बबरमहल दरबारः भत्केपछि भागाभाग, बनेपछि खोसाखोस (भिडियो)

A+ A A-

वि.सं १९७० सालमा चन्द्रशमशेरले आफ्नो छोरा बबरशमशेर राणाको निम्ति लण्डनको बकिङ्घम दरबारको स्वरूपमा निर्माण गरेको बबरमहल अहिले तीन सरकारी निकायको खोसाखोसमा छ ।

१९९० सालको भूकम्पपछि १९९१ मा यस दरबारको जीर्णोद्धार गरिएको थियो । राणाकालमा बबरशमशेरले निर्माण गरेको यो भवनको आधा–आधा भाग २०७२ सालसम्म सडक विभाग र महालेखापरीक्षकको कार्यालयले उपयोग गरेका थिए ।

२०७२ सालको भूकम्पका कारण क्षत्विक्षत् बनेको यो दरबारको पुनःनिर्माणको काम अझै पूरा भइसकेको छैन । करिब ८६ करोड लागतमा २०७८ असार मसान्तसम्ममा सम्पन्न गर्ने गरी पुनर्निर्माणको काम सुरु भए पनि कारोनाका कारण बल्ल पुनःनिर्माणले अन्तिम रूप पाएको छ ।

तर, यस भवन प्रयोगको विषयलाई लिएर सडक विभाग, महालेखा परीक्षकको कार्यालय र जिल्ला निर्वाचन कार्यालयबीच यतिखेर विवाद चर्किएको छ । गत शुक्रबार महालेखा परीक्षकको कार्यालयले टाँसेको बोर्ड निकालेर सडक विभागका कर्मचारी महालेखाविरुद्ध धर्नामा उत्रिए । सोमबार पुनः नेमप्लेट टाँस्न पुगेका महालेखाका कर्मचारीहरूलाई विभागका कर्मचारीले प्रवेश गर्नै दिएनन् ।

यता सोमबार आफूहरूले पनि बबरमहलमा ठाउँ पाउनुपर्ने भन्दै जिल्ला निर्वाचन कार्यालयका पनि कर्मचारी दाबी गर्दै पुगे । विगतमा महालेखाले सबै छोड्ने सहमतिमै मन्त्रिपरिषदबाट निर्णय भएको र विभागले प्रबलीकरण गरेको थियो । तर, अहिले महालेखा तथा निर्वाचन आयोगले बबरमहल दरबार हडप्न लागेको भन्ने सडक विभागका प्रवक्ता रामहरि पोखरेलको आरोप छ ।

करिब २२ रोपनी क्षेत्रफलमा बनेको करिब ३०० भन्दा बढी कक्ष रहेको बबरमहल दरबारमा महालेखापरीक्षकको कार्यालयले करिब ३० वटा कक्ष र जिल्ला निर्वाचन कार्यालयले १६ वटा कक्षमा आफ्ना निर्देशनालयहरू राख्न खोजेपछि विवाद छ । महालेखालाई रोक्न प्रवलीकरण नसकिँदै सडक विभागले बुधबारदेखि आफ्नो कार्यालयका सामान हतार–हतार सारिरहेको छ ।

‘सरकारकै जमिन हो, सरकारकै भवन हो, त्यहाँभित्र हाम्रो कार्यालय पनि थियो । प्रवलीकरणका लागि सहयोग गर्न अन्यत्र सर्‍यौँ, अब काम सकिएपछि त्यहाँ फर्किन पाउनु हाम्रो पनि अधिकारकै कुरा हो,’ जिल्ला निर्वाचन कार्यालयका सूचना अधिकारी बबिन अधिकारीले शिलापत्रसँग भने ।

प्रकाशित मिति: शुक्रबार, भदौ ८, २०८० १९:२६