प्रचण्ड-ओली वार्तामा सत्ता र प्रतिपक्षले देखेको दुईथरि कुरा

A+ A A-

सोमबार प्रधानमन्त्री पुष्पकमल दाहाल प्रचण्ड र प्रमुख प्रतिपक्षी दल एमाले अध्यक्ष केपी शर्मा आलीबीच बालुवाटारमा भएको छलफल र सहमति भएको बारे दुईथरि बुझाइ आयो । सत्ता पक्षले एमाले बालुवाटारमा संसदको अवरोध हटाउन तयार भएको तर बानेश्वर पुग्दा पछि हटेकाे रूपमा बुझेको छ भने एमालेले सो भेटमा प्रधानमन्त्री प्रचण्डले प्रस्ट जवाफ नदिएको ब्रिफ गरेको छ ।

त्रिभुवन अन्तर्राष्ट्रिय विमानस्थलबाट एक क्वीन्टल सुन भन्सार पास भएर बाहिरिएको घटनामा छानबिन हुनुपर्ने माग गर्दै एमालेले संसद अवरोध गर्दै आएको छ । सो विषयमा छलफल गर्न एमाले अध्यक्ष ओली बालुवाटार पुगेका थिए । सुन तस्करीको जिम्मेवारी गृहमन्त्रीले लिनुपर्ने र उच्चस्तरीय छानबिन समिति बन्नुपर्ने एमालेको अडान छ ।

बालुवाटारको भेटमा ओलीले प्रधानमन्त्री प्रचण्डलाई छानबिन समिति बनाएर मिलेर जान प्रस्ताव गरेका थिए । यसमा प्रधानमन्त्री प्रचण्डले प्रस्ट जवाफ दिएनन् । ‘हाम्रो अध्यक्षज्यूको प्रस्तावमा प्रधानमन्त्रीज्यूले हेर्छु, हुन्छ, हेरौँला भन्ने जवाफ दिनुभयो,’ एमाले प्रमुख सचेतक पदम गिरीले शिलापत्रसँग भने ।

बालुवाटार पुगेर ओलीले राखेकाे प्रस्तावमा प्रचण्डले दिएनन् प्रस्ट जवाफ

तर, प्रचण्ड र ओलीको भेटमा सत्तारुढ दल माओवादीलाई भने फरक सूचना दिइएको प्रमुख सचेतक हितराज पाण्डेको भनाइले देखाउँछ । प्रधानमन्त्री प्रचण्ड र ओलीबीच संसद खुलाउने सहमति भएको उनी दाबी गर्छन् । ‘कहाँबाट छानबिन समितिको कुरा आयो ? सरकारले छानबिन गरिरहेको छ । अनुसन्धान रोकिएको छैन । पहिले प्रतिपक्षी दलका एक जनाले बोल्ने त्यसमा गृहमन्त्रीले जवाफ दिने र संसद खोल्ने कुरा थियो,’ उनले शिलापत्रसँग भने । प्रधानमन्त्री स्रोत (कार्यालय) बाट आफूले सो जानकारी पाएको उनले बताए ।

प्रतिपक्षी एमालेको कुरा पत्याउनै गाह्रो भएको पाण्डेको भनाइ छ । ‘प्रमुख प्रतिपक्षी दलको कुरा दिनदिनै फेरिरहेको छ । के कुरालाई पत्याउने ? अस्ति राजीनामा चाहिन्छ भने । आज गृहमन्त्रीले बोलेपछि हुन्छ भनेर बोलेपछि हुन्छ भनेको कुरा त प्रधानमन्त्री र प्रमुख प्रतिपक्षी दलको नेता बसेर गरेका हुन्,’ उनले भने ।

सुन प्रकरणले घेरिए प्रधानमन्त्री प्रचण्ड

सोमबार प्रधामन्त्रीको सरकारी निवास बालुवाटारमा प्रधानमन्त्री प्रचण्ड सुन प्रकरणले घेरिए । पार्टीको पदाधिकारी बैठकमा उपमहासचिव वर्षमान पुनले एक क्वीन्टल सुन तस्करीबारे छानबिन गर्न संसदीय वा न्यायिक समिति बनाउन माग गरे ।

वर्षमानलाई प्रश्न- सुन प्रकरणमा मुछिएपछि छानबिन समिति बनाउन प्रस्ताव गर्नुभएको हो ?

