यूएनका लागि पूर्वअमेरिकी राजदूत बिल रिचर्डसनको निधन

A+ A A-

संयुक्त राष्ट्र संघका लागि पूर्वअमेरिकी राजदूत बिल रिचर्डसनको निधन भएको छ । उनैले स्थापना गरेको ‘रिचर्डसन सेन्टर फर ग्लोबल इङ्गेजमेन्ट’का अनुसार, मेसाचुसेट्सस्थित घरमा ७५ वर्षे रिचर्डसनको मृत्यु भएको हो ।

‘हिजो राति गभर्नर रिचर्डसनको निन्द्रमै शान्तिपूर्वक निधन भएको छ । उहाँले आफ्नो पूरै जीवन अरुको सेवामा बिताउनुभयो । सरकारमा बिताएको समय र त्यसपछि विदेशमा बन्धक बनाइएका वा गलत तरिकाले हिरासतमा लिइएका मानिसलाई छोडाउन मद्दत गर्नुभयो । गभर्नर रिचर्डसनले मानिसहरूलाई न्याय वा स्वतन्त्रता दिलाउने कुरामा सबैसित कुराकानी गर्नुभएको छ’, रिचर्डनसन सेन्टरका उपाध्यक्ष मिकी बर्गम्यानले भने ।

उनका अनुसार, विदेशमा गलत तरिकाले समातिएका मानिसका लागि संसारले एक च्याम्पियन गुमाएको छ । ‘र, मैले एक गुरु र एक प्रिम मित्र गुमाएको छु’, उनले भने ।

अहिले आफूहरूको ध्यान उनको परिवारलाई सान्त्वन दिनेमा रहेको बर्गम्यानले बताए । घरमा उनकी ५० वर्षीया श्रीमती बारबारा छिन् । रिचर्डसनको निधन हुँदा बारबारा सँगै थिइन् ।

राष्ट्रपति बिल क्लिन्टनमातहत काम गर्दा संसारभरका हिरासतमा रहेका अमेरिकी नागरिकलाई छोडाउन पहल गरेकोमा उनको प्रशंसा हुने गरेको छ । उनले राजनीतिभन्दा बाहिर रहेर पनि आफ्नो कामलाई निरन्तरता दिएका थिए । गत वर्ष हिरासतमा लिइएका बास्केटबल स्टार ब्रिटनी ग्रिनरको रिहाई माग्दै उनी रूसकाे मस्कोसम्म पुगे ।

क्लिन्टनले रिचर्डसनलाई ‘कुशल’ वार्ताकार भनेका छन् । एक विज्ञप्तिमा क्लिन्टनले भनेका छन्, ‘बिलले स्वतन्त्रता, निष्पक्षता र अवसरका लागि अथक प्रयास गरेका छन् । औपचारिक वा अनौपचारिक क्षमतामा उनी एक कुशल र निन्तरका वार्ताकार थिए, जसले हाम्रो संसारलाई अझै सुरक्षित बनाउन मद्दत गरे । विदेशमा अन्यायपूर्ण तरिकाले राखिएका कैयौं व्यक्तिको रिहाइ गराए ।’

सन् १९४७ मा क्यालिफोर्नियाको पासाडेनामा स्पेनिस मूलकी आमा र निकारागुआमा जन्मेका बुबाको घरमा जन्मेका रिचर्डसन मेसाचुसेट्समा बोर्डिङ स्कुल जानुअघि मेक्सिको सिटीमा हुर्केका थिए ।

सन् १९७० मा टफट्स विश्वविद्यालयबाट स्नातक गरेपछि उनले १९७१ मा मास्टर डिग्री गरे । लगत्तै उनी राजनीतिमा लागेका थिए । रिजर्डसनले प्रमुख राष्ट्रिय र राज्य स्तरको पदमा रहेर काम गरेका थिए । सन् १९८३ मा उनी न्यु मेक्सिकोको तेस्रो जिल्लाको प्रतिनिधित्व गर्दै अमेरिकी सदनका लागि चुनिए । राजनीतिमा लागेको पाँच दशकभित्र उनले कूटनीतिक वार्तामा विशेषज्ञता विकास गरे । त्यसैले तत्कालीन राष्ट्रपति क्लिन्टनले उनलाई सन् १९९७ मा संयुक्त राष्ट्र संघमा आफ्ना दूतका रूपमा नियुक्त गरे । अर्को वर्ष उनी क्लिन्टनको ऊर्जा सचिव बनेका थिए ।

प्रकाशित मिति: आइतबार, भदौ १७, २०८० ११:५४