अन्तिम क्षण निकै हृदयविदारक थियो । फोन लाइनमा सन्नाटा छाउँछ, अनि अपरेटरले साकिबलाई के तपाईं कलमा हुनुहुन्छ भनेर सोध्छ ।

अब यो एक भावनात्मक र पीडा हुने खालको कलमा बदलिन्छ । उनीहरू साकिबको निकै नजिक आइसकेका हुन्छन् । त्यसपछि चीत्कार सुनिन थाल्छ । एकैछिनमा सन्नाटा छाउँछ ।

अदालतमा दुर्घटनाभन्दा केही क्षणअघि साकिब हुसेनको तर्फबाट प्रहरीलाई गरिएको कलको रकेर्डिङ पनि सुनाइएको थियो ।

आफ्नो जीवनको अन्तिम क्षणमा साकिब हुसेनले प्रहरीको हेल्पलाइन नम्बरमा फोन गर्दै मास्क लगाएका मानिस बसेको दुई गाडीले आफ्नो गाडीलाई ठक्कर दिएर सडकबाट खसाउने प्रयास गरिरहेको सुनाएका थिए । कलमा दुःखी साकिब हुसेनले अपरेटरलाई भनेका छन्, ‘उनीहरू मलाई पछ्याइरहेका छन् । उनीहरूको अनुहारमा मास्क छ । तिनीहरू मलाई ठक्कर दिन खोजिरहेका छन् ।’

उनले यस्तो पनि भनेका छन्, ‘म मर्दै छु । कृपया सर, मलाई तपाईंको सहयोग चाहिएको छ । तिनीहरू कारलाई पछाडिबाट ठक्कर दिँदै छन्, धेरै तीव्रसँग । म तपाईंसित बिन्ती गर्छु । म मर्दै छु ।’

कल काटिनुअघि ठूलो आवाजमा कराएको आवाज सुनिन्छ ।

राति ठीक डेढ बजेपछि एक रिकभरी ड्राइभर उक्त हाइवेमा यात्रा गरिरहेका थिए । त्यही बेला उनले रुखनजिकै कार जलिरहेको देख्छन् । कसैले प्रहरीलाई नबोलाएको ठानेर उनले आफ्नो ट्रक तेर्स्याएर सडक बन्द गरिदिन्छन् ।

प्रहरी लगभग १० मिनेटपछि त्यहाँ पुग्छ । केही बेरलगत्तै फायरफाइटर्स पनि त्यहाँ पुग्छ । आगो निभाएपछि प्रहरी अधिकारीहरूमध्ये एकजनाले त्यहाँ दुई जनाको लास देख्छन् ।

प्रहरीका अनुसार, अर्कोतिर महेकले अडी गाडी आफैं चलाउँछिन् । नतासा त्यही गाडीको सिटमा बस्छिन् । त्यसपछि भूमिगत हुनका लागि लेस्टरतिर फर्किन्छन् । फर्किंदा उनीहरू जल्दै गरेको भग्नावशेषनजिकै हुँदै अघि बढ्छन् । शहर पुगेपछि उनीहरू सोटन प्लेसको क्षेत्रमा पस्छन् । उनीहरू सुरक्षित ठाउँमा पुगिसकेका हुन्छन् । उनका केही साथीहरू गाडीबाट निस्केर सडकमा हिँड्न थाल्छन् ।

सीसीटीभीमार्फत उनीहरूलाई रातको करिब २ बजे फरक-फरक ठाउँमा फेब्रुअरीको जाडोमा घुम्दै गरेको देखिएको छ । आफूले गरेको अपराधमा पर्दा लगाउने प्रयासमा उनीहरूले यस्तो उपाय लगाएको हुन सक्ने प्रहरीको अनुमान छ ।

यसपछि केहीलाई पैदल र केहीलाई गाडीबाट घर छोडिन्छ । गाडी धनी नतासा बर्मिङ्घमस्थित आफ्नो घरतिर लाग्छिन् । महेक र उनकी आमा अनसरिन स्टोक अन ट्रेन्टको उत्तर क्षेत्रतिर अघि बढ्छन् ।

साकिबको ९९९ कल परीक्षण गर्न प्रहरीले पठाइसकेको हुन्छ । प्रहरीले अटोमेटिक नम्बर प्लेट रिकग्निसन क्यामेराबाट खोजबिनसमेत सुरु गरिहाल्छ । अलर्ट जारी गरिन्छ । वेस्ट मिडल्याण्ड्समा दुई अधिकारीले नतासाको गाडीबारे पत्ता लगाएर उनको पिछा गर्न थाल्छन् । पछि उनलाई एक पेट्रोल स्टेसनमा पक्राउ गरिन्छ । भाग्ने क्रममा उनले डराएर रइसलाई फोन गर्छिन् । नतासालाई हिरासमा लिइन्छ ।

