अख्तियार हेटौँडामा आठ वर्षमै सबैभन्दा धेरै उजुरी, अधिकांश तराईका

A+ A A-

अख्तियार दुरुपयोग अनुसन्धान आयोगको कार्यालय हेटौँडामा विगत ७ वर्षमा गतवर्ष सबैभन्दा धेरै उजुरी दर्ता भएका छन् ।

आर्थिक वर्ष २०७२/७३ देखि २०७९/८० असार मसान्तसम्मको तथ्यांकअनुसार सबैभन्दा धेरै उजुरी गत आर्थिक वर्ष २०७९/८० मा दर्ता भएको पाइएको हो । कार्यालयको कार्यक्षेत्र भएका १२ जिल्लामा गतवर्ष १८ सय ३१ वटा उजुरी परेका छन् । यसबाहेक ४ सय ९५ वटा उजुरी २०७८/७९ को जिम्मेवारी सरेर आएका छन् ।

२०७९/८० मा अहिलेसम्मकै सबैभन्दा धेरै उजुरी परेको अख्तियार कार्यालय हेटौँडाका सूचना अधिकारी उपसचिव विष्णु सापकोटाले जानकारी दिए । देशभर आयोगका आठवटा कार्यालय रहेकोमा हेटौँडामा पनि सबैभन्दा धेरै उजुरी परेका छन् । विगतको वर्षलाई तुलना गर्दा र पछिल्लो ८ वर्षलाई मात्रै हेर्ने हो भने पनि चालु आर्थिक वर्षमा उजुरी अत्यधिक मात्रामा बढेको देखिन्छ ।

सूचना अधिकारी सापकोटाका अनुसार २०७२/७३ को एक वर्षको अवधिमा कुल १ हजार ३ सय ८५ वटा उजुरी परेका थिए । २०७३/७४ मा ७ सय ९८, २०७४/७५ मा ७ सय ६९, २०७५/७६ मा १ हजार १ सय, २०७६/७७ मा १ हजार १ सय २७ र २०७७/७८ मा १ हजार ६ सय र २०७८/७९ मा पनि १ हजार ६ सय उजुरी परेका थिए । स्थानीय तहमा धेरै उजुरी पर्नुले अनियमितताको घटना पनि बढेको देखिन्छ ।

अख्तियार कार्यालयको बागमती प्रदेशको मकवानपुरसहित चितवन, धादिङ, दोलखा, काभ्रेपलाञ्चोक, रामेछाप, सिन्धुपाल्चोक, नुवाकोट, रसुवा तथा मधेश प्रदेशको बारा, पर्सा रौतहट कार्यक्षेत्र रहेको छ । अख्तियारले भौगोलिक रूपले विकट र टाढा भएकाले रसुवा र दोलखामा प्रमुख जिल्ला अधिकारीलाई अधिकार प्रत्यायोजन गरेर काम गरिरहेको छ । अख्तियार कार्यालयमा परेको उजुरीको करिब ८० प्रतिशत तराईका जिल्लाको रहेको सूचना अधिकारी सापकोटाले जानकारी दिए ।

कार्यालयमा सबैभन्दा धेरै बाराका स्थानीय तहविरुद्ध ५ सय ४१ वटा उजुरी परेको छ । सबैभन्दा कम रसुवाको स्थानीय तहविरुद्ध ३ वटा मात्र उजुरी परेका छन् । त्यस्तैगरी, दोस्रोमा पर्साका स्थानीय तहविरुद्ध ४ सय ९९ वटा उजुरी परेका छन् । रौतहटका स्थानीय तहविरुद्ध ४ सय ५७, मकवानपुरका ३ सय ८३, चितवनका २ सय ६९, धादिङका ३९, दोलखाका १७, काभ्रेपलाञ्चोकका १२ वटा उजुरी परेको जनाइएको छ । सिन्धुपाल्चोकको स्थानीय तहविरुद्ध ८ उजुरी मात्र परेका छन् । त्यस्तैगरी, नुवाकोटको स्थानीय तहविरुद्ध पाँचवटा उजुरी परेका छन् ।

सूचना अधिकारी सापकोटाले स्थानीय सरकारविरुद्ध गत वर्षमा परेका उजुरीमध्ये १४ सय ४४ वटा फर्छ्योट भइसकेको र ८ सय ८२ वटा उजुरी बाँकी रहेको जानकारी दिए । आयोगमा स्थानीय तहले बाटो निर्माण, विद्यालयको भवन निर्माण, उपभोक्ता समितिको गठन, अनुदान वितरणलगायत विषयमा अनियमितता गरेको भन्दै उजुरी पर्ने गरेको सूचना अधिकारी सापकोटाको भनाइ छ । उनका अनुसार अख्तियारमा प्रदेश सरकारविरुद्ध पनि २ सय ३४ वटा उजुरी परेका थिए, जसमध्ये १ सय ३१ वटा फर्छ्योट भइसकेका छन् भने १ सय ३ वटा बाँकी छन् ।

कार्यालयमा रसिद दुरुपयोग भएका प्रवृत्तिका उजुरी सबैभन्दा बढी पर्ने गरेका छन् । कार्यालयमा शिक्षा क्षेत्र, सार्वजनिक जग्गाको संरक्षण, सामाजिक सुरक्षा भत्ता, राजस्व चुहावट र अपचलनजस्ता विषयका उजुरीहरू दर्ता भएका छन् । सार्वजनिक खरिद र निर्माणसँग सम्बन्धित उजुरी, उपभोक्ता समितिसँग सम्बन्धित उजुरी, प्रशासनिक कार्य र तालिम क्षमता विकास सम्बन्धका उजुरीहरू परेका छन् । प्रायः सेवा प्रवाह र नदीजन्य पदार्थ उत्खनन तथा प्राकृतिक स्रोतको उपयोग सम्बन्धित उजुरी आउने गरेको कार्यालयले जानकारी दिएको छ ।

मकवानपुरमा उजुरीको संख्या चौबरले वृद्धि

मकवानपुरका १० वटा स्थानीय तहले काम गर्दा अनियमितता गरेको भन्दै अख्तियार दुरुपयोग अनुसन्धान आयोगको कार्यालय हेटौँडामा उजुरीको चाङ छ । उजुरीको संख्या एक वर्षमै चौबर बढीले वृद्धि भएको छ ।

अख्तियार कार्यालय हेटौँडामा मकवानपुरबाट आर्थिक वर्ष २०७८/०७९ मा ८४ वटा मात्रै उजुरी परेका थिए । तर, त्यसको एक वर्षभित्रमा उजुरी संख्याको ग्राफ ह्वात्तै माथि चढेको छ । २०७९/८० को असार मसान्तसम्ममा ३ सय ८३ वटा उजुरी परेका हुन् । दुई आवमा गरेर मकवानपुरबाट अख्तियारमा ४ सय ६७ उजुरी दर्ता भएका हुन् ।

दर्ता भएका कुल उजुरीमध्ये गत आवको असारसम्म २ सय ८३ वटा उजुरी फर्छ्योट भएको सूचना अधिकारी सापकोटाले जानकारी दिए । आव २०७८/७९ का ८४ उजुरीमध्ये ६१ वटा र गत आव २०७९/८० का ३ सय ८३ उजुरीमध्ये २ सय २२ वटा उजुरी फछर्यौट भएका हुन् । हेर्न बाँकी उजुरी जम्मा १ सय ८४ वटा रहेको सापकोटाले जानकारी दिए ।

प्रकाशित मिति: मंगलबार, साउन २३, २०८० १६:०५