अत्यासलाग्दो हेटौँडा-काठमाडौं सडक, ज्यान जोखिममा राखेर यात्रा गर्छन् यात्रु

अत्यासलाग्दो हेटौँडा-काठमाडौं सडक, ज्यान जोखिममा राखेर यात्रा गर्छन् यात्रु

A+ A A-

मकवानपुरको भीमफेदी गाउँपालिका–२, भैँसे नजिकै खसेको पहिरोमा परेर एक जना प्रहरी जवानको २६ साउनमा मृत्यु भयो । जिल्ला प्रहरी कार्यालय मकवानपुरमा दरबन्दी भई हाल भैँसे प्रहरीचौकीमा कार्यरत प्रहरी जवान जाजरकोटको शिवालय नगरपालिका–८ का २२ वर्षीय कृतिबहादुर नेपालीको मृत्यु भएको हो ।

कृतिबहादुरको भैँसेबाट भीमफेदी बजारतर्फ जाने क्रममा पहिरोमा परेर मृत्यु भएको थियो । नेपालीको टाउकोमा पहिरोसँगै आएको ढुंगाले लागेको थियो । उनीमाथि खसेको पहिरो हेटौँडा-काठमाडौं जोड्ने छोटोमार्गअन्तर्गतको भैँसे-भीमफेदी सडकखण्ड हो । प्रदेश सरकारले उक्त सडकखण्ड निर्माण गरिरहेकाले भित्तो काट्दा पहिरोको उच्च जोखिम छ ।

यतिबेला मध्य बर्खा छ । मनसुन सक्रिय भइरहेकाले सडक यात्रा जोखिम बन्ने नै भयो । हेटौँडा-काठमाडौं जोड्ने छोटा मार्ग भने अत्यासलाग्दा छन् । हेटौँडा र काठमाडौंलाई आधा दर्जन सडक सञ्जालले जोडेको छ । धेरै सडक सञ्जालले दुई राजधानीलाई नजिक बनाउन खोजे पनि यात्रुका लागि आरामदायी र जोखिम नभएका सडक भने छैनन् ।

हेटौँडादेखि काठमाडौं नपुञ्जेल यात्रुलाई यात्रामा कुनै आरामदायी महसुस नभएको यात्रुहरूकै अनुभवबाट पाइन्छ । हेटौँडा-काठमाडौं जोड्न भैँसे-भीमफेदी-फाखेल-फर्पिङ-बल्खु र भैँसे-भीमफेदी-सिस्नेरी-फर्पिङ-बल्खु सडकखण्ड छोटा मार्ग हुन् । लामो दूरीको पुरानो त्रिभुवन राजपथ र अलिक छोटो कान्ति लोकपथ पनि छन् ।

जिल्लाको उत्तरी क्षेत्रस्थित कुलेखानी नजिक पुगेपछि थाहा नगरपालिकाको चित्लाङ हुँदै गणेशमान मार्गबाट नागढुंगा पुग्न पनि सडक छ । इन्द्रसरोबरको महालक्ष्मी खोलाबाट चन्द्रगिरी हुँदै कलंकी नजिकको सतुङ्गल पुग्न अर्को छोटो वैकल्पिक मार्ग पनि छ ।

सबैभन्दा लामो दूरीको अर्थात् हेटौँडाबाट चितवन-मुग्लिन हुँदै मलेखु निस्किएर वा सिन्धुलीबाट काभ्रेको धुलिखेल निस्किएर पनि काठमाडौं उपत्यका प्रवेश गर्न सडक सञ्जाल छन् । तर, मकवानपुरबासीले जिल्लाको उत्तरी क्षेत्रका छोटा सडक नै नियमित प्रयोग गर्ने गरेका छन् । छोटो मार्गका सबै सडक भने जीर्ण भएकाले यात्रुका लागि अत्यासलाग्दो यात्रा बनिरहेको छ ।

हिउँदमै पनि जोखिमको यात्रा गर्नुपर्ने छोटो मार्गमा बर्खा लागेपछि यात्रुहरू अत्यासलाग्दो अवस्थाबाट गुज्रिएका हुन् । यसअघि काठमाडौंबाट चन्द्रागिरीडाँडा हुँदै इन्द्रसरोबर गाउँपालिका-५ बाट हेटौँडा आएकी हेटौँडा-७, नागस्वतीकी आशा श्रेष्ठलाई फेरि काठमाडौं जान सिमरा विमानस्थलसम्म पुर्‍याएको छ ।

