दक्षिण कोरियासँग बराबरी खेलेसँगै जर्मनी पनि विश्वकपबाट बाहिरियो, मोरक्को नकआउट चरणमा

दक्षिण कोरियासँग बराबरी खेलेसँगै जर्मनी पनि विश्वकपबाट बाहिरियो, मोरक्को नकआउट चरणमा

A+ A A-

दुईपटकको च्याम्पियन जर्मनी महिला विश्वकप फुटबलबाट बाहिरिएको छ । समूह ‘एच’ अन्तर्गत अन्तिम खेलमा दक्षिण कोरियासँग १–१ गोलको बराबरी खेलेसँगै जर्मनी महिला विश्वकपको समूह चरणबाटै बाहिरिएको हो ।

यता, कोलम्बियालाई पराजित गर्दै मोरक्को समूह उपविजेता बन्दै विश्वकपको नकआउट चरणमा प्रवेश गरेको छ । कोलम्बिया मोरक्कोसँग १–० गोलले स्तब्ध बने पनि समूह विजेता बन्दै विश्वकपको प्रिक्वार्टरफाइनलमा प्रवेश गरेको छ ।

अस्ट्रेलियाको ब्रिसबनस्थित सनकर्प रंगशालामा भएको खेलमा जर्मनीले दक्षिण कोरियासँग १–१ गोलको बराबरी खेलेको हो । सुरुमै गोल खाएको जर्मनीले खेल अवधिभर पूरै दक्षिण कोरियालाई दबाबमा राख्यो । तर एक गोल मात्रै फर्काउन सफल भयो । खेलको छैठौँ मिनेटमा चो सो ह्युनले गोल गर्दै बलियो टिम जर्मनीविरुद्ध दक्षिण कोरियालाई १–० गोलको अग्रता दिलाइन् ।

खेलको ४२औँ मिनेटमा एलेक्सान्ड्रा पोपले गोल गर्दै जर्मनीलाई १–१ गोलको स्थितिमा पुर्‍याइन् । दोस्रो हाफमा थप दबाबमा राखे पनि दक्षिण कोरियाविरुद्ध जर्मनीले गोल निकाल्न सकेन ।

तीन खेलमध्ये एकमा जित एक मा बराबरी र एक खेलमा हार ब्यहोरेको जर्मनीले चार अंक बनाउँदा तीन खेलमध्ये दुई खेलमा हार र एक खेलमा बराबरी खेलेको दक्षिण कोरियाले एक अंक बनाउँदै विश्वकप यात्रालाई टुंग्याएको छ ।

आजै समूह ‘ए’ चै अर्को खेलमा कोलम्बियाविरुद्ध मोरक्कोले १–० गोलको जित निकाल्दै विश्वकपको नकआउट चरणमा स्थान बनाएको हो । पहिलो हाफको इन्ज्युरी समयमा अनिस्सा लाहमारीले गोल गर्दै मोरक्कोलाई १–० गोलको जित दिलाइन् ।

समूह विजेता बन्दै प्रिक्वार्टरफाइनलमा स्थान बनाएको कोलम्बियाले तीन खेलमध्ये दुई खेलमा जित र एक खेलमा हारसहित ६ अंक बनायो । यो समूहको उपविजेता बनेको मोरक्को तीन खेलमध्ये दुई खेलमा जित र एक खेलमा हारसहित ६ अंक नै बनाउन सफल भयो ।

प्रिक्वार्टरफाइनलमा कुन टिमविरुद्ध कुन ?

महिला विश्वकप फुटबलको प्रिक्वार्टरफाइनल खेल अगस्ट ५ तारिखबाट सुरु हुँदैछन् । प्रिक्वार्टरफाइनलको पहिलो खेलमा स्वीट्जरल्यान्डले स्पेनसँग प्रतिस्पर्धा गर्नेछ । स्वीट्जरल्यान्ड समूह ‘ए’ को विजेता टिम हो भने स्पेन समूह ‘सी’ को उपविजेता टिम हो ।

अगस्ट ५ मै नर्वेले जापानसँग प्रतिस्पर्धा गर्नेछ । नर्वे समूह ‘ए’ को उपविजेता टिम भने जापान समूह ‘सी’ को विजेता टिम हो ।

अगस्ट ६ तारिखमा क्वार्टरफाइनल प्रवेशका लागि नेदरल्यान्ड्सले दक्षिण अफ्रिकासँग प्रतिस्पर्धा गर्नेछ । नेदरल्यान्ड्स समूह ‘ई’ को विजेता टिम भने दक्षिण अफ्रिका समूह ‘जी’ को उपविजेता टिम हो ।

यही दिन डिफेन्डिङ च्याम्पियन अमेरिकाले स्वीडेनसँग प्रतिस्पर्धा गर्नेछ । अमेरिका समूह ‘ई’ को उपविजेता टिम हो भने स्वीडेन समूह ‘जी’ को विजेता टिम हो ।

अगस्ट सात तारिखमा पनि दुई खेल हुँदैछन् । इंग्ल्यान्डले नाइजेरियासँग प्रतिस्पर्धा गर्दा आयोजक अस्ट्रेलियाले डेनमार्कसँग खेल्नेछ ।

इंग्ल्यान्ड समूह ‘डी’ को विजेता टिम हो भने नाइजेरिया समूह ‘बी’ को उपविजेता टिम हो । यता, अस्ट्रेलिया समूह ‘बी’ को विजेता हो भने डेनमार्क समूह ‘डी’ को उपविजेता टिम हो ।

अगस्ट ८ तारिखमा हुने प्रिक्वार्टरफाइनल खेलमा समूह ‘एफ’ को विजेता फ्रान्सले समूह ‘एच’ को उपविजेता मोरक्कोसँग खेल्नेछ । त्यस्तै, समूह ‘एच’ को विजेता कोलम्बियाले समूह ‘एफ’ को उपविजेता बनेको जमैकासँग प्रतिस्पर्धा गर्नेछ ।

प्रकाशित मिति: बिहीबार, साउन १८, २०८० १८:४६