मिनी संसद : महिला समितिमा पुरुष सभापति, राप्रपा भागवण्डामा पर्‍यो, रास्वपा परेन

मिनी संसद : महिला समितिमा पुरुष सभापति, राप्रपा भागवण्डामा पर्‍यो, रास्वपा परेन

A+ A A-

प्रमुख प्रतिपक्षी दल एमालेले संसदको महिला तथा सामाजिक मामिला समितिको सभापतिमा किरण साहलाई उम्मेदवार बनायो । महिला समितिको सभापतिमा उनको मात्र उम्मेदवारी परेकाले भोलि (सोमबार) निर्विरोध निर्वाचित भएको घोषणा हुनेछ ।

महिला समितिमा पुरुषलाई सभापतिको उम्मेदवार बनाएकोमा एमालेकै सांसदहरूले विरोध गरेका छन् । ‘महिला समितिमा महिलाको संख्या धेरै छ । क्षमतावान् महिला सांसदहरू हुनुहुन्छ । तर, सभापतिमा पुरुषलाई अगाडि सारियो,’ महिला समितिमा रहेकी एमालेकी एक सांसदले गुनासो राखिन् ।

तर, पार्टीले गरेको निर्णय मान्न बाध्य भएको उनले बताइन् । ‘स्वतन्त्र जितेर एमालेमा आउनु भएकाले पनि उहाँलाई सभापति बनाउन खोजिएको होला । यो समिति महिला, दलित, मधेसी मुस्लिमलगायतका आयोग पनि हेर्ने हो । पार्टीको निर्णयलाई मान्नुपर्छ,’ उनले भनिन् ।

रौतहट २ बाट साहले स्वतन्त्र उम्मेदवारका रूपमा चुनाव जितेका थिए । मन्त्री बनाउने आश्वासनमा उनी एमाले प्रवेश गरेको चर्चा छ । मन्त्री नभएपछि उनलाई समिति सभापति बनाउन एमाले तयार भएको हो । समिति सभापति बनाउनका लागि कानुन समितिबाट उनलाई महिला समितिमा ल्याइएको थियो ।

सभापतिका उम्मेदवार साह महिला समितिमा महिला नै सभापति हुनुपर्ने कानुनी व्यवस्था नरहेको बताउँछन् । ‘यो महिला समिति मात्र होइन । महिला, बालबालिका, ज्येष्ठ नागरिक, दलित, मधेशीलगायतको आयोग हेर्ने समिति हो । समितिमा पनि ३३ प्रतिशत महिला सुनिश्चित हुने गरी पार्टीले निर्णय गरेको छ,’ उनले भने, ‘सबैको भावनालाई समेटेर काम गर्छु ।’

एमालेले समानुपातिक र समावेशीकै आधारमा समिति सभापति चयन गरेको दाबी गरेको छ । प्रतिनिधिसभाका १० वटा विषयगत समिति, राष्ट्रियसभा र प्रतिनिधिसभाका दुईवटा संयुक्त समितिमा गरी एमालेले तीनवटा समिति पाएको थियो । लेखा समितिमा ऋषिकेश पोखरेल, महिलामा साह र अर्को संयुक्त समितिमा महिला पठाउने गरी मिलाइएको बताउँछन् एमाले सचेतक महेश बर्तौला ।

‘तीनवटा समिति पाएका थियौँ । संयुक्त समितिमा महिलालाई पठाउँछौँ । महिला समितिको क्षेत्र फराकिलो छ । महिला, बालबालिका, ज्येष्ठ नागरिक, दलित, मधेशीलगायतको आयोग हेर्ने भएकाले उहाँलाई उठाएका हौँ,’ उनले भने । राज्यका निर्देशक सिद्धान्त समिति सभापतिमा महिला पठाउने एमालेको तयारी छ ।