उनले छानबिनमा दोषी देखिए आफू जस्तोसुकै सजाय भोग्न तयार रहेको र अरु नेता पनि तयार हुनुपर्ने बताए । पुनले छानबिन गर्न प्रहरीको अपराध अनुसन्धानमा विज्ञ टोली, संसदीय समिति वा विशेष समिति बनाउन माग गरे । ‘अनुसन्धानमा विज्ञ निकाय, न्यायिक वा संसदीय छानबिन समिति जे उपयुक्त हुन्छ, त्यो बनाएर छानबिन हुनैपर्छ,’ उनले भने ।

प्रधानमन्त्री प्रचण्डले पार्टी बैठकलाई थामथुम पारे । तर, प्रधाानमन्त्री प्रचण्डसँग दलहरूका प्रमुख सचेतहरूको छलफल हुँदा छानबिन समितिको कुरा फेरि उठ्यो । एमालेको अवरोधका कारण स्थगित भएको बैठक खुलाउने विषयमा कांग्रेस प्रमुख सचेतक रमेश लेखक, माओवादी प्रमुख सचेतक हितराज पाण्डे र रास्वपाका प्रमुख सचेतक सन्तोष परियारसँग प्रधानमन्त्रीले छलफल गरेका थिए ।

प्रधानमन्त्री प्रचण्ड र रास्वपा प्रमुख सचेतक परियारबीच भेट, के भयाे कुराकानी ?

रास्वपाका प्रमुख सचेतक परियार संसदको अवरोध हटाउने र संसद चलाउनेमा प्रधानमन्त्री ढुक्क देखिएको बताउँछन् । ‘प्रधानमन्त्री ज्यू बिहान संसद खुल्छ भन्नुभएको थियो । उहाँले एमाले अध्यक्षसँगको भेट हुँदै गरेको जानकारी दिनुभएको थियो । तर पछि संसद भवनमा सभामुखसँगको भेटमा एमाले सांसदहरूले उच्चस्तरीय छानबिन समिति गठन नगरी हुँदैन भन्नुभयो । यही कुरा मिलेन,’ उनले शिलापत्रसँग भने । सचेतकहरूसँगको भेटपछि प्रधानमन्त्री प्रचण्डले एमाले अध्यक्ष ओलीसँग भेट गरेका थिए ।

सरकार डरायो : एमाले

नेताहरू फस्ने डरले सरकार छानबिन समिति बनाउन पछि हटेको एमालेको बुझाइ छ । ‘किन उच्चस्तरीय छानबिन समिति बनाउन चाहँदैनन् भने मन्त्रीहरू, हाइप्रोफइलका कर्मचारी र नेताहरू तानिन सक्छन् । त्यही कारणले उच्चस्तरीय छानबिन समिति बनाउन तयार छैन सरकार । हामी नेपाललाई तस्करको हब बनाउन चाहँदैनौं । तस्करीको हब नेपाल बन्दै गएको छ,’ एमाले प्रमुख सचेतक पदम गिरीले भने ।

सरकार अहिले पनि सुन तस्करी प्रकरणमा उच्चस्तरीय छानबिन समिति बनाउने पक्षमा छैनः महेश बर्तौला

समिति के का लागि ?

समिति बनाउनु भनेको प्रकरणलाई निचोडमा पुर्‍याउनुभन्दा पनि थाती राख्ने प्रपञ्च रहेको सत्ता पक्षको बुझाइ छ । मिटिङ बस्ने र नियुक्तिमा भाग खोजेको आरोप उनीहरूको छ ।

‘२०७० चुनावमा धाँदली भयो भनेर लक्ष्मण कर्णको नेतृत्वमा समिति बनाइयो । त्यसको रिपाेर्ट छैन । बजेट लिक भयो भनेर ७० पछाडि विष्णु पौडेलको पालामा म पनि सदस्य रहेको समिति बनेको थियो । दुईपटक मिटिङ बसेर कोल्याप्स भयो । समिति बनाइदिएपछि सजिलो हुने रहेछ,’ कांग्रेस नेता रामहरि खतिवडाले शिलापत्रसँग भने, ‘समिति गठन गरेपछि संवैधानिक परिषद्को बैठक बस्छ । कहिँ नियुक्तिको भागवण्डा खोजेर एमाले अघि जाने हो ।’

ओली नक्कली भुटानी शरणार्थी प्रकरण, बालुवाटार जग्गा प्रकरण, नागरिकता विधेयकलगायतका विषयमा प्रधानमन्त्री प्रचण्डसँग कुरा गर्न बालुवाटार पुगेका थिए । यसलाई एमाले जे कुरामा पनि आत्तिएको छ भन्ने बुझाइ सत्ता पक्षका सांसदहरूको छ ।

संसदीय समितिका प्रतिवेदन कार्यान्वयन हुँदैनन् । समिति बनाएर अध्ययन गर्ने तर कार्यान्वयन गर्न बिर्सने समस्या रहेको एमाले प्रमुख सचेतक गिरी बताउँछन् । ‘प्रतिवेदन कार्यान्वयन हुनुपर्छ । दीर्घकालीन रुपमा सुन तस्करीको काम रोक्नुपर्छ । समितिले अपराध कोणबाट हेर्नेभन्दा पनि नीतिगत तहमा रहेर अध्ययन गर्छ,’ उनले भने ।

एमाले अडानबाट बछि नहटेपछि सोमबारको संसद बैठक मंगलबार १ बजेसम्मको लागि स्थगित गरिएको छ ।

सम्बन्धित समाचार

प्रकाशित मिति: सोमबार, साउन १५, २०८० २०:१५