खसीको सुकुटी ब्रान्डिङ गर्दै पूर्ण (भिडियाे)

A+ A A-

पशुसेवा विभागका अनुसार नेपाली बजारमा वर्सेनि करिब तीन लाख ८५ हजार मेट्रिक टन मासु खपत हुने गरेको छ ।

जसमध्ये काठमाडौं उपत्यकामा सबैभन्दा धेरै खपत तथा मासुको कारोबार हुने गरेको पशुपक्षी बजार निर्देशनालयको तथ्याङ्कले देखाउछ । यसको अर्थ यो व्यवसायलाई फरक ढंगले गर्ने हो भने यसमा अथाह सम्भावना छ ।

छोटो समयमा मासु व्यवसायबाट पूर्ण श्रेष्ठले हासिल गरेको सफलताले पनि मासु व्यवसायमा रहेको सम्भावनालाई प्रस्ट पार्छ ।

श्रेष्ठले मासु व्यवसायबाट हासिल गरेको सफलताभन्दा पहिला हेरौं उनी कसरी यो व्यवसामा प्रवेश गरे ? उनका बुबा पनि मासु व्यवसायी थिए । सानु छँदा बुबालाई सहयोग गर्ने क्रममा नै यस व्यवसायबारे उनले धेरै ज्ञान पाइसकेका थिए । यद्यपि उनको चाहना भने कलाकार बन्ने थियो ।

तर पढ्दै र बढ्दै जाँदा उनको सोचमा पनि परिवर्तन आयो । जीवनमा कमाउनु छ भने आफूले जानेको काम नै गर्नुपर्छ भन्ने बुझे । उनले जानेको काम भनेको मासु व्यवसायभन्दा अरु केही थिएन । चार वर्षअघिको मात्र कुरा हो । मासु व्यवसाय नै गर्नुपर्छ भन्ने निर्णयमा पुगेसँगै उपयुक्त ठाउँको खोजीमा महिनौं भौतारिएपछि इमाडोलमा चित्त बुझ्दो स्थान फेला पारे र मासु व्यवसायको यात्रा सुरु भयो ।

लकडाउनले धेरैको व्यवसायलाई सुकाइदियो । तर श्रेष्ठकाे व्यवसायलाई भने त्यही लकडाउनले उकासिदियो । व्यवसायले राम्रो लय समात्यो । उनलाई विदेशमा रहेका धेरै साथीभाइले खसीको सुकुटी बनाउन प्रस्ताव गर्न थाले ।

लागत महँगो भएकै कारण नेपालमा व्यसायिक रुपमा खसीको सुकुटी उत्पादन हुने गरेकै थिएन । तर विदेश रहेका नेपालीमा यसको माग भने निकै राम्रो रहेको तथ्य उनले फेला पारे ।

जतिबेला टिकटकलगायत सामाजिक संजालमा उनी आफ्नो मासु व्यवसायका कारण चर्चित बनिरहेका थिए । उनले त्यही टिकटकबाट विदेशमा रहेका नेपालीसमेतमा मार्केटिङ गर्ने सोचका साथ करिव ६ महिनाअघि उदयपुरे मटन सुकुटी नाममा सुकुटी उत्पादन सुरु गरेर विदेशमा निर्यात गर्न थाले ।

श्रेष्ठको उदयपुरे मासु पसलमा सुरुवाती दिनमा एउटा दुईवटा कुखुरा मात्र बिक्री हुन्थ्यो । तथापि उनी त्यसबेला आत्तिएनन् ।

बरु पछिल्लो समय प्रत्येक मान्छेको पहुँचमा सबैभन्दा प्रभासाली रुपमा विकास र विस्तार भएको सामाजिक संजाललाई आफ्नो व्यापारलाई प्रवर्धन र विस्तार गर्ने सशक्त माध्यका रुपमा प्रयोग गरे । जसको परिणाम हाल दैनिक तीनवटा खसीको मासु, करिव सय केजीमाथि कुखुरा र सय केजी सुकुटी बिक्री गर्दै आएका छन् ।

इमाडोलमा पसल संचालन गरेका श्रेष्ठले सुकुटी भने मुलपानीमा बनाउँछन् । बिहानको समय पसलका लागि छुट्याएका छन् । दिउँसो सुकुटी बनाउन पुग्छन् ।

आठ जनालाई रोजगारी दिइरहेका श्रेष्ठकाे अबको लक्ष्य भनेको उदयपुरे मटन सुकुटीलाई विश्वभरि रहेका सबै नेपाली माझ पुर्‍याउने रहेको छ । तर नीतिगत अफ्ठ्याराका कारण नेपालमै रहेर आफूले देखेको सपना पूरा हुने अवस्था उनले देखेका छैनन् । त्यसैले युरोपमा केन्द्रित भएर उदयपुरे मटन सुकुटीलाई उत्पादन र प्रवर्द्धन गर्ने योजनामा काम गरिरहेका छन् ।

प्रकाशित मिति: आइतबार, साउन १४, २०८० २१:३१