बिहान ८ बजेतिर महेक कुराकानीको आवाजले ब्युँझन्छिन् । त्यो बेला प्रहरी महेकका दाजु र बुबासँग कुराकानी गरिरहेको हुन्छ । रइसले महेकलाई बारम्बार फोन गरिरहेका थिए । नतासालाई प्रहरीले समातेको कुरा रइसलाई थाहा हुन्छ ।

यसपछि महेकले अर्को कोठामा रहेकी आफ्ना आमालाई टेक्स्ट मेसेज पठाउँछिन् । प्रहरी अधिकारीसामु आफूले के भन्छु भन्ने कुरा त्यसमा लेखिएको हुन्छ ।

महेकले पुलिसलाई ढाँट्छिन् । दुर्घटनाको रात उनी सोसल मिडियो प्रोग्रामका लागि नटिङ्घम जाँदै गरेको बताउँछिन् ।

हिरासतमा लिएपछि पनि महेकले त्यो रातको बारेमा झुटा जानकारी दिन्छिन् । तर, प्रहरीले साकिबको ९९९ कल चलाएपछि उनी अक्क न बक्क हुन्छिन् । हार मान्नुको साटो रुन थालिन् । उल्टै साकिबले झुट बोलेर घटनालाई तोडमरोड गरेको आरोप लगाउँछिन् । महेक र अनसरिन बुखारीसहित अन्य ६ जनाविरुद्ध हत्या आरोप लगाइन्छ ।

मिहेक र अनसरिन बुखारीसहित अन्य ६ जनाविरुद्ध मुद्दा चल्छ । आरोपीमध्ये एक मोहम्मद पटेललाई रिहा गरिन्छ । उनले प्रहरीलाई पूरै घटना सुनाउँदै पिछा गर्दाको समय केके भएको थियो, सबै भनिदिएका हुन्छन् । साकिबको गाडीलाई ठक्कर दिने विषयमा पछ्याउने क्रममा रेहान र रइसबीच फोनमा आपसमा कुराकानी भएको हुन्छ ।

शुक्रबार ४ अगस्ट २०२३ मा १८ महिनापछि हुसेन र एजाजजुद्दीन– दुवै परिवारलाई अदालतको फैसलाको प्रतीक्षा थियो ।

इजलासमा २८ घण्टाभन्दा बढी बहस हुन्छ । त्यो दिन सुरुमा महेक लिस्टर क्राउन कोर्टको बाहिर पत्रकारतिर हेरेर हात हल्लाउँछिन् मुस्कुराउँछिन् । तर, यस्तो देखावटी आत्मविश्वास धेरै समयसम्म रहन सक्दैन । जब अदालतमा आमा र छोरी दुवैलाई दोहोरो हत्याको अपाराधी ठहर गरिन्छ, महेक चिच्याई चिच्याई रुन्छिन् ।

रेहान कारवान र रइस समाललाई जन्मकैदको सजाय सुनाइन्छ । अमिर जमाल, नताशा अख्तर र सनाफ गुल मुस्तफालाई इच्छाबिना गरेको हत्या अभियोगमा तीन वर्षको सजाय सुनाइयो ।

नताशा अख्तराई ११ वर्ष, अमिर जमाललाई १४ वर्ष ८ महिना, सनाफ गुल मुस्तफालाई १४ वर्ष ९ महिना कैद सजाय सुनाइएको छ । फैसलापछि साकिबका कजन आदिल बहारले आफ्नो परिवारले न्यायका लागि निकै कठिन परिस्थितिको सामना गर्नुपरेको बताए । उनका अनुसार, हरेक दिन उनीहरू साकिबलाई सम्झिन्थे । ‘हामी अदालतमा बसेका बेला न्यायाधीशले ज्युरी एक फैसलामा पुगेको बताउँदा मेरो मन टुटेजस्तो महसुस भयो ।’ हासिमको सम्झनामा आयोजित फुटबल टुर्नामेन्टमा सम्बोधन गर्दै उनका दुई दाजुले श्रद्धाञ्जलि अर्पित गरे ।

प्रकाशित मिति: मंगलबार, भदौ १९, २०८० १६:५६