संसद खुलाउन ओलीसँग छलफल गर्दै देउवा, कांग्रेसले पहल गर्नुपर्ने सांसदको माग

संसद खुलाउन ओलीसँग छलफल गर्दै देउवा, कांग्रेसले पहल गर्नुपर्ने सांसदको माग

A+ A A-

सत्तारुढ तथा संसदको ठूलो दल नेपाली कांग्रेसले संसदको अवरोध खुलाउन प्रयास गरिरहेको छ । जसका लागि पार्टी सभापति शेरबहादुर देउवाले अग्रसरता लिएका छन् । प्रधानमन्त्री पुष्पकमल दाहाल प्रचण्डसँग संवादमा रहेको देउवा एमाले अध्यक्ष केपी शर्मा ओलीसँग संवाद गर्ने तयारीमा छन् ।

एमालेले सुन तस्करीमा उच्चस्तरीय समितिको माग गर्दै साउन १० गतेदेखि प्रतिनिधिसभा अवरोध गर्दै आएको छ । राष्ट्रियसभामा पनि एमालेको गतिविधि उस्तै छ । एमालेसँग छलफल गर्ने निर्णय सत्तारुढ दलले गरेका छन् । बुधबार एमाले अध्यक्ष ओलीसँग राष्ट्रपति रामचन्द्र पौडेले संसद अवरोधबारेमा जिज्ञासा राखेका छन् । उनले सहमतिमा संसद खुलाउन आग्रह गरे । तर, एमाले अध्यक्ष ओलीले भने एमाले संसद खुलाउने पक्षमा भए पनि सरकारले संसद अवरोध गरेको आरोप लगाए ।

बिच्किएको एमालेसँग वार्ता गर्न कांग्रेसले पहल गर्न लागेको हो । ‘एमाले अध्यक्ष ओलीसँग हिजो (बुधबार) भेट हुने कुरा थियो । के भएर भएन, छिट्टै भेट हुन्छ । भदौ ३ गतेको संसद बैठकअगावै सभापतिज्यूले सबैसँग छलफल गर्नुहुन्छ,’ कांग्रेस सांसद रामहरि खतिवडाले शिलापत्रसँग भने ।

कांग्रेसले साउन २६ देखि २९ सम्म भएको संसदीय दलको बैठकले सदनको अवरोध समाप्त गरी सबै विषयमा सदनमा नै छलफल गर्ने वातावरण सुनिश्चित गर्न अपिल गरेको छ । कांग्रेसका प्रमुख सचेतक रमेश लेखकले भदौ ३ गतेको बैठकसम्ममा सदन खुलाउन कांग्रेसले पहल गर्ने बताए ।

कांग्रेस संसदीय दलको बैठकको निर्णयमा संसद अवरुद्ध हुनु गैरजिम्मेवार ठहर गरिएको छ । ‘कुनै विषयमा आफ्नो असहमति व्यक्त गर्न सरकार र समग्र राष्ट्रको ध्यानाकृष्ट गर्न प्रतिपक्ष सदनमा आलोचनात्मक रूपले प्रस्तुत हुनु स्वाभाविक हो । तर, लामो समयसम्म सदनमा छलफल हुन नसक्ने गरी संसद अवरुद्ध गर्ने कार्य गैरजिम्मेवारीपन हो,’ बैठकको निर्णयमा भनिएको छ । बैठकले संघीय संसदलाई प्रभावकारी बनाउन निरन्तर काम गरिरहने प्रतिबद्धता पनि व्यक्त गरेको छ ।

कांग्रेसका पूर्वमहामन्त्री तथा सांसद शशांक कोइरालाले संसदको अवरोध हटाउन सभापति देउवाले पहल गर्नुपर्ने बताउँछन् । संसदको ठूलो दलको हैसियतले कांग्रेसले भूमिका खेल्नुपर्ने उनको धारणा छ ।

संसदको अवरोध भएर जनताको आवाज बन्द हुनु दु:खद रहेको कांग्रेस सांसद अर्जुननरसिंह केसी बताउँछन् ।

देशमा अविरल वर्षाका कारण बाढी, पहिरो र डुबानको समस्या छ । बाढी, पहिरो र डुबानका कारण मानवीय र भौतिक क्षति भएको छ । लम्पी स्किनको प्रकोपका कारण हजारौँ पशुचौपाया मरेका छन् । लाखौँ चौपाया सङ्क्रमित छन्, पशुधनको क्षतिका कारण किसानले ठूलो नोक्सानी व्यहोर्नुपरेको छ । डेंगु र एडिनो भाइरस कन्जंटिभाइटिस (आँखा पाक्ने) रोगको सङ्क्रमण देशभरि फैलिएको छ । यीलगायत जनजीविकासँग जोडिएका, नागरिकका प्रत्यक्ष सरोकार भएका विषयमा सदनमा आवाज उठ्ने, छलफल हुने अवस्था बन्नुपर्ने उनले बताए ।

‘प्रतिपक्षीको आवाज सुन्नुपर्छ भन्दा अरु पक्षको आवाज बन्द हुनु भन्ने होइन । संसदलाई बन्धक बनाइनुहुन्न । कार्यपालिकामा कमजोरी देखिएको छ । न्यायपालिका घायल भएको छ । विकास निर्माणमा अवरोध छ । यी सबै कुराको छलफल हुने थलो हो यथासम्भव संसद खोल्नुपर्छ,’ केसीले शिलापत्रसँग भने ।

सुन प्रकरणमा सीआईबीको अनुसन्धानलाई प्रभाव नपार्ने गरी न्यायिक समिति बनाउनुपर्ने उनले बताए । सीआईबी प्रमुखलाई नै न्यायिक आयोगको प्रमुख बनाउन सकिने उनको धारणा छ ।

‘कांग्रेस संसदीय दलको नेताले सबै दलको नेतालाई मिलाएर मध्यमार्गी बाटो खोज्न पहल गर्नुपर्छ । सत्तापक्ष र प्रतिपक्षबीचको मध्यमार्गी बाटो खोज्नु नै लोकतन्त्र हो,’ केसीले भने ।

संसदीय समितिबाट सुन प्रकरणको छानबिन गर्न सकिने अर्की सांसद सीता मिजार बताउँछिन् । ‘संसदको संयन्त्रबाट समाधान खोज्नुपर्छ । बाहिरबाट समाधान खोज्दा सरकारको संयन्त्रलाई असहयोग गरेको दखिन्छ । कांग्रेसले संसदभित्रबाट समाधान खोज्नुपर्छ,’ मिजारले शिलापत्रसँग भनिन् ।

‘कानुनलाई बाइपास गरेर, डिलिट गरेर जाने हो भने कानुनी राज्य रहँदैन । यो कुरामा कांग्रेस, एमाले, माओवादी सजग हुनुपर्छ । सरकारमा को रहन्छ भन्ने कुरा होइन । कानुनी सिद्धान्त पालना गरेनौँ भने लामो असर पर्छ । सीआईबीले काम गरिरहेको छ । जोसुकै नेता भए पनि कारबाही हुन्छ भनेका छौँ,’ खतिवडाले भने ।

एमालेले २०४७ सालयता २५७ दिन संसद अवरोध गरेर रेकर्ड राखेको उनले बताए । संसद अवरोध गरेर, एकले अर्कालाई गाली गरेर जनतालाई नाटक देखाउने ठाउँ नरहेको उनको भनाइ छ । संसद विचार र सिद्धान्तको भूमि रहेको उनले बताए ।

प्रकाशित मिति: बिहीबार, साउन ३२, २०८० १५:५५