गृहमन्त्रीले धेरै स्टन्टबाजी गरे गठबन्धनमै गडबडी हुन सक्छ : मीन विश्वकर्मा (भिडियो अन्तर्वार्ता)

गृहमन्त्रीले धेरै स्टन्टबाजी गरे गठबन्धनमै गडबडी हुन सक्छ : मीन विश्वकर्मा (भिडियो अन्तर्वार्ता)

A+ A A-

नेपाली कांग्रेसका नेता मीन विश्वकर्माले गृहमन्त्री नारायणकाजी श्रेष्ठकै कारण गठबन्धनमा गडबड हुन सक्ने बताएका छन् । गृहमन्त्री श्रेष्ठले छानीछानी अरुलाई फसाउने र आफ्नालाई बचाउने काम गरिरहेको उल्लेख गर्दै त्यस्तो स्टन्ट नरोकिए गठबन्धनमै गडबडी हुने दाबी गरेका छन् ।

‘उहाँ गृहमन्त्री बन्दा हामीले राम्रै अपेक्षा गरेका थियौँ तर उहाँमा बचपना देखियो । कामभन्दा हल्ला बढी गरेर स्टन्टबाजी गर्न थाल्नुभो,’ शिलापत्रसँगको भिडियो अन्तर्वार्तामा विश्वकर्माले भनेका छन्, ‘प्रचण्डले आफूले राम्रो गर्न चाहेको भन्दै कांग्रेसको साथ माग्नुभयो । हामीले पनि राम्रो काम गर्नुहुन्छ भने समर्थन छ भन्यौँ तर अहिलेको सरकारको दिशा उल्टो भयो ।’

सत्ता गठबन्धनको मुख्य घटक कांग्रेसको संस्थापन पक्षकै नेता विश्वकर्माले गृहमन्त्री श्रेष्ठप्रति गम्भीर आरोप लगाएका छन् । श्रेष्ठले छानीछानी अरुलाई फसाउने र आफ्नालाई बचाउने काम गरिरहेको उल्लेख गर्दै उनले भनेका छन्, ‘यो सबै हेरेर कांग्रेस बस्न सक्दैन । हामीले संयता अपनाएका छौँ । कांग्रेसजस्तो जिम्मेवार पार्टीले अस्थिरता निम्त्याउनु हुन्न भनेर लाग्दा उल्टै हामीलाई नै पेल्ने ?,’ उनले प्रतिप्रश्न गरे ।

भ्रष्टाचारमा शून्य सहनशीलता भन्ने प्रधानमन्त्रीले मन्त्रिपरिषद्‌को निर्णय कसरी हुन्छ भन्नेसमेत नबुझेको कांग्रेस नेता विश्वकर्माको आरोप छ । मुख्यसचिव र स्वयम् प्रधानमन्त्रीको संलग्नतामा ललितानिवास प्रकरण भए पनि माधव नेपाल र बाबुराम भट्टराईलाई उन्मुक्ति दिएर सामान्य कर्मचारी फसाउने काममा सरकार लागेको उनको भनाइ छ । ‘निर्णय गर्ने मन्त्री, मुख्यसचिव, प्रधानमन्त्री उम्किने र टिप्पणी उठाउने सामान्य कर्मचारी फस्ने हो भने अब कसरी काम हुन्छ ?,’ नेता विश्वकर्मा भन्छन् ।

नक्कली भुटानी शरणार्थी प्रकरण, ललितानिवासलगायतका भ्रष्टाचारका फाइलहरू खोलेको भन्दै गृहमन्त्री श्रेष्ठको प्रशंसा भइरहेका बेला विश्वकर्माले खुलेर विरोध गरेका छन् । गृहमन्त्रीले गलत गरेको भए उनको प्रशंसा हुने र कांग्रेसका मन्त्रीहरू किन हराइरहेका छन् भन्ने प्रश्नमा उनको जवाफ छ, ‘काम र हल्लाको बीचमा भेद थाहा पाउनुपर्‍यो । हाम्रा मन्त्रीहरूले राम्रो काम गरिरहेका छन् तर उनीहरू हल्ला गर्दैनन् ।’

संसदको प्रमुख पार्टी भएर पनि सत्ताको लोभ नगरी आफूहरूले माओवादीलाई सरकार बनाउन दिएको हुनाले कांग्रेस परिपक्व राजनीति गर्छ भन्ने माओवादीले बुझ्नुपर्ने उनी बताउँछन् । विगतमा केपी ओलीको स्वेच्छाचारिताका विरुद्ध सँगै लडेको र गठबन्धनबाट चुनाव लडेकाले यो कार्यकालसम्म माओवादीलाई बोक्नुपर्ने कांग्रेसको बाध्यता रहेको उनी बताउँछन् ।

एमालेले स्थिर सरकारका लागि कांग्रेस–एमाले मिलेर जाऔँ भनिरहेको छ नि भन्ने प्रश्नमा विश्वकर्मा भन्छन्, ‘केपी ओलीको कार्यशैली र प्रवृत्ति उही रहँदासम्म एमालेसँग सहकार्य हुन सक्दैन । स्थिरता संख्याले आउने होइन, साेच र अभ्यासको कुरा हो, जुन कुरा ओलीमा देखिँदैन ।’

विस्तृत भिडियो अन्तर्वार्ताः