सहकारीकी व्यवस्थापक सुनिता जोन्छे, जसका कारण जनजीविका सहकारी समस्यामा पर्‍यो

सहकारीकी व्यवस्थापक सुनिता जोन्छे, जसका कारण जनजीविका सहकारी समस्यामा पर्‍यो

A+ A A-

भक्तपुरको सूर्यविनायकस्थित जनजीविका बचत तथा ऋण सहकारी संस्था अहिले संकटमा परेको छ । उक्त सहकारीले बचतकर्ताले जम्मा गरेको रकम फिर्ता नगरेपछि उनीहरू प्रहरी गुहार्न बाध्य बनेका छन् ।

भक्तपुर प्रहरीले सञ्चालक समितिका व्यवस्थापक सुनिता जोन्छेविरुद्ध पक्राउ पुर्जी नै जारी गरेको छ । यद्यपि उनी पक्राउ भने परेकी छैनन् । सुनिता यसअघि सहकारीको पूर्वउपाध्यक्षसमेत हुन् । उनले सहकारीको करिब ५ करोड रुपैयाँ अपचलन गरेको खुलेको छ । सुनिताका कारण सहकारीका अन्य पदाधिकारीसमेत अप्ठेरोमा परेका छन् । सुनिताकै कारण सहकारीका अध्यक्ष नारायण कार्कीसमेत अनुसन्धानको घेरामा तानिएका छन् ।

सहकारीको रकम अपचलबारे छानबिनका लागि सहकारीले सहकारी विभागसमेत गुहारेको छ । सहकारी विभागको प्रतिवेदनअनुसार बचतकर्ताको रकम हिनामिनामा सुनिताकै भूमिका देखिएको छ । सुनितामाथि अनुसन्धान गरेको भूमि व्यवस्था, सहकारी तथा गरिबी निवारण मन्त्रालय बागमतीले सुनिताका विभिन्न बैंक खातामा एक वर्षको अवधिमा एक करोड ७५ लाख रुपैयाँ बचतकर्ताको रकम जम्मा भएको खुलेको छ ।

त्योबाहेक उनले एक वर्षको अवधिमा करिब २ करोड रुपैयाँको चेकमार्फत कारोबारसमेत गरेको देखिएको छ । शिक्षण पेसाबाट सहकारी क्षेत्रमा प्रवेश गरेकी सुनिताले बचतकर्ताकै रकमबाट चलअचल सम्पत्ति जोडेको सहकारीका अन्य कर्मचारीको आरोप छ ।

सहकारी संकटबारे अध्यक्ष नारायण कार्की सहकारी संटकबारेको छानबिनका क्रममा सुनिताले सहकारीको रकम अपचलन गरेको देखिएको बताए । ‘हामीले अपचलन गरेको रकम फिर्ता गरिनुपर्‍यो भनेका छौँ । उहाँकै कारण हामीसमेत अप्ठेरोमा परेका छौंँ,’ कार्कीले भने ।

सहकारीको रकम केही ऋणीले लिएर फिर्ता नगरेका कारण पनि सहकारी संकटमा परेको उनको गुनासो छ । सुनितामाथि अनुसन्धानका लागि सहकारीका अध्यक्ष कार्की नै सहकारी विभाग पुगेका थिए । सहकारी विभागले गठन गरेको छानबिन समितिका संयोजक जिसीका अनुसार सहकारीकै अध्यक्ष कार्कीले समेत कर्जा लिएको र कर्जाबापत बचतकर्तालाई आफ्नो जग्गाजमिन पास गरिदिएका छन् । तर, सुनिताचाहिँ छानबिन समितिको सम्पर्कमै नआएको संयोजक जिसीले बताए । सुनितामाथि लागेको आरोपबारे बुझ्न शिलापत्रले फोन गर्दा उनीसँग सम्पर्क हुन सकेन ।

प्रहरीलाई झुक्याएर अदालतबाट ‘स्टे अर्डर’

सहकारी विभागमा १८ असार २०८० मा सुनिता जोन्छेविरुद्ध जनजीविका सहकारीको रकम अपचलनबारे छानबिन गर्न माग गर्दै उजुरी परेको थियो ।

सोही उजुरीका आधारमा सुनिताले रकम अपचलन गरेको भन्दै प्रदेश सहकारी ऐन २०७६ को दफा १०४ अनुसार संघ/संस्था सञ्चालक अनुगमन तथा लेखापरीक्षण सम्बन्धी ऐन २०७९ को दफा १९ अनुसार सहकारी कानुनमा कारबाही गर्न सिफारिस गर्दै प्रहरी परिसर भक्तपुरलाई पत्राचार गरेको थियो ।

छानबिन समितिको प्रतिवेदन अनुसार सुनितालाई पक्राउ गर्न प्रहरीले जिल्ला अदालत भक्तपुरबाट पक्राउ पुर्जी जारी गरेको छ । उक्त पक्राउ पुर्जी आएपछि भने उनले पक्राउ पुर्जीविरुद्ध स्टे अर्डर लिएर बसेकी छिन् । सहकारीका एक कर्मचारीका अनुसार सुनितालाई भक्तपुर प्रहरीले पक्राउ पुर्जी जारी हुँदासमेत पक्राउ नगरी स्टे अर्डर लिन समय दिएको आरोप लगाए । ती सहकारीका सदस्यले भने, ‘पक्राउ पुर्जीलगत्तै पक्राउ गर्नुपर्नेमा भक्तपुर प्रहरीले नै सूचना चुहाएर उनलाई अदालतबाट पक्राउ पुर्जीविरुद्ध स्टे अर्डर लिन सहयोग गर्‍यो ।’

तर, भक्तपुर प्रहरी परिसरका प्रमुख (एसपी) प्रजित केसीले भने सुनिताविरुद्ध उजुरी आएको स्वीकार गरे पनि उनी प्रहरीको सम्पर्कमा नआएको बताए । ‘सुनिताबारे केही कुरा आएका छन् । तर, उनी हाम्रो सम्पर्कमा आएकी छैनन् । अदातलबाट स्टे अर्डर लिएको पनि जानकारी हामीलाई छैन,’ एसपी केसीले भने ।

प्रकाशित मिति: मंगलबार, साउन १६, २०८० १३:४७