बागमतीमा ६८ दिनदेखि 'बिनाविभागीय' मन्त्री चित्रकार: दुई महिना होटलमा बसेर भर्खर कोठा खोजेँ, अब राजीनामा दिन्छु

बागमतीमा ६८ दिनदेखि 'बिनाविभागीय' मन्त्री चित्रकार: दुई महिना होटलमा बसेर भर्खर कोठा खोजेँ, अब राजीनामा दिन्छु

A+ A A-

बागमतीका बिनाविभागीय मन्त्री रामकृष्ण चित्रकार विगत ६८ दिनदेखि हेटौँडास्थित मुख्यमन्त्री तथा मन्त्रिपरिषद् कार्यालयमा थन्किएका छन् ।

प्रदेश प्रमुख यादवचन्द्र शर्माबाट ७ जेठ २०८० मा बिनाविभागीय मन्त्रीको शपथ लिएका चित्रकारले ६८ दिनसम्म न जिम्मेवारी पाएका छन् न त बस्ने क्वाटर नै । दुई महिनासम्म होटलमा बसेका उनले भर्खरै हेटौँडामा एउटा कोठा भाडा लिए । ‘दुई महिनासम्म त होटलमै बसेँ । भर्खर कोठा भाडामा लिएर बस्न थाल्या छु’, शिलापत्रसँगको भेटमा मुसुक्क हास्दै चित्रकार सुनाउँछन् । मुसुक्क मुस्काउने चित्रकारको भित्री पीडा भने धेरै छ ।

कांग्रेस बागमती प्रदेश संसदीय दलका उपनेतासमेत रहेका चित्रकार प्रदेशसभा निर्वाचनमा विजयी भएपश्चात मुख्यमन्त्रीको दाबेदार थिए । उनी ललितपुर २ 'ख' बाट ६ हजार ९ सय ९५ मतसहित निर्वाचित भएका थिए । कांग्रेसबाट चित्रकारसहित यसअघिका प्रदेश संसदीय दलका नेता इन्द्रबहादुर बानियाँ, हाल दलको नेतासमेत रहेका आर्थिक मामिला तथा योजनामन्त्री बहादुरसिंह लामा मुख्यमन्त्रीका दाबेदार थिए । जसमध्ये संसदीय दलको नेतामा लामा विजयी भएसँगै मुख्यमन्त्रीको रेसमा अगाडि देखिए ।

तर, सत्ता गठबन्धनको भागवण्डामा नेकपा माओवादी केन्द्रले बागमती प्रदेश पाएसँगै शालिकराम जम्कट्टेल मुख्यमन्त्री बने र कांग्रेसबाट लामाले सरकारमा नेतृत्व गरे । कांग्रेसले झन्डै २ महिना मन्त्रीहरूको नाम नदिँदा सरकारले पूर्णता पाउन सकेको थिएन । तर, ७ जेठमा चित्रकारसहित ६ जना मन्त्रीहरूले पद तथा गोपनीयताको शपथ खाए । कांग्रेसबाट मसिना खड्का भण्डारी वन तथा वातावरण, पुकार महर्जन पर्यटन, उद्योग तथा सहकारी र उत्तम जोशी स्वास्थ्यमन्त्री बने । तर, दलको उपनेता नै बिनाविभागीय मन्त्री बन्न पुगे ।

पछि जिम्मेवारी तोकिने विश्वास दिलाएर पार्टीभित्रको विवाद समाधानका लागि मन्त्री बनाइए पनि चित्रकार हालसम्म पनि जिम्मेवारीविहीन छन् । बागमतीमा ६-४-२ को भागवण्डा लागेपछि ६ नयाँ मन्त्री थपिएसँगै बागमती प्रदेशको मन्त्रिपरिषद् १२ सदस्यीय बनेको थियो । यसअघि मुख्यमन्त्री शालिकराम जम्कट्टेलले १४ सदस्यीय मन्त्रिपरिषद्लाई ११ सदस्यीय बनाएका थिए । गठबन्धनमा भागवण्डा नमिल्दा उनी आफ्नै निर्णयबाट पछि हट्न बाध्य भएका थिए ।

यता, चित्रकार भने भागवण्डामा देखिएको विवाद, मन्त्रालय संख्या बढाउन नचाहेका मुख्यमन्त्री जम्कट्टेलको अडानको भूमरीमा परे । मन्त्रालय संख्या बढाएर विवादित बन्न नचाहनेमा मुख्यमन्त्री जम्कट्टेल छन् । निवर्तमान मुख्यमन्त्री राजेन्द्रप्रसाद पाण्डेको आलोचना सरकारमै बसेर देखेका उनले ६८ दिनसम्म चित्रकारलाई जिम्मेवारी नदिँदा भने गठबन्धनमा विवाद देखिन थालेको छ । चित्रकारले राजीनामा दिने चेतावनी दिएका छन् ।