उनले भिरालो र साँघुरा कच्ची सडक एकपटक यात्रा गरेपछि पैसा खर्च गरेरै सिमराबाट २० मिनेटमै प्लेनमार्फत काठमाडौं पुगेकी हुन् । ‘छोराको उपचार गराउन सुरुमा जाँदा कान्ति लोकपथबाट गएको आउँदा चन्द्रगिरीडाँडा हुँदै आएको मेरो त सात्तो गयो । दोस्रोपटक उपचार गराउन जाँदा पैसा खर्च गरेरै भए पनि सिमराबाट गएँ’, श्रेष्ठले भनिन् ।

श्रेष्ठजस्ता धेरै यात्रु कष्टपूर्ण र ज्यान नै जोखिममा राखेर हेटौँडा-काठमाडौं दैनिक यात्रा गरिरहेका हुन्छन् । सडक जीर्ण भए पनि सयौँको संख्यामा चल्ने टाटासुमोले यात्रुलाई सकभर सुरक्षित रूपमै लैजाने-ल्याउने गराइरहेको सुमोका चालक प्रकाश घिमिरे बताउँछन् । यतिबेला छोटा मार्गहरू हिलाम्मे भएका छन् ।

हेटौँडादेखि भैँसेसम्म सडक कालोपत्रे, भैँसेदेखि भीमफेदीसम्म कच्ची (निर्माणाधीन) सडक, भीमफेदीबाट कुलेखानीसम्म साँघुरा तर पूरै कालोपत्रे सडक छन् । कुलेखानीदेखि फर्पिङसम्मै सडक हिलाम्मे छन् । फर्पिङदेखि बल्खुसम्म सडक फराकिलो भए पनि खाल्डाखुल्डीले दुर्घटनाको जोखिम उत्तिकै रहेको चालक घिमिरे बताउँछन् ।

६५ वर्षअघि ट्रयाक खोलिएको हेटौँडाबाट ललितपुरको सातदोबाटो जोडिने कान्तिलोकपथ सडक पनि पहिरोको जोखिम छ । कान्ति लोकपथमा सामान्य वर्षा भएपछि पहिरो आउने गरेको छ । हरेक पटकको वर्षामा कान्ति लोकपथ अवरुद्ध नभएको रेकर्ड छैन । अन्य सडकको तुलनामा पुरानो तर लामो दूरीको त्रिभुवन राजपथबाट भने सुरक्षित यात्रा गर्न सकिने यात्रुहरू बताउँछन् ।

१ सय ३२ किमी लामो त्रिभुवन राजपथ जीर्ण बन्दै गएको छ । लामो समयदेखि पिच उप्किएर सडकमा खाल्डाखुल्डी बढेका छन् । भैँसेबाट थाहा नगरपालिका हुँदै नौबिसे जोडिने त्रिभुवन राजपथअन्तर्गत केही ठाउँ पहिरोको जोखिम रहेको र धेरै घुमाउरो भएकाले वर्षामा यात्रा गर्न सहज भने नभएको गुनासो छ ।

गत वर्षको अविरल वर्षाका कारण आएको बाढी र पहिरोले बागमती प्रदेशको सदरमुकाम हेटौँडा र संघीय राजधानी काठमाडौंबीचको सडक सम्पर्क टुटेको थियो । यस वर्ष वर्षा भइरहे पनि सम्पर्क नै भने नटुटेको जिल्ला प्रहरी कार्यालय मकवानपुरले जनाएको छ । बागमती प्रदेश सरकारको यातायात पूर्वाधार निर्देशनालयले प्याकेजमा ठेक्का लगाएर छोटो मार्गको निर्माण गरिरहेको छ ।

सडक विस्तारको काम विगतका वर्षदेखि जारी रहे पनि हालसम्म निर्माणले पूर्णता पाउन सकेको छैन । सडक निर्माणमा प्रदेश सरकारले चासो नदिँदा यात्रुहरू जोखिम मोलेर यात्रा गर्न बाध्य छन् । हेटौँडा-भैँसे सडकखण्डमा भीमफेदी गाउँपालिका-१, बाघझोरामा निरन्तर बाढीले साना सवारीसाधन बगाउने र क्षति पुर्‍याउने भइरहँदा पनि सरकारले एउटा पुल निर्माणको योजना बनाउन सकेको छैन ।

प्रकाशित मिति: आइतबार, भदौ १०, २०८० १२:२४