कस्तो खानालाई जङ्क फुड भनिन्छ ? (भिडियो)

A+ A A-

पछिल्लो समय विश्वव्यापी रूपमै जङ्क फुडको प्रयोग व्यापक रूपमा बढ्दै गएको छ । तर, विकसित मुलुकले यस्ता खानेुकराहरूको गुणस्तरीयता र विकल्प खोज्न थालेका छन् ।

नेपालमा भने जङ्क फुडको प्रयोग अत्यधिक रूपमा बढ्दै गएको छ । यस्तो खानेकुरा स्वास्थ्यका लागि घातक मानिदै आएको छ ।

पोषणविद् मनसा थापा ठकुराठी जङ्क फुड भनेको कम पोषण भएको खानेकुरा हो । यसलाई ‘कमर्सियल्ली प्याक्ड फुड’ पनि भन्ने गरिन्छ । व्यापारीकरणका लागि यस्ता खानेकुराहरूलाई आकर्षक र मीठो बनाइएको हुन्छ ।

उनी भन्छिन्, ‘जङ्क फुड लामो समयसम्म स्टोर गरेर राख्नका लागि पनि उनीहरूले यस्ता खानेकुराहरूको प्रयोग गरिरहेका हुन्छन् । र, मानिसहरू यस्तै खानेकुरामा बढी आकर्षित पनि भइरहेका छन् ।’

जङ्क फुडमा राम्रो तेलको प्रयोग गरिएको हुँदैन । चिनीको मात्रा पनि बढी हुन्छ । यस्ता खानेकुराले मोटाउनका लागि मद्दत पुर्‍याउँछन् । ठकुराठीका अनुसार यसो भन्दैमा सबै खानेकुरा जङ्क फुड भने हुँदैनन् । कम्पनीबाट बनेका खानेकुराहरूलाई घरमा पोसिलो बनाउन सकिन्छ ।

तर, नियमित रूपमा जङ्क फुड खाने हो भने यसले स्वास्थ्यमा नकारात्मक असर गर्छ । जङ्क फुड मैदाबाट बनेका हुन्छन् । त्यसैले मैदाबाट बनेका खानेकुराप्रति लगाव राख्नु हुँदैन । घरमा मैदाको साटो आँटाको प्रयोग गर्नुपर्छ ।

जङ्क फुडको प्रयोग

सेन्टर फर डिजिज कन्ट्रोल एन्ड प्रिभेन्सन (सीडीसी)को रिपोर्टअनुसार अमेरिकीहरूले धेरै फास्टफुड अर्थात् जङ्क फुड खान्छन् ।

रिपोर्टका अनुसार उनीहरू एक हप्तामा ३ पटकसम्म रेस्टुरेन्टमा पुग्ने गर्छन् । र, ८ करोडभन्दा बढीले हरेक दिन जङ्क फुड खाइरहेका हुन्छन् ।

नेपालमा पनि पछिल्ला केही वर्षयता अधिकांश व्यक्तिहरूले मःमः, पिज्जा, चाउमिन, बिस्कुट, चाउचाउ, चिप्सलगायतका जङ्क फुड अत्यधिक मात्रामा खाने गरेका छन् । कतिपयका लागि त अहिले यो सोखसमेत बनेको छ ।

तर, त्यसले व्यक्तिको स्वास्थ्यमा नराम्रो असर गरिरहेको हुन्छ । अझै बालबालिकाको हकमा त यस्तो खानेकुरा खानुलाई राम्रो पटक्कै मानिँदैन । यस्ता खानेकुराले उनीहरूको वृद्धि विकासमा असर पुर्‍याउने विज्ञहरूको भनाइ छ ।

अमेरिकाको नेसनल लाइब्रेरी अफ मेडिसिनका अनुसार’ जङ्क फुड’ शब्द सन् १९७२ मा प्रयोगमा आएको हो । अमेरिकी पोषण वैज्ञानिक माइकल ज्याकबसनले ‘जङ्क फुड’ शब्द प्रयोगमा ल्याएका हुन् ।

उच्च मात्रामा परिस्कृत चिनी, सेतो पिठो, नुन र धेरै खाद्यान्न समावेश हुने तर प्रोटिन, भिटामिन र फाइबरको कमी हुने खाद्य पदार्थ नै ‘जङ्क फुड’ हो ।