प्रिमियर लिगमा शीर्ष क्लब टोटनह्याम, युनाइटेड र चेल्सी विजयी

A+ A A-

इंग्लिस प्रिमियर लिग फुटबल अन्तर्गत शनिबार राति भएको खेलमा शीर्ष क्लबहरु टोटनह्याम हट्सपर, म्यान्चेस्टर युनाइटेड र चेल्सीले जित हात पारेका छन् ।

घरेलु मैदानमा भएको खेलमा टोटनह्यामले क्रिष्टल प्यालेसलाई ४–० गोल अन्तरले पराजित गरेको हो । उसले चारै गोल पहिलो हाफमा गरेको हो ।

टोटनह्यामको जितमा सन ह्युङ–मिनले दुई गोल गरे भने एरिक लामेलाले एक गोल गरे । क्रिष्टल प्यालेसका प्याट्रिक भान एनहोल्टले आत्मघाती गोल गरेका थिए ।

सनले खेलको १० औं मिनेटमा नै गोल गर्दै अग्रता बनाएका थिए । २१ औं मिनेटमा प्याट्रिकले आत्मघाती गोल गरे भने त्यसको दुई मिनेटपछि सनले व्यक्तिगत दोस्रो गोल गरे । ४२ औँ मिनेटमा लामेलाले गोल गरेपछि पहिलो हाफमै टोटनह्यामले ४–० को अग्रता लियो ।

दोस्रो हाफमा दुवै तर्फबाट गोल हुन सकेन र टोटनह्याम विजयी भयो । जितपछि पाँच खेलबाट ८ अंक जोडेको टोटनह्याम तेस्रो स्थानमा उक्लिएको छ ।

लिग अन्तर्गत शनिबार राति नै भएको अर्को खेलमा म्यानचेस्टर युनाइटेडले लेस्टर सिटीलाई १–० ले पराजित गरेको छ । युनाइटेडको जितमा आठौं मिनेटमा पाएको पेनाल्टीमार्फत मार्कश रासफोर्डले गोल गरे ।

यस्तै अर्को खेलमा चेल्सीले उल्भ्सलाई ५–२ ले पराजित गरेको छ । चेल्सीको जितमा ट्यामी अब्राहमले ह्याट्रिक गरे भने फिकायो टिमोरी र मासन मोन्टले एक एक गोल गरे । ५ खेलबाट ८ अंक जोडेको चेल्सी छैटौं स्थानमा छ भने समान ८ अंक रहेको लेस्टर पाँचौँ स्थानमा नै छ ।

शनिबार रातिका अन्य खेलमा साउथह्याम्पटनले शेफिल्ड युनाइटेडलाई १–० ले पराजित गरेको छ भने ब्राइटन र बर्नलीले १–१ को बराबरी खेलेका छन् ।

प्रकाशित मिति: आइतबार, भदौ २९, २०७६ १८:४३