रजस्वलाको रगत देखिने गरी टिभीमा विज्ञापन आएपछि...

A+ A A-

गत महिना अस्ट्रेलियामा महिनावारी भएकी महिलाले प्रयोग गर्ने स्यानेटरी प्याड उत्पादन गर्ने कम्पनी लिब्राको विज्ञापन प्रसारण भयो ।

जसमा रजस्वलाका समयमा आएको रगत लागेको दृश्य समावेश थियो । सो विज्ञापनमा कट्टु र एउटी महिलाको खुट्टामा रगत लागेको देखाइएको थियो ।

सो विज्ञापन अनुपयुक्त भएको भन्दै करिब ६ सय वटा उजुरी परे । दर्शकहरुले विज्ञापनविरुद्ध अस्ट्रेलियामा गरेका यी सबैभन्दा बढी उजुरी हुन् । यसरी ठूलो मात्रामा उजुरी परेपछि त्यसबारेमा अनुसन्धान गरियो ।

अस्ट्रेलियाको टेलिभिजन नियमनकारी निकायले अनुसन्धान गर्दै सो विज्ञापन प्रसारण गर्दा मापदण्ड उल्लंघन नभएको निष्कर्ष निकालेको छ । सो निकायले विज्ञापनविरुद्ध परेका उजुरी खारेल गर्दै त्यसले दिन खोजेको सन्देशको प्रशंसा गरेको छ ।

‘एड स्ट्यान्डर्ड्सले सो अभियानले ‘समानतालाई प्रवर्धन गरेको र महिनावारीसँग जोडिएका भ्रमलाई चिरिरहेको’ देखिएको बताएको छ ।

लिब्राको माउ कम्पनी एसेलियो केअरले महिनावारी हुँदा महिला तथा किशोरीहरूले खेप्ने गरेको लज्जाको अनुभूति र गलत विश्वासलाई विज्ञापनले सम्बोधन गरेको प्रतिक्रिया दिएको छ ।

सो विज्ञापनमा लेखिएको थियो, ‘महिनावारी सामान्य कुरा हो । महिनावारी भएको देखाउनु पनि त्यस्तै हुनुपर्छ ।’

तर उजुरीकर्ताहरूले विज्ञापनको प्रस्तुति ‘अपमानजनक र अनुपयुक्त’ र ‘घिनलाग्दो’ भएको तर्क गरेका थिए ।

जसबारे जाँच गर्दै अस्ट्रेलियाको नियमनकारी निकायले केही दर्शकहरूले शरीरबाट महिनावारीको बेला निस्कने पदार्थ हेर्न नचाहेको तर विज्ञापनले आचारसंहितालाई नमिचेको जनाएको छ ।

प्रतिवेदनमा नियामकहरूले सो विज्ञापनमा कुनै पनि नकारात्मक शब्द वा चित्र नरहेको उल्लेख गरेका छन् ।

विज्ञापनले रजस्वलाका विषयमा लज्जित हुनुपर्ने वा रजस्वला भएका महिलालाई कम आँक्ने आशयको सन्देश नदिएको पनि निष्कर्ष छ ।

एसेलिओ केअरले सो विज्ञापनको सम्बन्ध आफ्नो भगिनी कम्पनी एसीटीको #BloodNormal अभियानसँग भएको जनाएको छ ।

प्रकाशित मिति: बिहीबार, असोज २, २०७६ २३:३८