बंगलादेशमा तीव्र रूपमा फैलिदै डेंगी संक्रमण, १ सय ७६ जनाकाे मृत्यु

ढाकास्थित एक अस्पतालमा उपचाररत बिरामीहरूको भिड (तस्बिरः अलजजीरा, नजमुल इस्लाम)

A+ A A-

मनसुन सुरु भएसँगै बंगलादेश डेंगीको प्रकोपसँग जुधिरहेको छ । डेंगी संक्रमण व्यापक रूपमा फैलिँदै गर्दा अस्पतालहरू भरिएका छन् ।

बंगलादेश सरकारले हालसम्म आधिकारिक रुपमा डेंगीलाई महामारी घोषणा नगरे पनि यसले महामारीकाे रुप लिइसकेको त्यहाँका स्वास्थ्य विशेषज्ञहरूले बताएका छन् ।

बंगलादेशको स्वास्थ्य सेवा महानिर्देशनालय ‘डिरेक्टोरेट जनरल हेल्थ सर्भिस’ (डीजीएचएस)का अनुसार आइतबार रातिसम्म डेंगी संक्रमणका कारण १ सय ७६ जनाले ज्यान गुमाइसकेका छन् । संक्रमणका कारण ज्यान गुमाएका ३१ जना १४ वर्ष मुनिका बालबालिका रहेको डीजीएचएसले जनाएको छ ।

त्यस्तै गएको बुधबार डेंगी संक्रमण सबै भन्दा धेरै घातक मानिएको थियो । उक्त दिनमा एकमै पटकमा १९ जनाको मृत्यु भएको थियो भने करिब ३३ हजार जना संक्रमित अस्पताल भर्ना भएका थिए ।

डीजीएचएसका अनुसार यो वर्ष मृत्यु भएका १७६ जनामध्ये ११५ जनाको मृत्यु जुलाई २३ मै भइसकेको थियो । अघिल्लो वर्षको सोही अवधिमा २९ जनाको मृत्यु भएको थियो ।

तर, बंगलादेशमा धेरैले सन् २०१९ लाई ‘डेंगीको वर्ष’ भनेर चिन्ने गरेका छन् । त्यो वर्ष १० लाखभन्दा बढी संक्रमित अस्पताल भर्ना भएका थिए भने संक्रमणका कारण १७९ जनाले ज्यान गुमाएका थिए ।

बंगलादेशमा सामान्यतया अगस्ट र सेप्टेम्बरमा डेंगी संक्रमणका कारण अस्पताल भर्ना हुने र मृत्यु हुनेको संख्या उच्च हुने भन्दै विज्ञहरूले आगामी दिनहरूमा स्थिति अझ खराब हुन सक्ने चेतावनी दिएका दिँदै आएका छन् ।

प्रकाशित मिति: सोमबार, साउन ८, २०८० १८:४७