कस्मेटिक उत्पादनमा देशलाई आत्मनिर्भर बनाउने सपनालाई पछ्याएका गोपाल

A+ A A-

आर्थिक वर्ष २०७९ र २०८० को तथ्याङ्क हेर्दा शृङ्गारमध्येको फेस क्रिम मात्र ७८ करोड रुपैयाँबराबरको नेपाल भित्रिएको देखिन्छ । यस तथ्यले सुन्दरता तथा शृङ्गार क्षेत्रमा रहेको अथाह व्यावसायिक सम्भावनालाई प्रस्ट पार्छ ।

नेपाली बजारमा मात्र प्रत्येक वर्ष अर्बौंका शृङ्गार सामग्री आयात भइरहेका छन्, जसले गर्दा हाम्रो ठूलो रकम विदेशिइरहेको छ । सँगै स्वदेशमै पसिना बगाउँदै सफलताको भर्‍याङ उक्लिँदै देशको पैसा विदेशिनबाट रोकेर देशको अर्थतन्त्रमा इँटा थप्ने गोपाल काफ्लेजस्ता उद्यमी यही भूगोलमा भेटिन्छन् ।

Aelo Harbal (1)1692800038.jpg

‘म गर्वका साथ भन्छु, नेपालको सबैभन्दा पुरानो हर्वल कम्पनीमध्येको एक एलो हर्वलको संस्थापक म हुँ,’ गोपाल गौरवका साथ भन्छन् ।

अधिकांश नेपाली स्थानीय जडीबुटी प्रयोग गरेर उत्पादन गरिएकका शृङ्गारका सामग्री अर्थात् कस्मेटिक्स उत्पादनलाई एलो हर्वल नाममा उनले ब्रान्डिङ गरिरहेका छन् ।

Aelo Harbal (6)1692800051.jpg

उद्यमशीलताको संस्कार नभएको देशमा काफ्लेले आफ्नै देशमा केही गर्नुपर्छ भन्ने मान्यतालाई आत्मसात् गर्दै केही हजारको लगानी सुरु गरेको एलो हर्वल आज लाखौँको कारोबार गर्ने अवस्थामा पुर्‍याएका छन् ।

एलो हर्वलका माध्यमले गोपालले पाएको यो सफलताका पछाडि हिजोको उनकै सकसपूर्ण संघर्षको अहम् भूमिका छ ।

कसरी सुरु भयो त एलो हर्वल ?

संखुवासभाको साविकको खराङ, हालको चैनपुर नगरपालिका– १० मा जन्मिएका काफ्लेको बाल्यकाल निकै कष्टपूर्ण रह्यो । खाने पानी लिन घण्टौँ हिँड्नुपर्थ्यो । गाउँमा बिजुली थिएन । दियालो तथा टुकी बालेर पढ्नुपर्ने अवस्था थियो । पाँच कक्षासम्मको अध्ययन पूरा गरेपछि उनको परिवार बसाइँ सरेर विराटनगर पुग्यो । विराटनगरको पोखरिया माध्यमिक विद्यालयबाट एसएलसी पूरा गरेर महेन्द्र मोरङ बहुमुखी क्याम्पसमा भर्ना भए ।

Aelo Harbal (7)1692800063.jpg

पढाइसँगै उनी एउटा भारतीय कम्पनीका उत्पादनहरूको मार्केटिङको काम गर्न थाले । मार्केटिङ गर्ने क्रममा नेपालका सबैजसो जिल्ला पुगे । तराई, पहाड अनि हिमाल तथा गाउँदेखि शहरसम्म प्रयोगमा रहेका सौन्दर्य सामग्री सबै आयातित मात्र पाए ।

आफ्नै स्वदेशी उत्पादन केही देखेनन् । आफैँले गरिरहेको विदेशी उत्पादनको प्रवर्द्धनदेखि दिक्क लाग्यो । त्यसपछि गोपालले संकल्प नै गरे, ‘अब वेदेशी उत्पादनको प्रवर्द्धन होइन । जे गर्छु स्वदेशी वस्तुमै केन्द्रित भएर काम गर्छु ।’

