समिति सभापति बन्न सांसदहरूको लबिङ, क–कसको दाबी ?

A+ A A-

सभामुख देवराज घिमिरेले संसदका विषयगत समिति सभापतिको चुनाव ११ भदौका लागि तोकेका छन् । प्रमुख दलका प्रमुख सचेतकसँग छलफल गरेपछि सभामुख घिमिरेले १० वटा विषयगत समिति सभापतिको चुनावको मिति तय गरेका हुन् । प्रतिनिधिसभा नियमावलीको नियम १७६ अनुसार सभापतिको निर्वाचन गर्न लागिएको हो ।

सत्तारुढ दल र प्रमुख प्रतिपक्षी एमालेबीच समितिमा भागवण्डा मिलिसकेको छ । कांग्रेसले ४, एमालेले ३, माओवादीले २, जसपाले १, नेकपा एसले १ र जनमतले १ समितिको सभापति पाउने सहमति भएको छ । निर्वाचनको मिति तय भएसँगै सांसदहरू सभापति बन्न तीव्र रूपमा लबिङ गर्न थालेका छन् । दुईवटा संयुक्त समिति सभापतिको निर्वाचनको मिति भने तोक्न बाँकी छ । तर, सभापतिमा भने सांसदहरूले दाबी गर्न थालेका छन् ।

कांग्रेसबाट क–कसको दाबी ?

अर्थ समितमा विनोद चौधरी र सन्तोष चालिसेले दाबी

संसदको ठूलो दल कांग्रेसले अर्थ समिति, कृषि सहकारी तथा प्राकृतिक स्रोत समिति, राज्य व्यवस्था तथा सुशासन समिति र संसदीय सुनुवाइ समिति कांग्रेसको भागमा परेको छ । अर्थ समितिमा विनोद चौधरी र सन्तोष चालिसेले दाबी गरेका छन् । चौधरी उद्योगी भएका कारण सभापति बनाउँदा स्वार्थ बाझिने भएकाले चालिसेको सम्भावना बढी रहेको कांग्रेसका एक सांसदले बताए । ‘दुवै जनाले दाबी गर्नुभएको छ । तर, चालिसेको सम्भावना धेरै छ,’ ती सदस्यले भने । सभापति शेरबहादुर देउवाले चालिसेलाई मन्त्रीको समेत आश्वासन दिएका थिए । सभापति देउवाले चालिसेलाई मन्त्री बनाउन नसकेपछि सभापतिको उम्मेदवार बनाउन लागेको कांग्रेसका नेताहरूको दाबी छ । चालिसे मन्त्री बन्ने आश्वासन पाएपछि संसदीय दलको निर्वाचनमा देउवा समूहमा खुलेका थिए ।

कृषिमा आरजु राणा, राज्य व्यवस्थामा रामहरि खतिवडा

कृषि समितिको सभापतिमा देउवापत्नी आरजु राणालाई उम्मेदवार बनाउने तयारी भइरहेको छ । ‘कृषि समितिमा उहाँ (आरजु)को नाम आइरहेको छ,’ कांग्रेसका एक नेताले भने । राज्य व्यवस्था तथा सुशासन समितिमा रामहरी खतिवडाको लगभग निश्चितजस्तै छ । सभापति बनाउनकै लागि उनलाई कानुन समितिबाट राज्य व्यवस्था समितिमा ल्याइएको छ ।

संसदीय सुनुवाइ समितिको निर्वाचनको मिति तोकिएको छैन । तर, यो समिति कांग्रेसको भागमा परेको छ । सभापतिका लागि ईश्वरी न्यौपाने र जीवन परियारले दाबी गरेका छन् । न्यौपाने सभामुखको निर्वाचनमा पराजित भएकाले समिति सभापतिमा उनले जोड गरिरहेकी छिन् । जीवन परियार शेखर कोइराला समूहका हुुन् भने न्यौपाने देउवा समूहकै हुन् । इतर समूहलाई एउटा समिति दिएमा परियार सभापति बन्न सक्छन् । परियार मन्त्रीका समेत दाबेदार थिए ।

