पोर्चुगलसँग पराजित भएसँगै भियतनाम विश्वकपबाट बाहिरियो

A+ A A-

भियतनाम महिला विश्वकप फुटबलबाट बाहिरिएको छ । आज (बिहीबार) भएको खेलमा पोर्चुगलसँग पराजित भएसँगै भियतनाम विश्वकप फुटबलबाट बाहिरिएको हो ।

न्यूजिल्यान्डको एफएमजी रंगशालामा भएको खेलमा पोर्चुगलसँग भियतनाम २–० गोलले पराजित भएको हो । भियतनामको यो लगातार दोस्रो हार हो । यसअघि भियतनाम अमेरिकासँग ३–० गोलले पराजित भएको थियो ।

पोर्चुगलको भने विश्वकप यात्रा कायमै रहेको छ । यसअघि पहिलो खेलमा नेदरल्यान्ड्ससँग १–० गोलले पराजित भएको पोर्चुगलले आफ्नो अन्तिम खेल अमेरिकासँग खेल्नेछ । भियतनामलाई पराजित गर्ने क्रममा पोर्चुगलका टेल्मा इन्कार्नाकाओ र फ्रान्सिस्का नाजारेथले गोल गरे ।

खेलको सातौँ मिनेटमा टेल्माले गोल गर्दै भियतनामविरुद्ध पोर्चुगललाई १–० गोलको अग्रता दिलाइन् । खेलको २१औँ मिनेटमा फ्रान्सिस्काले गोल गरेपछि पहिलो हाफसम्म पोर्चुगलले २–० गोलको अग्रता बनाएको थियो । पहिलो हाफमा नै २–० गोलले पछि परेको भियतनामले दोस्रो हाफमा पोर्चुगललाई रोके पनि गोल गर्न नसक्दा हार व्यहोरेको हो ।

समूह ‘ई’ मा अमेरिकासँगै नेदरल्यान्ड्स, पोर्चुगल र भियतनाम रहेका छन् । यसअघि आजै भएको खेलमा अमेरिका र नेदरल्यान्ड्सले १–१ गोलको बराबरी खेलेका थिए । यो समूहको शीर्ष स्थानमा अमेरिका रहेको छ ।

दुई खेलबाट एक खेलमा जित र एक खेलमा बराबरी खेल्दै अमेरिकाले चार अंक बनाएको छ । दोस्रो स्थानमा रहेको नेदरल्यान्ड्सको पनि समान खेलबाट एक खेलमा जित र एक खेलमा बराबरीसहित चार अंक नै छ । यता, तीन अंक बनाएको पोर्चुगलले एक खेलमा हार ब्यहोरेको थियो । एक खेलअघि नै समूह चरणबाट बाहिरिएको भियतनाम भने अंक विहीन छ ।

प्रकाशित मिति: बिहीबार, साउन ११, २०८० १५:२४