प्रचण्डले भने जस्तै उनी पाँचै वर्ष प्रधानमन्त्री रहने परिस्थिति बनेकाे हाे ?

प्रचण्डले भने जस्तै उनी पाँचै वर्ष प्रधानमन्त्री रहने परिस्थिति बनेकाे हाे ?

A+ A A-

प्रधानमन्त्री पुष्पकमल दाहाल प्रचण्डले शनिबार पार्टीकाे कार्यक्रमलाई सम्बाेधन गर्दै आफू पाँचै वर्ष प्रधानमन्त्री रहने परिस्थिति बन्दै गएकाे बताएका छन् ।

शनिबार काठमाडौंको चन्द्रागिरि–२ घट्टेडाँडामा ‘जनतासँग माओवादी’ कार्यक्रमलाई सम्बोधन गर्दै उनले भने, ‘अहिले म प्रधानमन्त्री भएकाे ८ महिना भएको छ । म त हट्न परेको छैन । मलाई लाग्छ पाँच वर्षै हट्न पर्दैन जस्तो देख्दैछु । गठबन्धन पाँचै वर्ष चल्छ होला ।’

उनले याेबीचमा आफू नेतृत्वकाे सरकार हटाउने प्रयास भए आन्दाेलन गर्नेसमेत बताए । उनले भने, ‘म ३२ सिटको पार्टीको नेता भएको छु । म कतिदिन प्रधानमन्त्री रहने हो, हुनसक्छ १५ दिन, एक महिना, ३० दिन । जति दिन रहनेछु । र, मलाई जसले हटाउनेछन् तिनका विरुद्ध लाखौं–करोडौं जनताको बीचमा आन्दोलनको नेतृत्व गर्नेछु ।’

कांग्रेससँग सशंकित प्रचण्डलाई माधव नेपालकाे भूमिकाले राहत

सार्वजनिक मञ्च र कार्यकर्ताको अगाडि प्रचण्ड सरकारकाे आयुबारे केही न केही बोलिरहेका हुन्छन् । उनी कहिले सरकार ढाल्ने खेल भैरेको बताउँछन् भने कहिले पाँच वर्ष गठबन्धन जान्छ भनेर भन्छन् ।

गत वर्षको पुस १० मा कांग्रेससहितको तत्कालीन गठबन्धनमा प्रधानमन्त्री नपाएपछि बालकोट पुगेर एमालेसँग गठबन्धन गर्दै प्रधानमन्त्री बने प्रचण्ड ।

चैत २५ मा राष्ट्रपतिको चुनावमा एमालेको अडानका कारण प्रचण्ड एमालेसहतिको गठबन्धन छाडेर कांग्रेससहितको पुरानो गठबन्धनमा फर्किए । एमालेसँगको गठबन्धनबाट प्रधानमन्त्री बनेका प्रचण्डले कांग्रेसलाई राष्ट्रपति दिएर कित्ता फेरे ।

उनले कित्ता फेर्दा पाँच वर्षे कार्यकालमा पहिलो दुई वर्ष माओवादी, बीचको एक वर्ष एकीकृत समाजवादी र अन्तिम दुई वर्ष कांग्रेसले नेतृत्व गर्ने सहमति भएको नेताहरू बताउँछन् । योबीचमा एकीकृत समाजवादीले भने सरकारको नेतृत्व नपाउने नेताहरूले बताउन थालेका छन् ।

सत्तासँग जोडिएको सहमति कार्यान्वयनमा प्रतिबद्ध देखिएका प्रचण्ड तेस्रो कार्यकालमा भने प्रतिबद्धता उलंघन गर्ने पक्षमा देखिएका छन् ।

अहिले प्रधानमन्त्री प्रचण्डको अभिव्यक्तिले संसदको ठूलो दल कांग्रेसलाई झस्काएको छ । तत्कालको अभिव्यत्ति भएकाले कांग्रेसले पार्टीभित्र छलफल गरिसकेको छैन ।