माओवादीले छोड्यो, राप्रपाले पायो

माओवादीका माधव सापकोटा पूर्वाधार विकास समितिको सभापतिको उम्मेदवारी दिने अन्तिम चरणमा थिए । कोशी प्रदेशमा सरकार बनाउन राष्ट्रिय प्रजातन्त्र पार्टीले सहयोग गर्ने भएपछि उक्त समिति राप्रपालाई दिन माओवादी तयार भयो ।

‘कोशी प्रदेशमा राप्रपा सत्ता गठबन्धनलाई सहयोग गर्न तयार भएपछि सभापति दिन सत्ता गठबन्धन सहमत भएको हो,’ सापकोटाले भने । र, राप्रपका दीपक सिंहले पूर्वाधार समितिको सभापतिमा उम्मेदवारी दर्ता गराए ।

madhav deepak1693124678.jpg

कोशी प्रदेश सरकारलाई राप्रपाले समर्थन गर्ने

भागवण्डामा सामेल भएन रास्वपा

संसदको चौथो शक्ति राष्ट्रिय स्वतन्त्र पार्टी भने सत्तारुढ र प्रमुख प्रतिपक्षी दलको भागवण्डामा परेन । अन्तिम समयमा रास्वपालाई पनि एउटा समिति दिन सत्तारुढ दल तयार भएका थिए । तर, रास्वपाले अस्वीकार गर्‍यो । र, एक्लै उद्योग समितिमा उम्मेदवारी दर्ता गरायो ।

रास्वपाबाट गणेश पराजुलीले उद्योग समितिमा उम्मेदवारी दिए । ‘अन्तिममा प्रस्ताव आएको थियो । तर, पार्टीले निर्णय गरिसकेकाले भागवण्डामा सामेल भएनौँ । लोकतान्त्रिक प्रक्रियामा जाने निर्णय गरेका हौँ । जुन समितिमा उम्मेदवार दिन हाम्रो क्षमताले भ्याउँछ, त्यसमा दिएका हौँ,’ रास्वपाका प्रमुख सचेतक सन्तोष परियारले भने ।

कुन समितिमा क–कसको उम्मेदवारी ?

प्रतिनिधिसभाअन्तर्गतका १० वटा विषयगत समितिको सभापतिका लागि उम्मेदवारी दर्ता भएको छ । कांग्रेसले तीनवटा समितिको सभापतिका लागि उम्मेदवारी दिएको छ । कांग्रेसका रामहरि खतिवडाले राज्य व्यवस्था समिति, डा. आरजु राणा देउवाले कृषि सहकारी तथा वातावरण समिति र सन्तोष चालिसेले अर्थ समितिको सभापतिका लागि उम्मेदवारी दर्ता गरेका छन् ।

एमालेका किरण साहले महिला समिति र ऋषिकेश पोखरेलले लेखा समितिको सभापतिमा उम्मेदवारी दर्ता गराएका छन् ।

यसैगरी, कानुन न्याय तथा मानवअधिकार समितिको सभापतिमा माओवादी केन्द्रकी विमला सुवेदी, पूर्वाधार विकास समितिको सभापतिमा राप्रपाका दीपकबहादुर सिंह, स्वास्थ्य तथा शिक्षा समितिको सभापतिमा नेकपा एकीकृत समाजवादीका भानुभक्त जोशी तथा अन्तर्राष्ट्रिय सम्बन्ध र पर्यटन समितिको सभापतिमा जसपा नेपालका राजकिशोर यादवको उम्मेदवारी परेको छ ।

उद्योग, वाणिज्य तथा श्रम उपभोक्ता हित समितिको सभापतिमा सत्तारुढ दल जनमत पार्टीका अब्दुल खान र प्रतिपक्षी दल राष्ट्रिय स्वतन्त्र पार्टीका गणेश पराजुलीको उम्मेदवारी परेको छ । उद्योग समितिबाहेक अन्य नौवटा समितिका सभापति भने निर्विरोध चयन हुने भएका छन् । निर्विरोध भएका सभापतिहरूको घोषणा भोलि (सोमबार) औपचारिक रूपमा गरिनेछ ।