ड्रागन फ्रुट्स खेतीमा लागेका ७६ वर्षे 'हेडसर'- अस्ट्रेलिया गएका छोराबुहारीलाई गाउँ फर्किने बनाउँछु

ड्रागन फ्रुट्स खेतीमा लागेका ७६ वर्षे 'हेडसर'- अस्ट्रेलिया गएका छोराबुहारीलाई गाउँ फर्किने बनाउँछु

A+ A A-

शरीरमा तागत घट्दै गए पनि बालकृष्ण अर्यालको कृषि कर्मप्रतिको जाँगर घटेको छैन । ७६ वर्षीय उनकाे पहिचान शिरमा ढाका टोपी, शरीरमा पुराना कोट, पाइन्ट र कमिज हो । घर्कदो उमेरले चाउरिँदै गएको अनुहार, घट्दो हातपाखुराका तागत । उनकाे घर छेउको बारीमा पुग्दा लटरम्म फलेका ‘ड्रागन फ्रुट्स’ देखिन्छन् । दुई वर्षअगाडि लगाएको बिरुवाले अहिले फल दिन थालेपछि उनी दङ्ग छन् । बिहान सबेरैदेखि राति अबेरसम्म बारीमा बिताउने उनलाई खान लाउनको कुनै केही समस्या छैन ।

जेठा छोराबुहारी अमेरिका र कान्छो छोराबुहारी अस्ट्रेलिया बस्छन् । उनी आफैँ पूर्वशिक्षक हुन् । सानैदेखि नयाँ प्रकारका फलफूल खेतीमा रुचि राख्ने उनले ३८ वर्ष शिक्षण पेसा गरे । पन्ध्र वर्षअगाडि अवकाश भएका उनले दुई वर्षअगाडिदेखि व्यवसायिक ड्रागन फ्रुट्स खेती थालेका हुन् । दुई छोरा र दुई छोरीले विवाह गरेर आ-आफ्नो गर्न थालेपछि अहिले घरमा बुढाबुढी मात्र छन् । बूढेसकालमा सुखले आराम गरेरै खान्छु भने पनि उनलाई सहजै पुग्छ तर उन बाचुञ्जेल काम गर्नुपर्ने मान्यता राख्छन् ।

बागलुङको बडिगाड गाउँपालिका–५ का अर्यालले गाउँभन्दा पारि गुल्मीको मुसिकोट नगरपालिका–१ मा ड्रागन फ्रुट्स खेती गरेका छन् । उनकाे मुसिकोटमा पनि घर छ । गाउँमा दिन प्रति दिन घर रित्तिदैछन् । युवा शक्ति विदेश पलायन भइरहेका छन् भने, गाउँमा भएका बालबालिका र वृद्धवृद्धालाई पनि छोराछोरीले बजार लगेर राख्न थालेका छन् । खेतीयोग्य जमिन वनमाराले ढाक्न थाल्यो । कुनै बेला गरी खाने ठाउँ नहुँदा भोकभोकै बस्ने स्थानीय अहिले उर्वर भूमि बाँझो छोडेर विदेश तथा सहर पसेपछि उनीहरूलाई गाउँमा कसरी फर्काउने भन्ने चिन्ताले अचेल अर्यालाई सताइरहेको छ ।

विदेश जाने युवा र बजार पस्ने स्थानीयलाई गाउँमा रोक्न आफूले व्यावसायिक रूपमा ड्रागन खेती गर्न थालेको बालकृष्ण बताउँछन् । गाउँका खेतीयोग्य जमिनको सदुपयो गरी उत्पादन वृद्धि गरी गाउँमै लाखौँ कमाउने वातावरण सिर्जना गर्ने उनकाे भनाइ छ । गाउँघरमा आम्दानीका धेरै स्रोत हुँदाहुँदै पनि युक्त शक्ति विदेश पस्नु गलत भएको अर्याल बताउँछन् । पछिल्लो समय आधुनिक प्रविधिका कारण कृषिलाई सहज बनाएको र उत्पादन बढाउन टेवा पुर्‍याएको भन्दै युवालाई त्यसतर्फ आकर्षित गर्ने आफ्नो लक्ष्य रहेको उनकाे भनाइ छ ।

