रेशमकाे पार्टी सुदूरपश्चिम सरकारमा सहभागी हुने, बालुवाटारमा के–के भयाे सहमति ?

रेशमकाे पार्टी सुदूरपश्चिम सरकारमा सहभागी हुने, बालुवाटारमा के–के भयाे सहमति ?

A+ A A-

नागरिक उन्मुक्ति पार्टीका संरक्षक रेशमलाल चौधरीले आफ्नो पार्टी सुदूरपश्चिम सरकारमा सहभागी हुने बताएका छन् । सुदूरपश्चिम सरकार विस्तारका क्रममा आफ्ना प्रदेशसभा सदस्यले बिहीबार मन्त्रीको शपथ लिने उनले बताए । आज बालुवाटारमा शीर्ष नेताहरूबीच भएको छलफलमा सहमति जुटेसँगै प्रदेश सरकार विस्तारको मिति तय भएको छ ।

जसअनुसार नागरिक उन्मुक्तिले १ मन्त्री १ राज्यमन्त्री र २ समितिको सभापति पाउने सहमति भएको नाउपाकी अध्यक्षसमेत रहेक‍ी भूमि व्यवस्था सहकारी तथा गरिबी निवारणमन्त्री रन्जिता श्रेष्ठ चौधरीले जानकारी दिइन् ।

यस्तै खाली रहेको एक मन्त्रालय कांग्रेसले पाउने भएको छ । बालुवाटारमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति प्रधानमन्त्री शेरबहादुर देउवा, सुदूरपश्चिमका मुख्यमन्त्री कमलबहादुर शाह, भूमि व्यवस्था सहकारी तथा गरिबी निवारण मन्त्री तथा नागरिक उन्मुक्ति पार्टीकी केन्द्रीय अध्यक्ष रञ्जिता श्रेष्ठ चौधरी, संरक्षक रेशम चौधरी, प्रदेश आर्थिक मामिला मन्त्री नरेशबहादुर शाही र उद्योग पर्यटन वन तथा वातावरणमन्त्री रमेश धामी छलफलमा सहभागी थिए ।

यसअघि नागरिक उन्मुक्तिले २ मन्त्रालयको दाबी गर्दै आएको थियो । आजको सहमतिअनुसार प्रदेशको भूमि व्यवस्था कृषि तथा सहकारी मन्त्रालय नागरिक उन्मुक्तिले पाउने भएको छ भने आन्तरिक मामिला तथा कानुन मन्त्रालय कांग्रेसले पाउने छ ।

कृषि मन्त्रालयमा ७ महिनादेखि मन्त्री छैनन् भने पृथ्वीबहादुर सिंहको सडक दुर्घटनामा मृत्यु भएपछि कानुन मन्त्रालय मन्त्रीविहीन भएको थियो । नागरिक उन्मुक्ति पार्टीले यसअघि नै मुख्यमन्त्री शाहलाई मन्त्रीमा रामेश्वर चौधरी र राज्यमन्त्रीमा कैलाश चौधरीलाई शपथ गराउन पत्र पठाएको थियो । उन्मुक्तिले २ मन्त्रालयको दाबी कायमै राखेपछि शपथ रोकिएको थियो । आजकाे सहमतिसँगै सुदूरपश्चिम सरकारले पूर्णता पाउने भएको छ ।