कस्ता व्यक्तिलाई हुन्छ फोक्सोको क्यान्सरको जोखिम ? (भिडियो)

A+ A A-

फोक्सो स्वास्थ्यसम्बन्धी धेरै मानिसहरू सजक नहुने गरेको पाइन्छ । फोक्सोसम्बन्धी संक्रमण तथा क्यान्सर बनाउने प्रमुख कारण धूमपानलाई मान्ने गरे पनि मानिसहरू यसलाई बेवास्ता गरिरहेका हुन्छन् ।

अझ नेपालको कुरा गर्ने हो भने यहाँका सबैजस्तो ठाउँमा धूमपान गर्न सकिन्छ । कानुनी रूपमा यसको बिक्रीवितरण तथा सेवनका लागि व्यक्ति वा स्थान तोकिए पनि त्यसको पालना गर्ने गरेको पाइँदैन ।

त्यसैले विज्ञहरूका अनुसार कुनै व्यक्तिले चुरोट सेवन गरिरहेको अवस्थामा उसको वरवर भएका व्यक्तिहरूलाई समेत उक्त धुवाँले असर गर्ने गर्छ । यस्ता धुवाँजन्य पद्धार्थले क्यान्सरको जोखिम निम्त्याउने सम्भावना उच्च रहेको छाती रोग विशेषज्ञ डा. राजु पंगेनी बताउँछन् ।

फोक्सोको क्यान्सर नेपालमा पहिलो नम्बरमा र विश्वमा दोस्रो नम्बरमा देखा पर्ने क्यान्सर हो । जसका कारण विश्वमा प्रत्येक वर्ष लाखौँ मानिसको मृत्यु हुने गरेको छ ।

डा. पंगेनीका अनुसार फोक्सोको क्यान्सरका लक्षण भेग खालका हुने गर्छन् । जसले गर्दा नेपालमा ५ प्रतिशत बिरामीको मात्रै क्यान्सर पहिलो स्टेजमा पत्ता लाग्ने गर्छ । तर, विकसित देशहरूमा भने यो संख्या अलि बढी छ । सामान्यतया धेरै व्यक्तिलाई खोकी लाग्ने, खकार आउने समस्या देखिन सक्छन् ।

त्यस्तै, विज्ञहरूका अनुसार फोक्सोको क्यान्सरको सबैभन्दा धेरै जोखिम धूमपान गर्ने व्यक्तिहरूलाई हुने गर्छ । विश्व स्वास्थ्य संगठनका अनुसार ९० प्रतिशत फोक्सोको क्यान्सर धूमपानका कारण हुने गर्छ । र, १० प्रतिशत अन्य कारणले हुने गर्छ । यसमा विभिन्न ठाउँमा धुवाँ तथा धुलोमा काम गर्ने व्यक्तिहरू फोक्सोको क्यान्सरको जोखिम देखिने गरेको डा. पंगेनीको भनाइ छ ।

यही विषयमा केन्द्रित भएर डा. पंगेनीसँग गरिएको विस्तृत भिडियो कुराकानीः