त्रिदेशीय कनेक्सन जोडिएको एक सय किलो सुन तस्करी घटनाको होला त संगठित अपराधमा अनुसन्धान ?

त्रिदेशीय कनेक्सन जोडिएको एक सय किलो सुन तस्करी घटनाको होला त संगठित अपराधमा अनुसन्धान ?

A+ A A-

राजस्व अनुसन्धान विभागले बुधबार त्रिभुवन विमानस्थलबाट भन्सार पास भएर नेपाल भित्रिन लागेको करिब एक सय किलोग्राम अवैध सुन बरामद गर्‍यो । राष्ट्र बै‌ंकले जाेखे पनि साे सुनकाे यकिन परिणाम आइसकेकाे छैन । सो सुन भित्र्याएको अभियोगमा विभागले हालसम्म १० जना आरोपीलाई पक्राउ गरेको छ । तर, उक्त सुनका मालिक को हुन् भन्ने पत्ता लागेको छैन ।

विभाग स्रोतका अनुसार बिहीबार पक्राउ परेका १० जनामध्ये एक जना चिनियाँ नागरिक लिङ चुवान लगानीकर्ता रहेको विभागको दाबी छ । त्योबाहेक पक्राउ परेका अन्य भने सामान्य नेपालीहरू छन् ।

विभागले बरामद गरेको सुन रेड ट्रेड कम्पनीको नाममा नेपाल भित्रिएको थियो । कम्पनी रजिष्ट्रारको कार्यालयमा रेड ट्रेड कम्पनी दोलखाका रामकुमार भुजेलको नाममा दर्ता रहेको र त्यसमार्फत सबै कारोबार भोजपुरका हर्कराज राईले गर्ने गरेको खुलेको छ ।

उनीहरू दुवै जना पक्राउ परिसकेका छन् । विभागले उनीहरूबाहेक तिब्बती मूलका भारतीय नागरिक थिप्तेन छिरिङ, दोलखाका दिलीप भुजेल, ट्याक्सीचालक चितवनका अशोक लामा, राजन श्रेष्ठ, कृष्ण श्रेष्ठ, पुष्करराज भट्ट र भन्सार एजेन्ट राजेन्द्र राईलाई समेत पक्राउ गरेको छ ।

उनीहरूमाथि अनुसन्धान गर्न उच्च अदालत पाटनले १० दिनको समय दिएको छ । हाल उनीहरू विभागको थुनामा छन् । सुन तस्करी प्रकरणमा चीनदेखि भारतसम्मको गिरोह संलग्न रहेको पाइएको छ ।

पछिल्लो समय सुन दुबई, सिङ्गापुर चीनहुँदै नेपाल ट्रान्जिट भएर भारत पुग्ने गरेको अनुसन्धानबाट देखिएको छ । नेपालमा जस्तै सुन आयातमा भारतले पनि कोटा निर्धारण गरेर नियन्त्रण गरेको छ । सोही कारण भारतमा बढ्ता तस्करी हुने गरेको हो ।

लामो समयदेखि नेपालको विमानस्थल सुन तस्करीको ट्रान्जिट बन्दै आएको छ । चीन र भारतका गिरोहहरूको संलग्नता पुष्टि हुने गरी १ सय किलोग्राम सुन बरामद भएपछि नेपालको तस्करबारे विभागले अनुसन्धान तीव्र पारेको छ ।

हाल पक्राउ परेका नेपालीहरू भरिया मात्रै भएको अनुमान विभागको छ । विभागको अनुसन्धानले रेड ट्रेड कम्पनीले पछिल्लो तीन महिनामा हङकङबाट ३३ र एकपटक दुबईबाट गरेर ३४ पटक विभिन्न अटो पार्ट्स विमानस्थलबाट भित्र्याएको खुलेको छ ।

त्यो बेलासमेत उनीहरूले सुन नै तस्करी गरेको हुन सक्ने आशंका विभागको छ । तस्कर समूहले ‘डमी’को रूपमा कम्पनी दर्ता गराएर सुन तस्करी गर्ने गरेको दाबी विभागको छ ।

बुधबार हङकङबाट प्यासिफिक क्याथे चाइना एयरको विमानमा कार्गो गरेर अटो पार्ट्समा सुन भित्र्याएको खुलेको हो । विभागले उक्त सुन भन्सार कार्यालयबाट जाँच पास भएपछि ट्याक्सीमा हालेर लिन खोज्दा सिनामंगलबाट बरामद गरेको थियो ।

सुन तस्करीको सूचना पाएको विभागले विमानस्थल प्रहरीलाई कुनै सूचना नै नदिई अपरेसन चलाएको थियो । विभागले प्रहरीको साटो विभागमा कार्यरत सशस्त्र प्रहरी बललाई अपरेसनमा सुरक्षाका लागि सहयाेग लिएको थियो ।

उसो त १ सय किलो सुन तस्करी प्रकरणमा संगठित अपराध देखिँदासमेत अझै विभागले प्रहरीलाई अनुसन्धानमा सहयोगका लागि पत्राचार गरेको छैन ।

प्रहरी प्रवक्ता डीआईजी कुवेरसिंह कडायतले विभागले अनुसन्धानमा सहयोगका लागि कुनै पत्राचार नगरेको बताए । ‘राजस्व छलीबारेको अनुसन्धान गर्ने निकाय नै राजस्व अनुसन्धान विभाग हो । संगठित अपराध देखियो भने हामीले गर्ने हो । तर, अहिलेसम्म भएको छैन,’डीआईजी कडायतले भने ।

प्रकाशित मिति: शुक्रबार, साउन ५, २०८० १८:०७