लेखामा एमालेका ऋषिकेश पोखरेलकाे दाबी

प्रमुख प्रतिपक्षी एमाललेले सार्वजनिक लेखा समिति, महिला तथा सामाजिक मामिला समिति र राज्यका निर्देशक सिद्धान्त समिति पाउने सहमति भएको छ । एमाले स्रोतका अनुसार लेखा समिति सभापतिमा ऋषिकेश पोखरेललाई उम्मेदवार बनाउने तयारी छ । योगेश भट्टराई र गोकुल बाँस्कोटाको पनि चर्चा छ । महिला समितिमा एमालेका चार जना आकांक्षी छन् । शान्ति श्रेष्ठ, शोभा ज्ञवाली, ईश्वरी रिजाल र हर्कमाया विश्वकर्माको चर्चा छ ।

‘सिनियर चार जना छौँ । यसमध्ये पार्टीले जसलाई सिफारिस गर्छ उही सभापति हुने हो,’ एक सदस्यले भने । राज्यका निर्देशक सिद्धान्त समिति सभापतिको निर्वाचनको मिति तय नभएकाले एमालेले नामका विषयमा अझै छलफल चलाएको छैन । एमालेले सभापतिको उम्मेदवार कसलाई बनाउने भनेर छलफल नगरेको बताउँछन् सचेतक महेश बर्तौला । ‘नामका विषयमा छलफल भएको छैन,’ उनले भने ।

माओवादीबाट काे–काे ?

सरकारको नेतृत्व गरिरहेको माओवादी केन्द्रले कानुन, न्याय तथा मानवअधिकार समिति र पूर्वाधार विकास समिति पाउने सहमति भएको छ । पूर्वाधारमा माधव सापकोटा र उर्मिला माझी छन् । दुईमध्ये एक सभापतिको उम्मेदवार बन्नेछन् । बढी सम्भावना सापकोटाको भए पनि उनी मन्त्रीको दाबेदार भएका कारण सभापतिमा रुचि देखाएका छैनन् । कानुन समितिमा माओवादीबाट पूर्णबहादुर घर्ती, विमला सुवेदी र रामकुमार राईमध्ये एक जना हुनेछन् । माओवादी स्रोतका अनुसार कानुन समितिमा बढी सम्भावना विमला सुवेदीको छ ।

जसपाबाट राजकिशोर यादव, जनमतबाट अब्दुल खान, नेकपा एसबाट भानुभक्त जोशी

जसपाले अन्तर्राष्ट्रिय सम्बन्ध समिति पाउने सहमति भएको छ । यो समितिमा जसपाबाट राजकिशोर यादव छन् । जसपा स्रोतका अनुसार यादव सभापतिको उम्मेदवार बन्नेछन् । जनमत पार्टीले उद्योग तथा वाणिज्य र श्रम तथा उपभोक्ता हित समिति पाउने सहमति भएको छ । जनमतबाट अब्दुल खानलाई सभापतिको उम्मेदवार बनाउने तयारी छ । खानलाई समिति सभापतिको उम्मेदवार बनाउन कृषिबाट उद्योग समितिमा ल्याइएको छ । एकीकृत समाजवादीले शिक्षा तथा स्वास्थ्य समिति पाउने सहमति भएको छ । यो समितिमा नेकपा एसका भानुभक्त जोशी छन् । उनले सभापतिमा उम्मेदवारी दिने तयारी गरेका छन् ।

रास्वपा र राप्रपाले के गर्छ ?

सत्तारुढ दल र प्रमुख प्रतिपक्षी दलहरूबीच भागवण्डामा समितिको टुंगो लगाए पनि रास्वपा र राप्रपाको भागमा परेको छैन । अब यी दुई दलले आफ्नो पनि उम्मेदवार उठाउने वा के गर्ने भन्नेबारे थप निर्णय गर्ने भएका छन् । ‘संसदीय दलको बैठक बसेर के गर्ने निर्णय लिन्छौँ । बैठक भोलि या पर्सि बस्छ,’ रास्वपाका प्रमुख सचेतक सन्तोष परियारले भने । राप्रपाले पनि संसदीय दलको बैठक बसेर निर्णय गर्ने तयारी गरेको छ । ‘दलमा छलफल गर्छौ । सहकार्य गरेर अगाडि बढ्नुपर्छ । समितिमा हाम्रो पनि दाबी छ,’ राप्रपाका सांसद ध्रुवबहादुर प्रधानले भने ।

प्रकाशित मिति: बिहीबार, भदौ ७, २०८० २०:०५