सुदूरपश्चिममा नागरिक उन्मुक्तिको 'घर झगडा'ले अप्ठ्यारोमा मुख्यमन्त्री शाह

सुदूरपश्चिममा नागरिक उन्मुक्तिको 'घर झगडा'ले अप्ठ्यारोमा मुख्यमन्त्री शाह

A+ A A-

नागरिक उन्मुक्ति पार्टी सुदूरपश्चिम प्रदेश सरकारमा सहभागी हुन लागेपछि पार्टीभित्र दुई धार बनेको छ । नाउपा संसदीय दलको कार्यालयले एकलौटी ढंगले मन्त्री पदमा दुई जनाको नाम सिफारिस गरेपछि प्रदेशसभा सदस्यहरू दुई धारमा विभाजन भएका हुन् ।

मुख्यमन्त्री कमलबहादुर शाहले मंगलबार भूमि व्यवस्था, कृषि तथा सहकारीमन्त्रीमा रामेश्वर चौधरी र राज्यमन्त्रीमा कैलाश चौधरीलाई नियुक्त गर्ने तयारी गरेका थिए । तर, नाउपाको विवादका कारण समस्या भइरहेको छ ।

नाउपाबाट मन्त्रीमा सिफारिस भएका रामेश्वर र लक्ष्मणले मंगलबारै नियुक्त गर्न भने पनि अर्को पक्षले त्यसो नगर्न भनेपछि मुख्यमन्त्री शाह समस्यामा परेका हुन् ।

लक्ष्मण चौधरीले दुई जनालाई प्रदेशको मन्त्री बनाउन खोजेपछि नाउपामा व्यापारीलाई मन्त्री नबनाउन भन्दै बहस चलेको छ ।

पार्टीका अर्का नेता सुरेन्द्र चौधरीले लक्ष्मण किशोर चौधरी (लक्ष्मण जोगेथ्वाअ) लाई मन्त्री बनाउन उपयुक्त हुने बताए । ‘लक्ष्मण थारूजी तपाईंको ल्याकत छ भने लक्ष्मण जोगेथ्वाअजीलाई मन्त्री बनाएर देखाउनुस्, सबैले स्वागत गर्लान्,’ उनले सामाजिक सञ्जालमा लेखेका छन्, ‘लक्ष्मण जोगेथ्वाअजीलाई मन्त्री बनाउन सक्नुहुन्न भने कैलाश चौधरीजीलाई राज्य होइन 'फूल' मन्त्री बनाएर देखाउनुस् ।’

उनले लक्ष्मणले सो कार्य गर्न नसक्ने दाबी गरेका छन् । ‘तेल व्यापारीको नाम मन्त्री र कैलाशजीको नाम राज्यमन्त्रीका लागि लिखित सिफारिस भएको पनि तपाईंलाई थाहा छैन भने बाँकी के कुराको हैसियत राख्नुहुन्छ ?,’ उनले भनेका छन् ।

नेता लक्ष्मणले पार्टी प्रदेश सरकारमा सहभागी हुनेबारे छलफल भइरहेको बताए । उनले भने, ‘हाम्रो पार्टी सुदूरपश्चिम प्रदेश सरकारमा सहभागी हुनेमा सकारात्मक छ । मन्त्री को बन्ने भन्नेबारे छलफल भइरहेको छ । म काठमाडौं छु ।’

नाउपा प्रदेशसभा सदस्य इन्दिरा गिरीले सरकारमा सहभागी हुने र मन्त्रीको नाम सिफारिसका कारण अहिले पनि दलका नेतासंग छलफल जारी रहेको बताइन् ।

प्रदेशका आन्तरिक मामिला तथा कानुनमन्त्री पृथ्वीबहादुर सिंहको सवारी दुर्घटनाबाट मृत्यु भएपछि सो मन्त्रालय मन्त्रीविहीन छ । सो मन्त्रालयको जिम्मेवारी कांग्रेसका शिवराज भट्टलाई दिइने चर्चा छ । यद्यपि मुख्यमन्त्री कमलबहादुर शाहले मन्त्रीबारे अहिलेसम्म टुङ्गो लाग्न नसकेको बताएका छन् ।

नाउपा सरकारमा सहभागी नहुने

सुदूरपश्चिम प्रदेशसरकारमा नागरिक उन्मुक्ति पार्टी सहभागी नहुने भएको छ । केन्द्रीय अध्यक्ष रञ्जिता श्रेष्ठ चौधरीले सुदूरपश्चिम प्रदेशका मुख्यमन्त्रीलाई मंगलबार पत्र पठाउँदै आफूहरु सरकारमा सहभागी नहुने जानकारी गराएकी हुन् ।

भूमि व्यवस्था, सहकारी तथा गरिबी निवारण मन्त्रालयको जिम्मेवारी सम्हालेकी श्रेष्ठले पठाएको पत्रमा भनिएको छ, ‘पार्टीको केन्द्रको निर्णय र सहमतिअनुसार प्रदेश सरकारमा मन्त्रालयको भागवण्डा नमिलेकाले सहभागी नहुने जानकारी गराइन्छ ।’

नागरिक उन्मुक्ति पार्टी मंगलबार प्रदेश सरकारमा सहभागी हुने तयारी गरेको थियो । सोहीअनुसार दलको कार्यालयले भूमि व्यवस्था, कृषि तथा सहकारीमन्त्रीमा रामेश्वर चौधरी र राज्यमन्त्रीमा लक्ष्मण चौधरीको नाम सिफारिस गरेको थियो ।

मन्त्री सिफारिसपछि उन्मुक्तिका असन्तुष्ट प्रदेशसभा सदस्यहरूले नियुक्ति तथा शपथ कार्यक्रम नगर्न मुख्यमन्त्रीलाई अनुरोध गरेका थिए ।