पाँच हजारभन्दा बढी भूकम्पप्रतिरोधी घर बनाइसकेको एसवाई प्यानलको लक्ष्य अब अन्तर्राष्ट्रिय बजार

पाँच हजारभन्दा बढी भूकम्पप्रतिरोधी घर बनाइसकेको एसवाई प्यानलको लक्ष्य अब अन्तर्राष्ट्रिय बजार

A+ A A-

२०७२ साल वैशाख १२ गते शनिबार बिहान ११ बजेर ५६ मिनेटमा लगभग ३४ किमि ९२१ माइल पूर्व–दक्षिणपूर्व बारपाकलाई केन्द्रविन्दु बनाई ७.८ रेक्टर स्केलको महाभूकम्प गयो । महाभूकम्पले हजारौँ मानिसको ज्यान लियो । त्यति नै संख्यामा भवन तथा संरचनाहरू ध्वस्त भए । भूकम्पको केन्द्रमा रहेका भवन तथा संरचनाहरू त पूर्ण रूपमा नै क्षतिग्रस्त भए । जसमध्ये कति संरचना पुनःनिर्माणको काम आजसम्म पनि पूरा भइसकेकै छैनन् ।

त्यसपश्चात् भूकम्पको उच्च जोखिममा रहेको नेपालमा भूकम्पप्रतिरोधी भवन निर्माणप्रतिको सचेतनाले अझ महत्त्व पायो, जसबाट नेपाली बजारमा एउटा नयाँ व्यावसायिक सम्भावनाको ढोका खोल्यो । भूकम्पप्रतिरोधी संरचनाहरूका लागि विस्तृत समाधानहरू उपलब्ध गराउनु, प्रारम्भिक डिजाइन चरणदेखि अन्तिम निर्माणसम्मका लागि मार्गदर्शन, सुरक्षा र विश्वसनीयता सुनिश्चित गरेर भवन निर्माण गर्ने लक्ष्यमा सक्रिय दक्षिण कोरियाली कम्पनी एसवाई प्यानल एलटीडीको विश्वसनीयता त्यसबेला नेपालीका लागि भरोसा बन्यो ।

यसरी विगत तीन दशकदेखि दक्षिण कोरियामा आवासीय तथा व्यावसायिक भवन निर्माणको क्षेत्रमा पृथक् पहिचान बनाउन सफल एसवाई प्यानल एलटीडी भूकम्पले क्षतिग्रस्त नेपालको संरचना पुनःनिर्माणको लक्ष्य बोकेर नेपाल भित्रियो । कंक्रिटका घर तथा संरचना निर्माणमा लाग्ने समय तथा लागतका कारण पनि भूकम्पबाट क्षत्‌विक्षत् बनेको नेपालका लागि त्यसबेला कोरियन प्रविधिमा आधारित प्रिफ्याव भवन निर्माण उत्कृष्ट विकल्पका रूपमा अगाडि आयो ।

सुरुवाती केही वर्ष कोरियाबाटै प्यानल आयात गरेर संरचना निर्माण थालेको एसवाई प्यानलले यहाँ पाएको लोकप्रियताबीच ढुवानी खर्च तथा उच्च भन्सार शुल्कका कारण नेपालमै रहेर एसवाई प्यानल नेपाल नाममा उत्पादन सुरु गर्‍यो ।

एसवाई प्यानल नेपालको चितवनको पिठुवामा फ्याक्ट्री छ भने मुख्य कार्यालय भने काठमाडौंको तीनकुनेमा छ । यस कम्पनीका देशभरमा ९० वटा शाखा रहेको निर्देशक विमलराज गोसाईं बताउँछन् । प्यानल प्रयोग गरेर चार कोठाको एकतल्ले घर निर्माण गर्न करिब १८ लाख लाग्ने गोसाईंको भनाइ छ ।

नेपालभित्र मात्र ५ हजारभन्दा धेरै भवन निर्माण गरिसकेको एसवाई प्यानल नेपालले आफ्ना उत्पादन भारतमा निर्यात गर्न थालिसकेको छ ।

करिब ५ वर्षअघि प्राइभेट कम्पनीका रूपमा उत्पादन सुरु गरेको एसवाई प्यानल नेपाल पब्लिक कम्पनी बनिसकेको छ । हाल आईपीओ जारी गर्ने तयारी गरिरहेको एसवाई प्यानलले आफ्नै ई–कमर्स सञ्चालन तथा स्मार्ट फार्मको परिकल्पनाको कामसमेत गरिरहेको छ ।

चार जना कोरियन नागरिकसमेत गरी ११५ भन्दा धेरैलाई प्रत्यक्ष रोजगारी दिइरहेको यस कम्पनीले समग्रमा नेपाली बजारको माग पूरा गरेर आयातलाई प्रतिस्थापन गर्दै आफ्ना उत्पादन अन्तर्राष्ट्रिय बजारमा निर्यात गर्ने आगामी लक्ष्य लिएको छ ।

यूपीभीसी प्रोफाइल, पीपीजीआई सिट, ईपीएसलगायतका कच्चा पदार्थ आयात हुने गरेको छ । यसमा नेपाल सरकारले भन्सार लागत कम गरिदिए उत्पादनमा सहज हुने फ्याक्ट्री डाइरेक्टर ली ह्वा छुन बताउँछन् ।

नेपाली र नेपालभित्रका उद्योगहरूलाई आवश्यक कच्चा पदार्थमा सरकारले लगाएको उच्च भन्सार कर कम गर्ने हो भने एसवाई प्यानलजस्ता अन्य धेरै विदेशी कम्पनीहरूका लागि नेपालमा लगानी गर्ने अवस्था बन्ने र त्यसले नेपालको अर्थतन्त्रमा ठूलो टेवा पुग्ने र रोजगारीको ठूलो बाटो पनि खुल्ने देखिन्छ ।