‘प्रधामन्त्री जस्तो गरिमामय पदमा हुनहुन्छ । उहाँ गठबन्धनको प्रधानमन्त्री हुनुहुन्छ । बोल्दा होस पर्‍याउनुपर्छ जथाभावी बोल्नु उपयुक्त हुँदैन', कांग्रेस प्रचार विभाग प्रमुख मीन विश्वकर्माले शिलापत्रसँग भने, ‘उहाँको अभिव्यक्ति कहिलेकहीँ नियन्त्रणभन्दा बाहिर जान्छ । सरकार बन्दाको समझदारी भन्दा बाहिर गएर दिएको अभिव्यक्ति कांग्रेसले गम्भीर रुपमा लिन्छ ।’

प्रतिपक्षी दल एमालेका नेताहरू भने प्रधामन्त्रीको अभिव्यक्ति बेसुरको रहेको बताउँछन् । एमाले सचेतक पदम गिरी प्रधानमन्त्रीबाट अनावश्यक अभिव्यक्ति आउने देशका लागि दुर्भाग्य रहेको बताउँछन् ।

‘बेसुरमा बोलिरहनुभएको छ । कहिले अर्को चुनावमा बुहमत देउ जातीय राज्य दिन्छौं भन्नुहुन्छ । कहिले लाखौँ जनता उतारेर आन्दोलन र संघर्ष गर्ने भन्छन् । लगानी गरेर बसेका उद्यागीहरू डराएर बस्नुपर्ने अवस्था छ । उहाँ छट्पटीमा हुनुहुन्छ । बेसुरको कुरामा के टिप्पणी गर्नु,’ उनले शिलापत्रसँग भने ।

एमाले अहिलेकाे सत्ता गठबन्धनलाई विस्थापित गर्ने माैका कुरेर बसेकाे कसैबाट लुकेकाे छैन । उसकाे ध्यान कांग्रेसमा छ । गत वर्षका चुनावको सन्देश कांग्रेस र एमाले मिलेर सरकार गठन गर्ने रहेको बुझाइ एमालेको छ । ‘एउटा कम्युनिस्ट सरकार एक ठाउँमा जाँउ भन्ने सन्देश थियो । त्यो कोर्ष समाप्त भयो । कांग्रेस र एमाले मिलेर सरकार बनाउँ स्थिर सरकार बनाउँ भन्ने थियो । कांग्रेस यसमा तयार छैन । संसदको ठूलो हात्ती सानो माउतेले उठ भने उठ बस भने बस भन्ने अवस्थामा छ । कांग्रेससँग हात बढाएर जान तयार छौ', एमाले सचेतक महेश बर्तौलाले भने ।

कांग्रेसको हविगत देखेर प्रधानमन्त्रीले सरकारको आयुबारे शनिबारको धारणा राखेको उनले बताए । एमाले र कांग्रेसकाे सरकार बनेको खण्डमा स्थायी रुपमा सरकार बन्ने र लगानीको वातावरण बन्ने उनको भनाइ छ ।

नेताहरूले सार्वजनिक खपतको लागि बोल्ने शिलशिलामा प्रधानमन्त्री प्रचण्डको अभिव्यक्ति आएको राजनीतिक विश्लेषक गेजा शर्मा बताउँछन् ।

‘नेताहरू भाषणमा सार्वजनिक खपतका लागि समय र परिस्थितिअनुसार बोलिरहेका हुन्छन् । प्रधानमन्त्रीको यो अभिव्यक्ति पनि सार्वजनिक खपतका लागि बोलेको देखिनछ,’ उनले शिलापत्रसँग भने ।

एमालेले कांग्रेसँग सत्ता सहकार्य गर्न प्रस्ताव गरिरहँदा माओवादी र एमालेसँग पुन: सहकार्य हुने अवस्था हुन पनि सक्ने उनले बताए । किनकि सत्ता गठबन्धन सिद्धान्तको होइन स्वार्थको हुने गर्छ । ‘पछिल्लो समयमा गठबन्धन सिद्धान्त, नीति र कार्यक्रमको आधारमा बन्दैनन् र बनेका छैनन् । प्रमुख पार्टीका शीर्ष नताहरूको स्वार्थमा गठबन्धन बनेका र भत्केका छन् । यो गठबन्धनमा कसैको स्वार्थमा आँच आयो भने अर्को गठबन्धन बन्न सक्छ । तथापि त्यो सम्भावना देख्दिन,’ शर्माले भने ।

प्रकाशित मिति: शनिबार, भदौ १६, २०८० २०:२५