माओवादी नेताहरूमा लोभ पलायो, हामी बिग्रिएकै हौँ : अग्नि सापकोटा (भिडियो वार्ता)

माओवादी नेताहरूमा लोभ पलायो, हामी बिग्रिएकै हौँ : अग्नि सापकोटा (भिडियो वार्ता)

A+ A A-

नेकपा माओवादी केन्द्रका उपाध्यक्ष अग्नि सापकोटाले आफ्नो पार्टीभित्र गम्भीर समस्या रहेको स्वीकार गरेका छन् । पार्टीमा समस्या रहेकै कारण माओवादीले तीनमहिने कार्यक्रम लिएर जनतामा गएको उल्लेख गर्दै उनले फेरि २०६४ कै जस्तो शक्ति निर्माण गर्ने दाबी गरे ।

कम्युनिस्ट पार्टी विचारले चल्ने भए पनि विचारमा विकास गर्न नसकेका कारण अहिलेको समस्या आएको सापकोटा बताउँछन् । शिलापत्रलाई अन्तर्वार्ता दिँदै उनले भनेका छन्, ‘पार्टीका नेताहरूमा लोभ पलायो । जसले गर्दा पार्टी बिग्रिँदै गएको सत्य हो ।’

मूलधारका पार्टीको गम्भीर कमजोरीका कारण जनतामा निराशा आएको र केही व्यक्ति समूहले अराजकता फैलाउने काम गरेको हुँदा मुख्य पार्टी नै जिम्मेवार हुनुपर्ने उनको धारणा छ ।

पार्टी केन्द्रीय कमिटी बैठक सकिएको दुई सातापछि अध्यक्ष पुष्पकमल दाहाल प्रचण्डको राजनीतिक प्रतिवेदन आएको छ । त्यसले औँल्याएका समस्या समाधानका लागि माओवादी निर्मम बन्दै आगामी दिनमा पार्टीलाई लयमा फर्काउने उनको विश्वास छ ।

‘हामीभित्र खराबी छ त हामीले नै भनिरहेका छौँ, यसको निदान पनि खोजिरहेका छौँ । हामीलाई विश्वास गर्नुस्,’ उनले भनेका छन् ।

प्रचण्डको प्रतिवेदनमा माओवादी नेता/कार्यकर्ता शक्ति र पैसाका लागि जे पनि गर्छन् भनिएको छ । त्यस्तै हो भन्ने प्रश्नमा पार्टी प्रवक्तासमेत रहेका सापकोटा भन्छन्, ‘त्यही भएर त निर्मम हुने भनेको हो नि ।’

अध्यक्ष प्रचण्डले प्रतिवेदनमा नेता /शक्ति केन्द्रमा धाउने गरेको टिप्पणी गरेका छन् । तर, उनी आफैँ सत्तामा पुग्न जे पनि गर्ने आरोप खेपिरहेका छन् । प्रचण्ड स्वयम्‌ बालुवाटार र सिंहदरबार छाड्न नचाहने प्रवृत्तिले विरोधाभाष सिर्जना गर्दैन भन्ने प्रश्नमा सापकोटाको जवाफ छ, ‘अध्यक्ष प्रचण्ड पनि गाउँ जाने कुरो छ ।’

सरकारले विभिन्न प्रकरणको अनुसन्धान थालेपछि सत्ता गठबन्धनभित्रै विवाद उत्पन्न भएको छ । खासगरी माओवादी केन्द्रले आफ्ना नेता जोगाएर अरु पार्टीका नेतामाथि मात्र निशाना साँधेको आरोप छ । त्यस्तोमा कांग्रेस सभापति शेरबहादुर देउवाले गृहमन्त्री नारायणकाजी श्रेष्ठको राजीनामा मागेको चर्चा पनि छ ।

गृहमन्त्रीलाई राजीनामा गर्न गठबन्धनभित्र दबाब हो भन्ने प्रश्नमा माओवादी केन्द्रका प्रवक्ता सापकोटा भन्छन्, ‘व्यक्ति–व्यक्तिको बेखुसीको कुरा के भयो र ? कांग्रेसले आधिकारिक बैठकबाटै यो गठबन्धनको निरन्तरता भनेकै छ ।’

‘एउटै पार्टीको सरकारहुँदा त कैयन् समस्या भएर सरकार नचल्ने स्थिति हुन्छ, यो त गठबन्धन हो,’ उनले भनेका छन्, ‘केही बाध्यता अप्ठ्यारा भए पनि २०८४ को चुनावसम्म हामी सँगै हुन्छौँ ।’

सापकोटासँगको विस्तृत भिडियो अन्तर्वार्ताः