चित्रकार आफूलाई मुख्यमन्त्री कार्यालयमा राखेर खरिदार कर्मचारीको हैसियतमा पुर्‍याएको भन्दै रुष्ट छन् । ‘मलाई जिम्मेवारी पछि तोकिने भनेर मन्त्रीको शपथ गराइयो । अहिले मुख्यमन्त्री कार्यालयमा राखेर खरिदार कर्मचारीजस्तो बनाइएको छ । कर्मचारीको दैनिकीले म दिक्क भइसकेँ । अब राजीनामा दिन्छु,’ उनले शिलापत्रसँग भने । मुख्यमन्त्रीले तत्काल जिम्मेवारी नदिए राजीनामा दिन बाध्य हुने उनको भनाइ छ ।

उनी मन्त्री भएपछि पनि होटलमै बसिरहेका थिए । विगत दुई महिनादेखि होटलमा बसेर भर्खरै मात्र कोठा खोजेको चित्रकारले बताए । मन्त्रालय भागवण्डाको विवादले ५७ दिनसम्म अपूर्ण सरकार चलाएका बागमती प्रदेशका मुख्यमन्त्री शालिकराम जम्कट्टेलको तनाव भने अझै सकिएको छैन । तत्कालीन एमाले र राप्रपासँगको गठबन्धन टुटेर कांग्रेस र नेकपा (एकीकृत समाजवादी) सँग मिलेपछि दोस्रोपटक विश्वासको मत लिएर सरकार चलाइरहेका जम्कट्टेल बजेटको तयारी देखाएर चित्रकारलाई पन्छाइरहेका थिए ।

बजेट पनि सकिएपछि भने चित्रकारलाई थम्थमाउने ठाउँ नदेखिएकाले मुख्यमन्त्री जम्कट्टेल दबाबमा छन् । उनलाई बजेटभन्दा पनि कांग्रेसको मन्त्रालय फुटाउने अडान टाउको दुखाइ बनिरहेको छ । गत १० चैतमा कांग्रेस, एकीकृत समाजवादी र हाम्रो नेपाली पार्टीको मतबाट दोस्रोपटक विश्वासको मत लिएका जम्कट्टेलले कांग्रेसको अडानसामु आफ्नो निर्णय टिकाउन सकेनन् । गत पुसमा मुख्यमन्त्रीको पदभार ग्रहणपछि मन्त्रालय संख्या ११ पुर्‍याएका उनले आफ्नो कार्यकालभर मन्त्रालय नबढ्ने र राज्यमन्त्री पनि नबनाउने घोषणा गरेका थिए ।

राज्यमन्त्री नबनाउने घोषणामा उनी अडिग छन् भने मन्त्रालय संख्या १२ पुग्न उनले रोक्न सकेनन् । ६ वटा मन्त्रालय लिएरै छाड्ने कांग्रेसको अडानपछि जम्कट्टेल ‘ब्याक’ भएका थिए । अब कांग्रेसबाट बिनाविभागीय मन्त्री बनेका दलका उपनेता चित्रकारलाई एउटा मन्त्रालयको जिम्मेवारी दिनुपर्ने दबाबमा उनी छन् । जम्कट्टेललाई एउटा मन्त्रालय फुटाएर बजेट अगावै चित्रकारको जिम्मेवारी तोक्न कांग्रेसले दबाब बढाइरहेको थियो । तर, उनले टारे ।

कांग्रेसको आँखा माओवादी केन्द्रका युवराज दुलालले सम्हालिरहेको भौतिक पूर्वाधार विकास मन्त्रालयमा परेको छ । प्रदेशको सबैभन्दा ठूलो बजेट हिस्सा ओगटेको भौतिक मन्त्रालय फुटाएर चित्रकारलाई जिम्मेवारी दिनुपर्ने माग कांग्रेसले मुख्यमन्त्री जम्कट्टेलसामु राखेको हो । तर, मुख्यमन्त्री जम्कट्टेल भने भौतिक मन्त्रालय फुटाउने पक्षमा नदेखिएपछि कांग्रेसको अडान धरमरमा छ ।

चित्रकार स्वयम्‌ले भौतिक मन्त्रालय फुटाउन प्रस्ताव लगेको स्वीकार गरे । भौतिक मन्त्रालय फुटाएर शहरी विकास तथा भवन हेर्ने गरी छुट्टै मन्त्रालय बनाउनुपर्ने प्रस्ताव कांग्रेसले राखेको हो । चालु आर्थिक वर्ष २०८०-८१ का लागि शहरी विकास तथा भवनको शीर्षकमा छुट्टै बजेट पनि विनियोजन भएको छ । उक्त बजेटलाई मन्त्रालय विभाजनसँग हेरिएको छ । तर, माओवादीभित्रकै दबाबले उक्त कार्य रोकिन पुगेको हो ।