Aelo Harbal (8)1692800081.jpg

अनि उनले कस्मेटिक्स उत्पादनसम्बन्धी विभिन्न तालिम लिए ।

२०६३ सालमा हर्वल कम्पनी दर्ता गरे । विराटनगरमै एउटा सामान्य कोठा भाडामा लिएर फिनेल, स्याम्पू तथा फेसवास उत्पादन थालेका उनले सुरुका उत्पादन साथीभाइलाई बाँडे, साथीहरूबाट प्रशंसा पाएसँगै ती उत्पादनको बजारीकरणमा लागे । त्यसपछि त उनले कति संघर्ष गर्नुपर्‍यो, कुनै लेखाजोखा नै छैन ।

उत्पादन त थाले, तर सोचेजस्तो व्यापार नै भएन । कोठाको भाडा तिर्ने कमाइ पनि भएन । भाडा तिर्न नसकेपछि घरधनीले कुर्सी नै जफत् गरे । उनको मन चिसो भयो । निकै नरमाइलो लाग्यो उनलाई । तर, देशलाई आत्मनिर्भर बनाउने अभियानमा होमिएका उनी उद्यमशीलताको यात्रामा आएका थिए । त्यसैले उनी आफ्नो अगाडि आउने कुनै पनि अप्ठ्याराहरूबाट आत्तिएनन्, हच्किएनन् । निकै नै गाह्रो अवस्था सिर्जना भएपछि उनी विकल्प खोज्दै संखुवासभा पुगे । साथीभाइ तथा आफन्तलाई विदेश जान लागेका कारण पैसाको खाँचो भयो भन्दै झुटो बोलेर पैसा मागे ।

Aelo Harbal (9)1692800104.jpg

विदेश जान लागेको भनेपछि साथीभाइ तथा आफन्तले उनलाई ऋण दिए । त्यो पैसा लिएर विराटनगर फर्के अनि हर्वल कम्पनीमै लगानी गरे । उनले आफ्नो बलबुताले भ्याएसम्मको प्रयास गरिरहेका थिए । त्यही क्रममा मञ्जु घिमिरेसँग उनको भेट भयो ।

रोशन घिमिरे अर्थात् सालो, जो कोरियाली कस्मेटिक्स कम्पनीमा काम गरिरहेका थिए । उनलाई पनि आफ्नै देशमा मिलेर गरौँ भनेर बोलाए । कोरियामा स्किन केयर प्रोडक्ट कम्पनीमा ७ वर्ष काम गरेका रोशनसँग हर्वल उत्पादनसम्बन्धी अनुभव पनि थियो ।

यसरी प्राविधिक सीप र ज्ञानको संयोजनसहित काफ्लेको एलो हर्वल फ्याक्ट्रीमा कोरियन फर्मुलेसन प्रयोग गरी सामान उत्पादन गर्न थाले । अनि सुरु भयो, नेपाली जडीबुटीबाट बनेका कस्मेटिक्स उत्पादन अर्थात् एलो हर्वलको व्यावसायिक सफलताको यात्रा ।

Aelo Harbal (10)1692800121.jpg

हाल एलो हर्वल उद्योगले सन्सक्रिम, मोइस्चराइजर, फेस टोनर, लोसन, सिरम, भिटामिन सी सिरम, फेस प्याक, एन्टी–एक्नी क्रिम, फेस वास, गुड बाइ ब्लेमिस सिरम, स्याम्पू, अनियन हेयर आयल, हेयर ट्रिटमेन्टलगायतका उत्पादनहरू उत्पादन गरिरहेको छ । एलो हर्वलले मल्टिफर्मल ल्याबको परीक्षणपश्चात् मात्र बजारमा पठाउने गरेको छ ।

काफ्लेको एलो हर्वलले अहिले करिब ५० जनालाई रोजगारी दिएको छ । त्यति मात्र होइन, आगामी दिनमा एलो हर्वललाई अन्तर्राष्ट्रिय बजारमा पुर्‍याउँदै खेर गइरहेका नेपाली जडीबुटीलाई ब्रान्डिङ गरेर विश्व बजारमा पुर्‍याउने सपना पनि काफ्लेको छ ।

प्रकाशित मिति: बिहीबार, भदौ ७, २०८० ०६:११