५ वर्षमा लाइसेन्सको कमाइ १ अर्ब ३ करोड

A+ A A-

सोमबार बिहानै सातदोबाटोको स्विमिङ पुलछेउको बाटोहुँदै भक्तपुरका सनिस महर्जन मोटरसाइकलमा ग्वार्कोतिर जाँदै थिए । अरु बेला पनि प्रायः त्यही बाटोहुँदै आउनेजाने गरेका उनी सोमबार भने ट्राफिक प्रहरीको फन्दामा परे ।

ट्राफिक प्रहरीले उनलाई रोकेर मोटरसाइकलको कागजात र सवारीचालक अनुमतिपत्र माग्दासम्म के गल्ती गरे, उनलाई नै थाहा थिएन । उनी उल्टै ट्राफिक प्रहरीलाई प्रश्न गर्दै थिए, ‘के ट्राफिक ‘रुल’ उल्लंघन गरें मैले ?’ ट्राफिक प्रहरीले जवाफ दिए, ‘तपाईंले वन वे सडक प्रयोग गर्नुभयो ।’

झसंग भएँ । उनलाई स्विमिङ पुलबाट ग्वार्को आउने त्यो सडक वन वे होला भन्ने लागेको थिएन । ट्राफिक प्रहरीले उनलाई ५ सय रुपैयाँ जरिवान गरे । स्विमिङको त्यो सडक प्रयोग नगर्ने हो, भने सवारीचालकले सातदोबाटो चोक पुगेर फर्किनुपर्ने हुन्छ । त्यो व्यावहारिक देखिँदैन ।

त्यस्तै, सानेपा स्टार अस्पतालअगाडिको सडक खण्डसमेत त्यही अवस्थाको छ । लेनक्रस गरेर हस्पिटलतिर जान खोज्दा गत बिहीबार कीर्तिपुरका विकास कार्की पनि ट्राफिक प्रहरीको फन्दामा परे । उनले लेन उल्लंघनको जरिवाना ५ सय रुपैयाँ तिरे । लेनअनुसारको कक्षा पनि लिए । कार्की र महर्जन त दुई उदाहरण मात्र हुन् ।

यसरी विभिन्न ट्राफिक नियम पालना नगरेको भन्दै ट्राफिक प्रहरीले दैनिक सयौं व्यक्तिलाई कारबाही र जरिवाना गर्ने गरेको छ । ट्राफिक महाशाखाको तथ्यांकअनुसार पाँच आर्थिक वर्षमा उपत्यकामा ट्राफिक नियम पालना नगर्ने २७ लाख ५५ हजार २८८ जना सवारीचालक कारबाहीमा परेको तथ्यांक छ ।

यसमध्ये २६ असोज २०७१ सालबाट सुरु भएको लेन अनुशासन कारबाहीमा मात्र ३ लाख १२ हजार ३ सय ८० जना कारबाहीमा परेको तथ्यांक छ । कारबाहीमा पर्नेमामध्ये २ लाख ९७ हजार ३ सय २६ पुरुष छन् भने १५ हजार ५४ जना महिला छन् । त्यस्तै, २०७५ सालबाट लागू गरेको सिट क्षमताभन्दा बढी यात्रु बोक्ने, ह्वील लक, सर्भिलेन्स भेहिकलबाट र सीसीटीभी कारबाहीमा परेर १६ हजार ७ सय ३१ जना सवारीचालक कारबाहीमा परेका छन् ।

ट्राफिक महाशाखा प्रमुख एसएसपी भीमप्रसाद ढकालका अनुसार पछिल्लो समय ह्वील लक, सर्भिलेन्स भेहिकलबाट र सीसीटीभी कारबाहीमा प्रभावकारी बन्दै गएको बताउँछन् ।

‘भ्याली ट्राफिक व्यवस्थापनमा हामी प्रविधिको प्रयोग गर्ने, ट्राफिक नियम पालनामा नम्र भएर लागेका छौं, हरेक सवारीचालकले ट्राफिक अनुशासन पालना गरे हामी रहरले कारबाही गर्दैनौं,’ ढकालले भने । ट्राफिक प्रहरीले एम्बुसमा पार्ने नियतले लुकेरसमेत अब चेकजाँच नगर्ने उनले बताए ।

१ अर्बभन्दा बढी राजस्व संकलन

यसरी पाँच आर्थिक वर्षको अवधिमा विभिन्न ट्राफिक नियम पालना नगर्ने सवारीचालकहरूबाट ट्राफिक प्रहरीले ५ वर्षमा १ अर्ब ३ करोड २७ लाख ७७ हजार ९० रुपैयाँ राजस्व संकलन गरेको छ ।

ट्राफिक प्रहरीको तथ्यांकअनुसार आव २०७१/०७२ मा १४ करोड ४९ लाख ९७ हजार ५ सय ८५ रुपैयाँ, २०७२/०७३ मा १५ करोड ८२ लाख ९१ हजार २ सय ७५ रुपैयाँ र आव २०७३/०७४ मा ३५ करोड ६० लाख ६७ हजार ९ सय राजस्व संकलन भएको छ ।

त्यस्तै आव २०७४/०७५ मा २९ करोड ३१ लाख ४५ हजार, २०७५/०७६ मा ३१ करोड ५६ लाख ४१ हजार र चालू आव २०७६/०७७ को साउनसम्मको तथ्यांकअनुसार २ करोड ८४ लाख ६४ हजार ५ सय रुपैयाँ राजस्व संकलन भएको छ । उक्त तथ्यांकअनुसार पाँच आवमध्ये सबैभन्दा बढी राजस्व आव २०७३/०७४ मा संकलन भएको देखिन्छ ।

ट्राफिक नियम कारबाहीमा परेका सवारीचालकले हाल जरिवाना ग्लोबल आईएमई बैंकमा जम्मा गर्ने गरेका छन् ।

हेर्नुहोस् कुन नियम उल्लंघन गरे कति जरिवाना ?