केपी ओलीलाई नेता नमान्नेले विद्या भण्डारीलाई मान्लान् र ? : पृथ्वीसुब्बा गुरुङ (भिडियो अन्तर्वार्ता)

केपी ओलीलाई नेता नमान्नेले विद्या भण्डारीलाई मान्लान् र ? : पृथ्वीसुब्बा गुरुङ (भिडियो अन्तर्वार्ता)

A+ A A-

नेकपा एमालेका उपमहासचिव पृथ्वीसुब्बा गुरुङले निवर्तमान राष्ट्रपति विद्या भण्डारीलाई पार्टी नेताका रूपमा ल्याउनेबारे अनौपचारिक कुराकानी चलेको स्वीकारेका छन् । तर, त्यसले मूर्त रूप भने नलिएको उनले संकेत गरे ।

पूर्वराष्ट्रपति पार्टीमा फर्किन चाहे संविधानले नरोकेको उल्लेख गर्दै नेता गुरुङले शिलापत्रसँगको अन्तर्वार्तामा भनेका छन्, ‘राष्ट्रपति भएको मान्छेले राजनीति गर्नहुन्न भन्ने छैन, संविधानविपरीत पनि होइन । उहाँ आए पार्टीमा स्वागत हुन्छ ।’

एमालेकै केही नेताहरू पूर्वराष्ट्रपति भण्डारीलाई पार्टी नेतृत्वमा ल्याएर फेरि पुरानो नेकपा ब्युँताउनुपर्ने लाइनमा छन् । तर, उपमहासचिव गुरुङ भने त्यो स्थिति नरहेको बताउँछन् । उनको प्रश्न छ, ‘केपी ओलीलाई नै नेता नमानेका प्रचण्ड, माधवहरूले विद्यालाई नेता मान्लान् र ?’

गुरुङले विचारका दृष्टिले जनताको बहुदलीय जनवाद अब सबै कम्युनिस्ट पार्टीहरूले मान्नैपर्ने स्थिति आएको बताएका छन् । ‘अब कसैले पनि लाज मान्न परेन, खुरुक्क जबजको लाइनमा आएर संसदमा श्रेष्ठता हासिल गरे हुन्छ,’ उनले भने ।

प्रतिस्पर्धात्मक संसदीय अभ्यासमा आइसकेपछि प्रचण्डलगायत नेताहरूले ढाँटिरहनु नपर्ने उल्लेन गर्दै एमाले उपमहासचिव गुरुङ माओवादी र नेकपा एसको एमालेभन्दा अन्यत्र जाने अर्को ठाउँ नरहेको पनि बताएका छन् । २०४६ सालमा सिरहाको चौथो महाधिवेशनबाटै कम्युनिस्ट आन्दोलनले ‘प्याराडाइम सिफ्ट’ गरेको हुँदा एमालेकै नीतिमा गोलबद्ध हुनुपर्ने आवश्यकता रहेको उनी बताउँछन् । आन्तरिक प्रतिस्पर्धा र लोकतन्त्र मानेकैले एमाले आजको दिनमा सबैभन्दा लोकप्रिय र व्यवस्थित पार्टी भएको उनको दाबी थियो ।

तर, प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले एमालेमा ठूलै धाँजा फाट्न लागेको बताइरहेका छन् नि भन्ने प्रश्नमा गुरुङको जवाफ थियो, ‘त्यो त प्रचण्डको सराप हो, सरापेर डिङ्ना मर्छन् र ?’

प्रचण्डलाई उनको प्रतिप्रश्न छ, ‘त्यसो भए हजारौँ माओवादी नेता/कार्यकर्ता किन एमालेमा आइरहेका छन् त ?’ आफ्नै पार्टी जोगाउन धौधौ परेकाले प्रचण्डलाई एमालेजस्तो व्यवस्थित पार्टीलाई गाली गर्नुपरेको गुरुङको टिप्पणी थियो ।

एमालेको प्रतिपक्षीय भूमिकामाथि धेरै कोँणबाट प्रश्न उठिरहेका छन् । सुन तस्करी प्रकरणको उच्चस्तरीय छानबिनको माग राखेर उसले लामो समय संसद अवरुद्ध पनि गर्‍यो । कांग्रेससँग सत्ता साझेदारीको प्रयाससमेत भइरहेको चर्चा राजनीतिक वृत्तमा छ । के एमालेलाई सत्ताबाहिर बस्न गाह्रै परेको हो ? उपमहासचिव गुरुङ भने आफूहरू मिसन ग्रासरुट लिएर गाउँ हिँडेकाले सत्ता र शक्तिप्रति ध्यान नदिएको दाबी गर्छन् ।

कुनै समय एमाले आन्तरिक प्रतिस्पर्धा गराउने पार्टीमा गनिन्थ्यो । तर, पछिल्लो समय सर्वसम्मतका नाममा प्रतिस्पर्धालाई निरुत्साहित पारिरहेको छ । सर्वसम्मत नेतृत्व मिलाउने कुराले गलत थिति बस्न थालेको स्वीकार गर्दै उपमहासचिव गुरुङ त्यसका कारण पार्टी कमिटीहरू जाममा परेको बताउँछन् । ‘वडामा काम गर्ने हैसियत भएका पालिकामा आए, पालिकामा बसेर काम गर्नुपर्नेहरू जिल्ला वा प्रदेशमा आए । यसले नेतृत्व क्षमताको अभाव देखियो,’ उनी भन्छन्, ‘यो सधैँ हुनुहुन्न । हामी पुनर्विचार गर्दै छौँ ।’

सर्वसम्मतको संस्कृतिले कमिटी जाममा परेको स्वीकारे पनि ७० वर्षे उमेरहद हटाउनुले एमालेमा केन्द्रीय अध्यक्ष केपी ओलीलगायतका नेताहरूकै निरन्तरताको रणनीति देखिन्छ । नेतृत्वमा एकै व्यक्तिको निरन्तरताका लागि ७० वर्षे उमेरहद नै हटाउनुभएको हो भन्ने शिलापत्रको प्रश्नमा उपमहासचिव गुरुङ भन्छन्, ‘उमेरहद हटाउँदै गर्दा अर्को महाधिवेशनमा पनि केपी ओली नै अध्यक्ष बन्छन् भन्या छौँ र हामीले ?’

प्रकाशित मिति: शुक्रबार, भदौ १५, २०८० १९:००