मिनी संसदले पायो पूर्णता, निरीक्षण र अनुगमन सभापतिहरूको प्राथमिकता

A+ A A-

मिनी संसदले पाँच महिनापछि पूर्णता पाएको छ । १५ जेठमा प्रतिनिधिसभाको १० वटा विषयगत समिति गठन भए पनि दलहरूबीच भागवण्डा नमिल्दा सभापतिको चयनमा ढिलाइ भएको थियो । सभापति नहुँदा ज्येष्ठ सदस्यले बैठक सञ्चालन गर्दा प्रभावकारी भएको थिएन ।

दलहरूबीच सहमति भएपछि सोमबार सभापतिहरू चयन भएका हुन् । १० वटै विषयगत समितिका सभापतिहरू निर्विरोध निर्वाचित भएका हुन् । निर्वाचित सभापतिहरूलाई सभामुख देवराज घिमिरेले पद तथा गोपनीयताको शपथ खुवाएका छन् ।

सुशासन मुख्य प्राथमिकता: सभापति खतिवडा

निर्वाचित भएपछि सभापतिहरूले समितिलाई प्रभावकारी र सरकारलाई जवाफदेही बनाउने प्रतिबद्धता जनाएका छन् । निरीक्षण र अनुगमनलाई पनि प्राथमिकतामा राखेको उनीहरूको भनाइ छ ।

‘देश कस्तो अवस्थामा छ, सबैलाई थाहा छ । सरकारले केही गर्न खाजेको छ । तर, ल्हार्क्याल लामाजस्ता व्यक्ति नियुक्त भइरहेका छन् । यसले सरकारप्रति वितृष्णा बढाउँछ । मुलुकलाई के गर्दा फाइदा हुन्छ, त्यसतर्फ समितिले काम गर्छ । सुशासनका लागि समितिले काम गर्छ,’ राज्य व्यवस्था समितिका सभापति रामहरि खतिवडाले भने ।

जनताको करलाई सुरक्षित बनाउने: सभापति पोखरेल

लेखा समितिमा विजयी भएका ऋषिकेश पोखरेल महालेखाको प्रतिवेदनलाई आधार मानेर बेरुजुलाई प्राथमिकतामा राखेको बताउँछन् । अहिले मुलुकको आर्थिक स्थिति जटिल अवस्थामा रहेकाले आर्थिक अनुशासन कायम गर्न भूमिका निभाउने उनको योजना छ ।

‘अहिलेको अवस्था डरलाग्दो छ । जनताको करलाई सुरक्षित गर्ने र सरकारले गरेको खर्चलाई पारदर्शी बनाउन समितिले भूमिका खेल्छ । सरकारलाई आवश्यक सुधारका लागि राय सुझाव दिन्छौँ,’ सभापति पोखरेलले भने ।

अर्थलाई चलायमान बनाउनुपर्नेछ: सभापति चालिसे

अर्थ समितिका सभापति सन्तोष चालिसे मुलुकको आर्थिक स्थितिको सुधारमा समितिले काम गर्ने बताउँछन् । समितिमा रहेका पूर्वअर्थमन्त्रीहरू र विज्ञसँग छलफल गरेर अर्थतन्त्र सुधारका लागि प्रभावकारी काम गर्ने उनको योजना छ ।

‘विज्ञसँगथ छलफल गरेर र कसरी मुलुकको आर्थिक स्थिति सुधार गर्ने भन्नेमा समितिले काम गर्छ । अर्थतन्त्रलाई चलनायमान बनाउनुपर्छ,’ उनले भने ।

बालगृहमा भएको झडपको अनुगमन गर्छौं : सभापति साह

महिला समितिका सभापति किरण साहले भक्तपुरको बाल सुधारगृहमा भएको झडपको अनुगमन गर्ने बताएका छन् ।

