बेन स्टोक्सका बाबुले आफ्नै दुई सन्तानको हत्या गरेको खुलासा

A+ A A-

न्युजिल्यान्डमा जन्मिएका इंग्ल्यान्डका अलराउन्डर बेन स्टोक्सका बाबुले आफ्नै एक छोरा र छोरीको हत्या गरेको खुलासा भएको छ । स्टोक्सका बाबु रिचार्ड डनले १९८८ मा ८ वर्षिय छोरी ट्रेसी र ४ वर्षिय छोरा एन्ड्रयुको गोली हानि हत्या गरेका थिए ।

रिचार्ड स्टोक्सका सौतेनी बाबु हुन् । स्टोक्सकी आमा डेब स्टोक्स र बाबु जेरार्ड स्टोक्सको बिहेअघि उनकी आमाको रिचर्डसँग विवाह भएको थियो । उनीहरु दुईजनाको सम्बन्धविच्छेद पछि डेबले जेरार्डसँग बिहे गरेकी थिइन् ।

वेलायती ट्याब्लोइड पत्रिका द सन का अनुसार सप्ताहन्तका दौरान रिचार्ड आफ्ना छोरा र छोरीसँग थिए । त्यही समयमा उनले गोली हानी दुवैको हत्या गरेका हुन् । रिचर्डले आफ्नै दुई सन्तानको हत्या गरेको ३ वर्षपछि स्टोक्स जन्मिएका थिए ।

इंग्ल्यान्डलाई विश्वकप जिताएका स्टोक्सले भर्खरै सम्पन्न एसेज टेस्टमा पनि उत्कृष्ट प्रदर्शन गरेका थिए । यो घटनाको खुलासाले उनको प्रदर्शनमा नकारात्मक असर पर्न सक्ने वेलायती मिडियाले चिन्ता व्यक्त गरिरहेका छन् ।

३१ वर्ष पुरानो घटना खोतलेको भन्दै स्टोक्सले ट्विटरमार्फत द सन विरुद्ध रिस पोखेका छन् । ‘मेरो सार्वजनिक छविका कारण मेरो व्यक्तिगत जीवनको खुलेआम चर्चा गरिनु स्वभाविक हो । तर, मेरो सार्वजनिक छविकै कारण मेरा बाबुआमा, श्रीमती, छोराछोरी र परिवारका अन्य सदस्यको हक उल्लंघन गर्न पाइँदैन । उनीहरुको पनि आफ्नै व्यक्तिगत जीवन छ । मलाई बहाना बनाएर त्यसमाथि प्रहार गर्न पाइँदैन’, उनले ट्विटरमा लेखेका छन् ।

प्रकाशित मिति: बिहीबार, असोज २, २०७६ ००:४३