यो त अलि हजम भएन नि महोदय !

A+ A A-

फोहोर व्यवस्थापन गर्न विगत लामो समयदेखि पोखरा महानगरपालिकाका प्रमुख धनराज आचार्य दिनरात नभनी खटिइरहेको त हामी सबैलाई अवगत नै छ । पोखराको फोहोर व्यवस्थापनमा सर्वप्रथम त हामी महानगरपालिकावासी नै जिम्मेवार हुन जरुरी छ । यहाँ फोहोर कुनै अन्य ठाउँबाट आएको हैन । यो त स्वयम् हामी र हाम्रो दैनिक गतिविधि तथा दिनचर्याबाट निस्किने हो । यसको उचित व्यवस्थापन र ऊर्जाशील बनाउन महानगरपालिका लागिरहेको छ ।

केही समयमा फोहोरबाट ऊर्जा उत्पादन हुने हुँदा केही समय धैर्यधारण गरी सडकका चोकचोकमा फोहोर फाल्ने, नदीनालामा फाल्ने कार्यहरू गर्नु अनि आफैँ विरोधमा आउनु झनै लज्जास्पद हैन र ?

पोखरा अन्तर्राष्ट्रिय विमानस्थलका कारण ल्यान्डफिल साइट परिवर्तन गर्नुपरेको हुँदा वातावरण, वन्यजन्तु, चराचुरुङ्गी, नदीलगायत मानव बस्तीमा असर नपर्ने गरी उचित व्यवस्थापन गर्नुपर्ने हुँदा केही समय ढिला हुन गएको हो । केही दिन फोहोर व्यवस्थापनमा ढिलाइ हुँदा नदी, नाला र चोकचोकमा फाल्दा हामी नगरवासीमा हैजा, मलेरिया, डेंगीजस्ता सरुवा रोग लाग्न सक्छ र यसले महामारीको रूपसमेत लिन सक्छ । त्यसैले मेयरज्यू, फोहोरको व्यवस्थापनका लागि जुन अग्रसरताका साथ महानगरपालिका लागिपरिरहेको छ, यसबाट नयाँ ल्यान्डफिल साइट चाँडै नै सञ्चालनमा आउनेछ भन्ने हामी विश्वस्त छौँ, चाँडै नै सञ्चालनमा आओस् पनि । शुभकामना छ ।

पोखरा महानगरपालिकाले अघि सारेका फोहोर व्यवस्थापनका योजनाहरू सफलताका साथ सम्पन्न गर्न सकियो भने पोखरा महानगरवासीका लागि हर्षका साथ गर्व गर्ने दिन आउँछन् । सकेसम्म आफ्नो टोललाई सफा राखौँ, नसके जथाभावी फोहोर नगरौँ ।

पोखरा महामगरपालिकाको यस कार्यमा कतिपय व्यक्तिहरूले विरोध गरेर फोहोरमा राजनीति गर्ने दुस्साहस पनि गरिरहेका छन् । भलै विरोध गर्ने व्यक्तिहरू नै फोहोरका पोकाहरू बोकेर चोकतिर देखिएका छन् । यो त अलि हजम भएन नि महोदय ! केही समय धैर्यधारण गरी घरमा फोहोर राख्नु राम्रो हुन्छ । चोकचोकमा राखिएका सीसी क्यामेरामा कैद तस्वीर र भिडियोले बदनामी बनाऊला, सचेत रहनुहोस् । फोहोर चोकमा नफाल्नुस्, घरमै उचित तरिकाले राख्नुहोस् । महानगरपालिका आउँछ उठाउन ।

आर्थिक हिसाबले पनि मेयरज्यूको पहलमा फोहोरबाट महानगरपालिकाको आम्दानी वृद्धि गर्ने योजना छ । मेयरसा'बले फोहोर प्रशोधन केन्द्रबाट निकट भविष्यमै बिजुली निकाल्ने, कम्पोस्ट मल बनाउने तथा प्लास्टिकजन्य सामग्री बनाउने योजनाहरू ल्याउनुभएको छ । यो एकदमै राम्रो विषय हो । बरु फोहोर व्यवस्थापनका यस्ता योजनाहरू जतिसक्दो चाँडो निर्माण भएर सञ्चालन आऊन् ।

फोहोरबाट बिजुली उत्पादनका साथै वातावरणमैत्री मेसिनमा प्लास्टिक (3R Method Reuse Recycle and Reduce) प्रशोधन हुँदा यसबाट निस्किने खरानी कृषकहरूलाई दिए त्यसले कम्पोस्ट मलको काम गर्ने र खाद्यान्न उत्पादनमा पनि वृद्धि हुन्छ ।

पोखरा महानगरपालिकाले अघि सारेका फोहोर व्यवस्थापनका योजनाहरू सफलताका साथ सम्पन्न गर्न सकियो भने पोखरा महानगरवासीका लागि हर्षका साथ गर्व गर्ने दिन आउँछन् । सकेसम्म आफ्नो टोललाई सफा राखौँ, नसके जथाभावी फोहोर नगरौँ ।

प्रकाशित मिति: सोमबार, साउन १५, २०८० ०८:३८