बिनाविभागीय मन्त्री चित्रकारले हप्ता दिनभित्र मन्त्रालयको जिम्मेवारी पाउनुपर्ने बताउँछन् । कांग्रेसले चित्रकारलाई भौतिक मन्त्रालय फुटाएर जिम्मेवारी दिनुपर्ने दबाब दिएपछि माओवादी केन्द्रले भौतिक मन्त्रालय फुटाउनुपर्ने अवस्थामा आर्थिक मामिला तथा योजना मन्त्रालय माओवादीलाई दिनुपर्ने सर्त राखेको थियो । माओवादी केन्द्रका एक सांसदका अनुसार कांग्रेसले भौतिक मन्त्रालयमा आँखा लगाएपछि आर्थिक मामिला मन्त्रालय माओवादीलाई दिनुपर्ने सर्त अघि सारेको जानकारी दिए ।

कांग्रेसले आर्थिक मामिला मन्त्रालय दिन नसक्ने भएपछि मन्त्रालय फुटाउने विषय टुंगोमा पुग्न नसकेको हो । सरकारका प्रवक्तासमेत रहेका आन्तरिक मामिला तथा कानुनमन्त्री गंगानारायण श्रेष्ठले केही दिनभित्रै चित्रकारलाई जिम्मेवारी दिने विषयको टुंगो लाग्ने जानकारी दिए । जिम्मेवारी दिने विषयमा छलफल र गृहकार्य भइरहेको उनले बताए । एउटा मन्त्रालय थप्नुपर्ने भएपछि नीतिगत कुराका कारण हालसम्म रोकिएको मन्त्री श्रेष्ठले बताए । उनले हाल जिम्मेवारीमै रहेका मन्त्री सबैलाई क्वाटरको उपलब्धता हुन नसकेको सुनाए ।

मुख्यमन्त्रीसहित आन्तरिक मामिला तथा कानुन मन्त्रालय, भौतिक पूर्वाधार विकास मन्त्रालय र सामाजिक विकास मन्त्रालय गरी कुल ४ वटा मन्त्रालय माओवादीसँग छ । कांग्रेसले आर्थिक मामिला तथा योजना मन्त्रालय, खानेपानी ऊर्जा तथा सिँचाइ मन्त्रालय, स्वास्थ्य मन्त्रालय, वन तथा वातावरण मन्त्रालय, उद्योग पर्यटन तथा सहकारी मन्त्रालय लिएको छ । कांग्रेसले थप एक मन्त्रालय लिन बाँकी छ ।

एकीकृत समाजवादीले श्रम, रोजगार तथा यातायात र कृषि तथा पशुपन्छी विकास मन्त्रालय लिएको छ । बागमती प्रदेशसभामा कुल सातवटा दलको प्रतिनिधित्व छ । प्रदेशसभामा कांग्रेसको ३७, एमालेको २७, माओवादीको २१, राप्रपाको १३, एकीकृत समाजवादीको ७, नेमकिपाको ३ र हाम्रो नेपाली पार्टीको २ मत छ ।

प्रकाशित मिति: शुक्रबार, साउन १२, २०८० १२:०२

नवीन तिमल्सिना

प्रतिक्रिया दिनुहोस्

भर्खरै

सभामुख सचिवालयको प्रष्टीकरण– प्रतिनिधिसभामा गृहमन्त्रीलाई मात्र बोल्न दिने सहमति थियो

बीआरआई कार्यान्वयन योजना अन्तिम चरणमा

समीक्षा यात्रामा निस्किए रास्वपा महामन्त्री ढकाल

एमाले र रास्वपाबीच सहकारी र गिरीबन्धु टी इस्टेट प्रकरणमा मिलेर जाने सहमति छ : गगन थापा

कांग्रेसले बोलायो संसदीय दलको बैठक

लोकप्रिय

छानबिन समिति बने गृहमन्त्रीबाट राजीनामा दिने तयारीमा रवि लामिछाने

एउटै रेडियोमा काम गर्थे रवि र गगन, २५ वर्षपछि सम्बन्धमा कसरी बढ्यो खटपट ?

'ओलीकाे दल फुटाउने षड्यन्त्रमा प्रचण्डकाे पनि संलग्नता देखियाे, विश्वासकाे मत लिने कुरामा सफा नियत छैन'

को हो गौशाला २६ ?

एमाले र माओवादीसँग कसरी बिग्रियो उपेन्द्रको सम्बन्ध ?

विचार

पत्रकारिता र विचारको लडाइँ

विद्यार्थी आन्दोलनमाथि उठिरहेको प्रश्न

दिगो विकासको आधारः शिक्षा व्यवस्था र विश्वदृष्टिकोण

ब्लग

सम्पादक शिव डोटेललाई पत्र- साँच्चै ती दिन क्या दामी थिए है

रहस्यैरहस्यको चाङ नरवीर नेम्वाङ

गोसाइँकुण्ड यात्राले स्वस्थ छु, चुस्त छु भन्ने भ्रमबाट मुक्त गरायो

शिक्षा

बेनी नगरपालिकाले सुरु गर्‍यो ‘हामी सक्छौँ, हामी गर्छौं’ कार्यक्रम

विद्यार्थीविहीन विद्यालयमा चार शिक्षक

दिगो विकासको आधारः शिक्षा व्यवस्था र विश्वदृष्टिकोण