सवारी एपः जसले बाइक र ट्याक्सी सिकाउँछ, राइडरलाई बिनाधिताे ५ लाखसम्म सापटी दिन्छ (भिडियाेसहित)

सवारी एपः जसले बाइक र ट्याक्सी सिकाउँछ, राइडरलाई बिनाधिताे ५ लाखसम्म सापटी दिन्छ (भिडियाेसहित)

A+ A A-

समाजमा विद्यमान समस्या समाधानका रूपमा नै धेरैजसो व्यवसायको उदय हुन्छ । जसको उदाहरण हो, नेपालमा मौलाउँदै गएको राइड शेयरिङ व्यवसाय । अन्तर्राष्ट्रियस्तरमा लोकप्रिय यो व्यवसाय अपवादबाहेक नेपालमा पनि लोकप्रिय बनिररहेको छ । थुप्रै राइड शेयरिङ कम्पनीहरूले आफ्नो उपस्थिति जनाएका छन् ।

कारण छिटोछरिटो, सस्तो र भरपर्दो सुविधा, जहाँ राइडर तथा यात्रुले आफ्नो गन्तव्य, जसको दूरी, सुरक्षा, सुविधा, भाडादर, कमिसनदर, छुट, अफर आदिका आधारमा एप्स छनोट गर्न सक्छन् ।

राइडर तथा यात्रु दुवैले विचार पुर्‍याएर आफूलाई अनुकूल हुने एप्स छनोट गर्न सक्छन् । यसले एकातिर सवारीचालकहरूको खाली समय सदुपयोग भइरहेको छ भने अर्कोतिर यात्रुले सार्वजनिक यातायातका साधनहरूमा बेहोर्नुपर्ने झन्झटिलो र पट्यारलाग्दो यात्रा गर्नुपर्ने बाध्यताबाट मुक्ति पाएका छन् ।

नेपाली बजारमा बढ्दो लोकप्रियतासँगै दिन प्रतिदिन थुप्रै राइड शेयरिङ एप्सहरू आउने क्रम चलिरहेको छ । तर, सरकारले भने अझै यो व्यवसायलाई वैधानिकता दिन भने सकेको छैन । यद्यपि, नेपालको यातायात क्षेत्रमा आज राइड शेयरिङले क्रान्ति नै ल्याएको छ । त्यति मात्र होइन, यसले स्वदेशमै केही गर्न चाहनेहरूका लागि राम्रो व्यावसायिक सम्भावना पनि पस्किएको छ ।

प्रसिद्धले देखेकाे अवसर

दश वर्ष सञ्चार क्षेत्रमा बिताएका प्रसिद्ध नेपालले राइड शेयरिङमा देखेको अवसर र त्यसैलाई पछ्याउँदै यसै क्षेत्रमा चालेको पाइलाले पनि राइड शेयरिङमा रहेको व्यावसायिक सम्भावनालाई प्रस्ट पार्छ ।

पेसाले चार्टर्ड एकाउन्टेन्ट खगेन्द्र नेपालसँग केही दिनअघि मात्र व्यावसायिक सहकार्यमा प्रसिद्धले सवारी नामक राइड शेयरिङ एपलाई सार्वजनिक गरेका छन् । सवारीमार्फत विभिन्न विदेशी राइड शेयरिङ कम्पनीहरूले नेपालबाट लगिरहेको पैसा स्वदेशमै रोक्ने आफ्नो लक्ष्यसमेत रहेको उनको भनाइ छ ।

हाल काठमाडौं, भक्तपुर र ललितपुरलाई विशेष आधार बनाएर विभिन्न राइड शेयरिङ एप बनाएको भए पनि उनकाे 'सवारी एप'ले देशका विभिन्न प्रमुख शहरहरूमा बाइक, कार, ट्याक्सी र ट्याम्पोको सेवा दिने छ । यसका लागि मोबाइलमा सवारी एप डाउनलोड गरेर अनलाइन सेवा लिन सकिने व्यवस्था छ
।

राइड शेयरिङसम्बन्धी अनेकन विदेशी कम्पनीहरू नेपाल भित्रिए । ती कम्पनीहरूले यहाँ राम्रो प्रभाव मात्र पारेनन्, गतिलो व्यावसायिक अभ्यास पनि पस्किए । तब विदेशी कम्पनीहरू आएर यो सफलता हासिल गर्छन् भने हामी आफैँले किन आफ्नै देशमा गर्न नसक्ने ? यही सोचले नै प्रसिद्धलाई सवारी नामक कम्पनी सुरु गर्न प्रेरित गर्‍यो । उनले अन्यको तुलनामा सवारीमा भने केही पृथक् स्वरुप दिन खोजेको देखिन्छ ।

नेपाली बजारमा विद्यमान राइड शेयरिङ कम्पनीहरूले यात्रा तथा खाद्यान्नसँग जोडिएर काम गरेको पाइन्छ । सवारी एपले भने ड्राइभिङ स्कुलको सेवालाई पनि सँगै जोडेको छ । सवारी एपमा रहेको यो सेवामार्फत ड्राइभिङ सिक्न चाहनेहरूले सवारी एपमार्फत नै ड्राइभिङ स्कुलसँग जोडिन सक्छन् ।

करिब तीन वर्ष एप डेभलप, बजारको अनुसन्धानलगायत तयारीमा बिताएका प्रसिद्ध सवारी ल्याउँदासम्म धेरै अनुभव बटुल्न सफल भएका छन्, जसलाई आफ्नो व्यावसायिक सफलताको आधार मान्छन् ।

सवारीले यात्रुलाई प्रदान गर्ने सेवा सुविधा कस्तो छ त ? अनि चालक र कम्पनीले कसरी कमाइ गर्छन् ? सवारी चालकका लागि पाँच हजारदेखि पाँच लाखसम्म बिनाधितो तथा बिनाब्याज कल्याणकारी सापटी दिने व्यवस्था सवारीले गरेको छ ।

प्रत्येक यात्रुले सवारी एपमा दर्ता हुनेबित्तिकै पच्चीस रुपैयाँ प्राप्त हुन्छ । यात्रुले प्रत्येक यात्रामार्फत ३ प्रतिशत रकम फिर्ता पाउनेलगायत सुविधा कम्पनीले दिने घोषणा गरेको छ । पेमेन्ट गेटवे खल्तीको समेत सहकार्यमा रहेको सवारीलाई आगामी दिन समयअनुरुप परिष्कृत गर्दै तीन वर्षभित्र नेपालका सबै शहरमा विस्तार गर्ने योजना रहेको प्रसिद्ध बताउँछन् ।

प्रसिद्धले ल्याएकाे सवारी एप र यसकाे आगामी याेजनाबारे हेर्नुहाेस् भिडियाेमाः