महिला विश्वकपः नेदरल्यान्ड्स समूह विजेता बन्दा अमेरिका उपविजेता

A+ A A-

नेदरल्यान्ड्स महिला विश्वकप फुटबलको समूह ‘ई’ को विजेता बन्दै प्रिक्वार्टरफाइनलमा प्रवेश गरेको छ ।

नेदरल्यान्ड्स यो समूहको विजेता बन्दा डिफेन्डिङ च्याम्पियन अमेरिका भने उपविजेता बन्दै प्रिक्वार्टरफाइनलमा प्रवेश गरेको छ ।

मंगलबार भएको खेलमा नेदरल्यान्ड्सले भियतनामलाई ७-० गोलअन्तरले हराउँदा अमेरिकाले पोर्चुगलसँग गोलरहित बराबरी खेलेको हो । न्युजिल्यान्डको फोर्सिथ रंगशालामा भएको खेलमा भियतनामविरुद्ध नेदरल्यान्ड्सले गोलको वर्षा गरेको हो ।

नेदरल्यान्ड्सको जितमा इस्मी ब्रुग्ट्स र जिल रुर्डले समान २-२ गोल गरे । लिकी मार्टेन्स, काट्जा स्नोइजस र ड्यानिल भान डे डोन्कले समान १-१ गोल गरे । खेलको आठौँ मिनेटमा मार्टेन्सले गोल गर्दै नेदरल्यान्ड्सलाई १-० गोलको अग्रता दिलाइन् । खेलको ११औँ मिनेटमा काट्जा, १८औँ मिनेटमा ब्रुग्ट्स र २३औँ मिनेटमा रुर्डले गोल गरेपछि नेदरल्यान्ड्सले ४-० गोलको अग्रता बनायो ।

ड्यानिलले खेलको ४५औँ मिनेटमा गोल गर्दै नेदरल्यान्ड्सलाई पहिलो हाफमा नै ५-० गोलको अग्रता दिलाइन् । खेलको ५७औँ मिनेटमा ब्रुग्ट्स र खेलको ८३औँ मिनेटमा रुर्डले गोल गरेपछि नेदरल्यान्ड्सले भियतनामलाई ७-० गोलले हराएको हो ।

यही समूहमा आजै भएको अर्को खेलमा भने अमेरिकाले पोर्चुगलसँग बराबरी खेलेको हो । यता पोर्चुगल भने अमेरिकासँग गोलरहित बराबरी खेलेपनि विश्वकपबाट बाहिरिएको छ । समूह विजेता बनेको नेदरल्यान्ड्सले तीन खेलबाट दुई खेलमा जित र एक खेलमा बराबरी खेल्दै सात अंक बनाएको हो । समूह चरणबाट उपविजेता बन्दै नकआउट चरणमा पुगेको अमेरिकाले तीन खेलबाट एक खेलमा जित र दुई खेलमा बराबरी खेल्दै पाँच अंक बनायो ।

समूह चरणबाटै बाहिरिएको पोर्चुगलको तीन खेलबाट एक खेलमा जित, एक खेलमा बराबरी र एक खेलमा हारसहित चार अंक छ । तीनै खेलमा हार ब्यहोरेको भियतनाम अंकविहीन हुँदै महिला विश्वकपबाट बाहिरिएको छ ।

प्रकाशित मिति: मंगलबार, साउन १६, २०८० १५:२५