‘बालबालिकाको सुधारगृहमा भएको घटना के हो, त्यसको तत्काल अनुगमन गर्छौं । महिला सशक्तीकरण, मधेशी, थारू, दलितलगायतका विषयमा योजना बनाएर काम गर्छौं,’ उनले भने । सभापति साहले आज पनि संस्कृतमा शपथ खाएका थिए । यसअघि प्रतिनिधिसभा सदस्यको शपथ पनि उनले संस्कृतमा खाएका थिए ।

शान्ति प्रक्रियाको काम पूरा गर्ने : सभापति सुवेदी

कानुन न्याय तथा मानवअधिकार समिति बिमला सुवेदी शान्ति प्रक्रियाको बाँकी काम पूरा गर्न समितिले प्रभावकारी भूमिका निभाउने बताउँछिन् ।

‘शान्ति सम्झौताअनुसार केही काम गर्न बाँकी छ । त्यसलाई पूरा गर्न टीआरसी विधेयक पनि यही समितिमा छ । समितिको क्षेत्राधिकारभित्र रहेर पूरा गर्न भूमिका निभाउँछु,’ उनले भनिन् ।

बन्द उद्योग खोल्न पहल गर्ने : सभापति खान

उद्योग, वाणिज्य तथा श्रम उपभोक्ता हित समिति सभापति अब्दुल खानले बन्द भएका उद्योग खोल्नका लागि अनुगमन र निरीक्षण गर्ने बताएका छन् ।

‘उद्योगधन्दा बन्द अवस्थामा छन् । अनुगमन र निरीक्षण गरी सरकारलाई आवश्यक निर्देशन र रायसुझाव दिन्छौँ,’ उनले भने । सम्बन्धित मन्त्रालयमा कहाँ समस्या छ, त्यसको अवरोध हटाउने विषयमा पनि काम गर्ने उनले बताए । ‘ऐनहरू बनाउनुपर्नेछ । कस्ता ऐन आवश्यक छ, त्यसको अध्ययन गर्छौं,’ उनले भने ।

शिक्षा ऐन मुख्य प्राथमिकता: सभापति जोशी

शिक्षा तथा स्वास्थ्य समितिका सभापति भानुभक्त जोशी तत्काल शिक्षा ऐन बनाउन समितिले प्रभावकारी भूमिका खेल्ने बताउँछन् ।

‘शिक्षा ऐन ल्याउनु पर्नेछ । जनचासोको स्वास्थ्य पनि छ । ऐनलाई पहिलो प्राथमिकतामा राखेको छु,’ सभापति जोशीले भने । जनतासँग प्रत्यक्ष जोडिने शिक्षा, स्वास्थ्य, सूचना, युवा र खेलकुद भएकाले समस्या पहिचान गरी सरकारलाई आवश्यक राय सुझाव दिने उनले बताए ।

परराष्ट्र नीतिमा काम गर्छु : सभापति यादव

अन्तर्राष्ट्रिय सम्बन्ध र पर्यटन समिति सभापति राजकिशोर यादवले पराराष्ट्रविज्ञहरूसँग तत्काल छलफल गर्ने बताए ।

‘पूर्वप्रधानमन्त्रीहरू, मन्त्रीहरू पनि यो समितिमा हुनुहन्छ । तत्काल परराष्ट्रविज्ञहरू बोलाएर छलफल गर्छु । भारत र चीनको बीचमा रहेको नेपालले कस्तो नीति अपनाउने यसमा काम गर्छु,’ उनले भने । आर्थिक सुधारका लागि पर्यटनको क्षेत्रमा पनि समितिले प्रभावकारी काम गर्ने उनले बताए ।

कृषि सहकारी तथा वातावरण समिति सभापति आरजु राणा र पूर्वाधार विकास समिति सभापति दीपकबहादुर सिंहले पनि समितिको क्षेत्राधिकारभित्र रहेर सरकारलाई जवाफदेही बनाउन भूमिका खेल्ने बताए ।