'उमेरले केही फरक पार्दैन, शरीरमा बल छ, काम गर्ने सीप छ, मलाई यतिकै बसेर खान पनि पुग्छ तर म बाजुञ्जेल सक्रिय जीवन बिताउनुपर्छ भन्ने लाग्छ, अहिले गाउँका सबै घर बारी खाली हुन थाले, अब मान्छेलाई कसरी गाउँमा टिकाउने होला ?', उनले भने । आफूले गाउँमै लाखौं कमाएमा बजारतिर लम्किइरहेका गाउँलेका पाइला रोकिन्छ कि भन्ने अपेक्षा रहेको उनी बताउँछन् ।

अहिले पनि गाउँमा उनलाई सबैले ‘हेडसर’ भन्छन् । बारीमा काम गर्नुका साथै उनले गाउँवरपरका युवा र स्थानीयलाई गाउँमै बस्न प्रेरित पनि गर्छन् । सरकारले गाउँका मान्छेलाई गाउँमै रोक्न नसके राज्य परनिर्भर बन्ने उनी बताउँछन् । आफूले यो खेतीलाई नमूना बनाएर अमेरिका र अस्ट्रेलियामा रहेका छोरा बुहारीलाई समेत गाउँ फर्काउने योजना बनाएकाे उनले सुनाए । २० लाख रुपैयाँबाट सुरु गरेको ड्रागन फ्रुट्स खेती बढाउँदै जाने सोचमा बालकृष्ण छन् । उनले लगाएका ड्रागनका बिरुवाले अहिले उत्पादन दिन थालेका छन् । पहिलोपटक उत्पादन दिन थालेका बिरुवा यस वर्ष १० क्विन्टल बढी ड्रागन फ्रुट्स बिक्री गर्ने उनकाे भनाइ छ ।

'यो फल बहुगुणी र पौष्टिकतत्वयुक्त हुन्छ, महँगो पनि पर्छ, मैले पठाउने भनेको काठमाडौं हो, त्यहाँ यसको मूल्य अहिले एक किलोको ६ सयदेखि आठ सय रुपैयाँसम्म पर्छ, अर्को वर्ष यसको दोब्बरतेब्बर फल्ने आँकलन छ, यसरी गाउँमा फल्ने उत्पादनलाई बजार पठाउन सके गाउँमै पनि लाखौँ आम्दानी गर्न सकिन्छ, विदेशबाट फलफूल आयात गर्न पर्दैन, खेतबारी आम्दानीका स्रोत हुन् यिनको सही प्रयोग गरेर विदेश गएका छोरा बुहारीलाई गाउँ फर्काउने लक्ष्य छ ।'

उनले गाउँपालिका/नगरपालिकाले कृषकका लागि बनेर करोडौँ बजेट खर्च गरेको भन्दै अहिलेसम्म आफूले कुनै पनि सहयोग नपाएको गुनासो गरे । स्थानीय सरकारले भूगोल र माटोअनुसार कृषकलाई उन्नत जातका बीउबिजन प्रदान गर्ने र समय–समयमा तालिम परामर्श दिएर व्यावसायिक बनाउन प्रेरित गरे धेरै युवा विदेश जानबाट रोकिने उनकाे भनाइ छ ।

उनले भने, 'काम गर्न पर्‍यो, काम गर्ने हो भने लाखौँ कमाउन सकिन्छ, आफ्नो गाउँ घरमा बारीमा काम गर्न लाज मान्ने, विदेश गएर जे गर्न पनि तयार भएर हुन्छ ? आफ्नो भूमिमा स्वाभिमानका साथ कर्म गर्ने हो भने, लाखौँ रकम यहाँ पनि कमाउन सकिन्छ, मेरा पनि छोरा भतिज विदेश गएका छन्, उनीहरूलाई त्यहाँ आनन्द छैन, जति आनन्द यहाँ पाउँथे ।'

प्रकाशित मिति: शनिबार, भदौ ९, २०८० ०६:००