दक्षिण अफ्रिकासँग पराजित भएसँगै इटाली विश्वकपबाट बाहिरियो

A+ A A-

दक्षिण अफ्रिकासँग पराजित भएसँगै इटाली महिला विश्वकप फुटबलबाट बाहिरिएको छ ।

बुधबार भएको समूह ‘जी’ को अन्तिम खेलमा दक्षिण अफ्रिकासँग ३-२ गोलअन्तरले पराजित भएसँगै इटाली विश्वकपबाट बाहिरिएको हो ।

समूह ‘जी’ बाट स्वीडेन विजेता र दक्षिण अफ्रिका उपविजेता बन्दै महिला विश्वकपको प्रिक्वार्टरफाइनलमा प्रवेश गरेका छन् । न्युजिल्यान्डको विलिङटन रंगशालामा भएको खेलमा दक्षिण अफ्रिकाले इटालीविरुद्ध रोमाञ्चक जित निकालेको हो ।

खेलको ११औँ मिनेटमा अरियान्ना कारुसोले पेनाल्टीमा गोल गर्दै इटालीलाई सुरुवाती अग्रता दिलाएकी थिइन् । तर, खेलको ३२औँ मिनेटमा इटालीकी बेनेडेटा बेर्सीले आत्मघाती गोल गरेपछि खेल १-१ गोलको बराबरीमा आएको थियो ।

पहिलो हाफमा १–१ गोलको बराबरी खेलेको इटालीले खेलको ६७औँ मिनेटमा गोल खान पुग्यो । हिल्डाह मागाइयाले गोल गर्दै दक्षिण अफ्रिकालाई २-१ गोलको अग्रता दिलाएकी थिइन् । तर, खेलको ७४औँ मिनेटमा इटालीकी अरियान्नाले गोल गर्दै खेल २-२ गोलको बराबरीमा ल्याएकी थिइन् । यही स्थितिमा इटालीले खेल सकाएको भए विश्वकपको प्रिक्वार्टरफाइनलमा प्रवेश गर्ने थियो । तर, खेलको इन्ज्युरी समयमा थेम्बी गाट्लनाले गोल गरेपछि दक्षिण अफ्रिकाले इटालीविरुद्ध सनसनीपूर्ण जित निकालेको हो ।

बुधबार नै भएको यही समूहको अर्को खेलमा स्वीडेनले अर्जेन्टिनालाई २-० गोलले पराजित गरेको हो । न्युजिल्यान्डमै भएको खेलमा अर्जेन्टिनाले पहिलो हाफसम्म स्वीडेनसँग बराबरी खेलेको थियो । तर, दोस्रो हाफमा अर्जेन्टिनाविरुद्ध स्वीडेनले दुई गोल गर्दै जित निकालेको हो ।

खेलको ६६औँ मिनेटमा रेबिक्का ब्लोम्कभिस्ट र ९०औँ मिनेटमा इलिन रुबेनस्सनले गोल गर्दै स्वीडेनलाई २–० को जि दिलाए । समूह ‘जी’ को विजेता बनेको स्वीडेनले तीनै खेलमा निकाल्दै ९ अंक बनाउन सफल भयो । उपविजेता बनेको दक्षिण अफ्रिकाले तीन खेलमध्ये एक खेलमा जित, एक खेलमा बराबरी र एक खेलमा हारसहित चार अंक बनायो ।

यता, इटालीले भने एक खेलमा जित र दुई खेलमा हार ब्यहोर्‍यो । अर्जेन्टिनाले पनि तीनमध्ये एक खेलमा बराबरी र दुई खेलमा हार ब्यहोर्दै विश्वकपबाट बाहिरिएको छ ।

प्रकाशित मिति: बुधबार, साउन १७, २०८० १६:४५